କୋଲକାତା,୧୩ ।୨: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସୋମବାର ବିଧାନସଭାରେ ସମ୍ବୋଧନ ଦେବା ଅବସରରେ ଭାରତୀୟ ଜନତା ପାର୍ଟି(ଭାଜପା) ଉପରେ ଖୁବ୍ ବର୍ଷିଛନ୍ତି । ‘କାଓ ହଗ ଡେ’କୁ ନେଇ ଉଠିଥିବା ବିବାଦକୁ ନେଇ ମମତା କହିଛନ୍ତି, ସେମାନେ ଆମକୁ କହୁଛନ୍ତି ଭାଲେଣ୍ଟାଇନ ଡେ’ରେ ଗାଈକୁ ଆଲିଙ୍ଗନ କର । ଯଦି ଆମକୁ ଗାଈ ସିଙ୍ଗ ମାରିଦିଏ ତେବେ କ’ଣ ହେବ ବୋଲି ମମତା ପ୍ରଶ୍ନ କରିଥିଲେ । ସେ କହିଥିଲେ ଏମିତି କରିବାରେ ମୋର କୌଣସି ଆପତ୍ତି ନାହିଁ ହେଲେ ଭାଜପା ଆମକୁ ଏହି ସାହସିକ କାମ କରିବାକୁ ୧୦ ଲକ୍ଷ ଟଙ୍କର ବୀମା ଦେବା ଦରକାର । ଏହାସହ ମଇଁଷିକୁ ଆଲିଙ୍ଗନ କଲେ ୨୦ ଲକ୍ଷ ଟଙ୍କାର ବୀମା ଦେବା ଦରକାର ।
ସୂଚନାଯୋଗ୍ୟ, କେନ୍ଦ୍ରର ମତ୍ସ, ପଶୁପାଳନ ଓ ଡେୟରି ମନ୍ତ୍ରଣାଳୟର ପଶୁପାଳନ ଓ ଡେୟରି ବିଭାଗ ଅନ୍ତର୍ଗତ ଏଡବ୍ଲୁବିଆଇ ଭାଲେଣ୍ଟାଇନ ଡେ ଅର୍ଥାତ୍ ୧୪ ଫେବୃୟାରୀକୁ କାଓ ହଗ ଡେ ଭାବେ ପାଳନ କରିବାକୁ ଅପିଲ କରିଥିଲା । ଏହାପରେ ଏହି ଅପିଲର ସୋସିଆଲ ମିଡିଆରେ ଖୁବ୍ ମଜା ଉଡିଥିଲା । ଏହାପରେ ପଶୁ କଲ୍ୟାଣ ବୋର୍ଡ(ଏଡବ୍ଲୁବିଆଇ) ଏହି ଅପିଲକୁ ଫେରାଇ ନେଇଥିଲା ।
