ନୂଆଦିଲ୍ଳୀ,୨୪।୭: ବ୍ୟାଙ୍କ ଋଣ ଖିଲାପି ମାମଲାରେ ପଳାତକ ଘୋଷିତ ବିଜୟ ମାଲ୍ୟାଙ୍କ ପ୍ରତ୍ୟର୍ପଣ ମାମଲାର ଶୁଣାଣି ଲଣ୍ଡନର ଏକ ନ୍ୟାୟାଳୟ କରୁଛନ୍ତି। ମାମଲା ଶେଷକରି ମାଲ୍ୟାଙ୍କୁ ବ୍ରିଟେନ କେବେ ଭାରତ ପଠାଇବ ସେ ନେଇ କଳ୍ପନାଜଳ୍ପନା ଲାଗି ରହିଛି। ଏଭଳି ସ୍ଥିତିରେ ଭାରତରେ ଅବସ୍ଥାପିତ ବ୍ରିଟେନର ହାଇ କମିଶନର ଫିଲିପ ବାର୍ଟନ ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ, ମାଲ୍ୟାଙ୍କ ପ୍ରତ୍ୟର୍ପଣ ଲାଗି କୌଣସି ସମୟସୀମା ଧାର୍ଯ୍ୟ ହୋଇନି। ଏ ନେଇ ବ୍ରିଟେନ ସରକାର ନିର୍ଦ୍ଦିଷ୍ଟ ସୀମା ନିର୍ଦ୍ଧାରଣ କରିପାରିବେ ନାହିଁ। ଅପରାଧୀମାନେ ନ୍ୟାୟ ବ୍ୟବସ୍ଥାଠାରୁ ଯେଉଁଭଳି ଭାବେ ବର୍ତ୍ତିପାରିବେ ନାହିଁ ତାକୁ ବ୍ରିଟେନ ସରକାର ଧ୍ୟାନରେ ରଖିଛନ୍ତି। ମାଲ୍ୟା ବ୍ରିଟେନରେ ଶରଣ ମାଗିଥିବା ଏକ ପ୍ରଶ୍ନର ଉତ୍ତରରେ ସେ ଟୀପ୍ପଣୀ ଦେବାକୁ ମନା କରି ଦେଇଛନ୍ତି। ବାର୍ଟନ କହିଛନ୍ତି, ମାଲ୍ୟାଙ୍କ ପ୍ରତ୍ୟର୍ପଣ ଏକ ଆଇନଗତ ମାମଲା। ଏହି ମାମଲା ଉପରେ ବ୍ରିଟେନ ସରକାର କୌଣସି ନୂଆ ନିର୍ଣ୍ଣୟ ନେଇ ନାହାନ୍ତି। ମାମଲାଟି ଭାରତ ଲାଗି କେତେ ଗୁରୁତ୍ୱପୂର୍ଣ୍ଣ ତାହା ବ୍ରିଟେନ ସରକାର ଉପଲବ୍ଧି କରିଛନ୍ତି। ସୂଚନାଯୋଗ୍ୟ, ବିଜୟ ମାଲ୍ୟା ଭାରତୀୟ ବ୍ୟାଙ୍କଗୁଡିକରୁ ପ୍ରାୟ ୯ ହଜାର କୋଟି ଟଙ୍କା ଠକେଇ କରିଛନ୍ତି। ବ୍ରିଟେନରେ ମାଲ୍ୟାଙ୍କୁ ଶରଣ ଦେବା ଲାଗି ହୋଇଥିବା ଆବେଦନ ଉପରେ କୌଣସି ଧ୍ୟାନ ନ ଦେବାକୁ ଭାରତ ସରକାର ନିକଟରେ କହିଥିଲେ।
