ପୁଣେ,୪।୪: ମହାରାଷ୍ଟ୍ରର ଥାନେ ଜିଲାର ଘୋଡବନ୍ଦର ଅଞ୍ଚଳର ୱାଘବିଲ ନାକା ନିକଟରେ ଜଣେ ଟ୍ରାଫିକ ପୋଲିସଙ୍କୁ ମାଡ଼ ମାରିବାର ଏକ ଘଟଣା ସାମ୍ନାକୁ ଆସିଛି। ଥାନେ ଟ୍ରାଫିକ ବିଭାଗ ଏକ ସ୍ବତନ୍ତ୍ର ଅଭିଯାନ ଚଲାଉଥିଲା। ଏହି ସମୟ ମଧ୍ୟରେ, ପୋଲିସ ହେଲମେଟ ନ ଥିବା ଏବଂ ଟ୍ରାଫିକ ନିୟମ ଉଲ୍ଲଂଘନ କରୁଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉଥିଲା। ଏହି ସମୟରେ ଜଣେ ଟ୍ରାଫିକ କନଷ୍ଟେବଳ ୫୬ ବର୍ଷୀୟ ବ୍ୟକ୍ତିଙ୍କ ହେଲମେଟ ପିନ୍ଧି ନ ଥିବା କାରଣରୁ ଚାଲାଣ କାଟିଥିଲେ।
ଏଥିରେ ରାଗିଯାଇ ବାଇକ ଆରୋହୀ ଟ୍ରାଫିକ କନଷ୍ଟେବଳଙ୍କ ସହ ଝଗଡ଼ା ଆରମ୍ଭ କରିଦେଲେ। ସେହି ବ୍ୟକ୍ତି ଜଣକ ରାସ୍ତା ମଝିରେ ଟ୍ରାଫିକ ପୋଲିସଙ୍କୁ ମାଡ଼ ମାରିବା ଆରମ୍ଭ କରିଦେଲେ। ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ଅଭିଯୁକ୍ତ ବ୍ୟକ୍ତିଙ୍କ ବିରୋଧରେ କସରଭାଦାଭଲି ଥାନାରେ BNS ଧାରା 221 ଏବଂ 168 ଅନୁଯାୟୀ ଏକ ମାମଲା ରୁଜୁ କରାଯାଇଛି। ଥାନେ ଟ୍ରାଫିକ ବିଭାଗ ଦ୍ୱାରା ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
