କୋଲକାତା, ୧୮ା୩: ଭାଜପା ଏବଂ କଂଗ୍ରେସଠାରୁ ସମଦୂରତ୍ୱ ରକ୍ଷା କରି ନୂଆ ସାମ୍ମୁଖ୍ୟ ଗଠନ କରିବା ଲାଗି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (ଟିଏମ୍ସି) ନେତ୍ରୀ ମମତା ବାନାର୍ଜୀ ଏବଂ ସମାଜାବାଦୀ ପାର୍ଟି (ଏସ୍ପି) ଅଧ୍ୟକ୍ଷ ଅଖିଳେଶ ଯାଦବ ନିଷ୍ପତ୍ତି ନେଇଛନ୍ତି। ଶୁକ୍ରବାର କୋଲକାତାରେ ଅଖିଳେଶ ମମତାଙ୍କୁ ଭେଟିଛନ୍ତି। ମମତା ଆସନ୍ତା ୨୩ ତାରିଖରେ ଓଡ଼ିଶା ମୁଖ୍ୟମନ୍ତ୍ରୀ ତଥା ବିଜୁ ଜନତା ଦଳ (ବିଜେଡି) ଅଧ୍ୟକ୍ଷ ନବୀନ ପଟ୍ଟନାୟକଙ୍କୁ ଭେଟିବେ। ବିଜେଡି ଉଭୟ କଂଗ୍ରେସ ଓ ଭାଜପାଠାରୁ ସମଦୂରତ୍ୱ ରକ୍ଷାକରି ଆସିଛି। ୨୦୨୧ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଭାଜପାକୁ ପରାଜିତ କରିଥିବାରୁ ମମତାଙ୍କୁ ଏସ୍ପି ନେତା ଅଖିଳେଶ ଉଚ୍ଚ ପ୍ରଶଂସା କରିଥିଲେ। ଆଗାମୀ ନିର୍ବାଚନରେ ଗୈରିକ ଦଳକୁ ପରାଜିତ କରିବାକୁ ହେଲେ ଟିଏମ୍ସି ସୁପ୍ରିମୋଙ୍କ ସହ ଏସ୍ପି ଦୃଢ଼ଭାବେ ଛିଡ଼ାହେବ ବୋଲି ଅଖିଳେଶ କହିଛନ୍ତି।
ସମ୍ପ୍ରତି କଂଗ୍ରେସ ନେତା ରାହୁଲ ଗାନ୍ଧୀ ଲଣ୍ଡନରେ ଦେଇଥିବା ମନ୍ତବ୍ୟକୁ ନେଇ ଶାସକ ଦଳ ପାର୍ଲାମେଣ୍ଟରେ ଅଚଳାବସ୍ଥା ସୃଷ୍ଟି କରିଛି। ଭାଜପା ରାହୁଲଙ୍କୁ ବିରୋଧୀ ଦଳଗୁଡ଼ିକର ମୁଖ୍ୟ ନେତା ଭାବେ ଉପସ୍ଥାପନ କରି ସେମାନଙ୍କୁ ଟାର୍ଗେଟ କରିବାକୁ ଚାହୁଁଥିତ୍ବା ବିରୋଧୀ ସନ୍ଦେହ କରୁଛନ୍ତି। କଂଗ୍ରେସକୁ ବ୍ୟବହାର କରି ଶାସକ ଦଳ ପାର୍ଲାମେଣ୍ଟ ଚଳାଇଦେବାକୁ ଚାହୁଁନାହିଁ। ୨୦୨୪ ନିର୍ବାଚନରେ କିଏ ପ୍ରଧାନମନ୍ତ୍ରୀ ପ୍ରାର୍ଥୀ ହେବେ ତାହା ନିଷ୍ପତ୍ତି ନେବାର ଆବଶ୍ୟକତା ନାହିଁ ବୋଲି ଟିଏମ୍ସି ଏମ୍ପି ସୁଦୀପ ବନ୍ଦୋପାଧ୍ୟାୟ କହିଛନ୍ତି। କଂଗ୍ରେସକୁ ବିରୋଧୀ ଦଳଗୁଡ଼ିକର ବିଗ୍ ବସ୍ ଭାବିବା ଭ୍ରାନ୍ତ ଧାରଣା ବୋଲି ସେ ମତ ଦେଇଛନ୍ତି। ଭାଜପା ଏବଂ କଂଗ୍ରେସଠାରୁ ସମଦୂରତ୍ୱ ରକ୍ଷା କରିବା ଯୋଜନା ସମ୍ପର୍କରେ ଆଲୋଚନା ଲାଗି ମମତା ଅନ୍ୟ ବିରୋଧୀ ଦଳଗୁଡ଼ିକ ସହ ଆଲୋଚନା କରିବେ। ଆମେ ତୃତୀୟ ସାମ୍ମୁଖ୍ୟ କଥା କହୁନାହୁଁ। କିନ୍ତୁ ଭାଜପାକୁ ପରାଜିତ କରିବା କ୍ଷମତା ଆଞ୍ଚଳିକ ଦଳଗୁଡ଼ିକର ରହିଛି ବୋଲି ବନ୍ଦୋପାଧ୍ୟାୟ କହିଛନ୍ତି। ଭାଜପା ନେତୃତ୍ୱାଧୀନ କେନ୍ଦ୍ର ସରକାର ସିବିଆଇ, ଇଡି ଏବଂ ଆୟକର ବିଭାଗ ଭଳି କେନ୍ଦ୍ରୀୟ ସଂସ୍ଥାର ଦୁରୁପଯୋଗ କରି ବିରୋଧୀ ନେତାମାନଙ୍କୁ ଟାର୍ଗେଟ କରୁଛନ୍ତି। ଯେଉଁମାନେ ଭାଜପା ଭାକ୍ସିନ ପାଉଛନ୍ତି, ସେମାନେ ଏନେଇ ବିବ୍ରତ ନୁହନ୍ତି। କାରଣ ସିବିଆଇ, ଇଡି ମାମଲା ଥିବା ବିରୋଧୀ ନେତାମାନେ ଭାଜପାରେ ଯୋଗଦେଲେ ସେମାନଙ୍କ ମାମଲାକୁ ହଟାଇ ଦିଆଯାଉଥିବା ଅଖିଳେଶ ଖବରଦାତାମାନଙ୍କୁ କହିଛନ୍ତି।
