ମେକ୍ସିକୋ,୨୯।୧୨: ମେକ୍ସିକୋରେ ଏକ ବଡ଼ ଟ୍ରେନ ଦୁର୍ଘଟଣା ଘଟିଛି। ଦେଶର ଓଆକ୍ସାକା ରାଜ୍ୟରେ ଏକ ଅନ୍ତଃସାଗରୀୟ ଟ୍ରେନ ଲାଇନଚ୍ୟୁତ ହେବା ଫଳରେ ଅତି କମରେ ୧୩ ଜଣଙ୍କର ମୃତ୍ୟୁ ହୋଇଛି।
ମେକ୍ସିକୋ ନୌସେନା କହିଛି, ଟ୍ରେନ୍ରେ ୯ ଜଣ କ୍ରୁ ସଦସ୍ୟ ଏବଂ ୨୪୧ ଜଣ ଯାତ୍ରୀଙ୍କ ସମେତ ମୋଟ ୨୫୦ ଜଣ ଥିଲେ। ଏମାନଙ୍କ ମଧ୍ୟରୁ ୧୯୩ ଜଣ ସୁରକ୍ଷିତ ଥିବା ଜଣାପଡ଼ିଛି, ୯୮ ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୩୬ ଜଣଙ୍କୁ ଡାକ୍ତରୀ ଚିକିତ୍ସା ଦିଆଯାଉଛି। ଅଧିକାରୀମାନେ କହିଛନ୍ତି ଯେ ଦୁର୍ଘଟଣାଟି ଚିଭେଲା ଏବଂ ନିଜାଣ୍ଡା ସହର ମଧ୍ୟରେ ଘଟିଛି।
ମେକ୍ସିକୋ ରାଷ୍ଟ୍ରପତି କ୍ଲାଉଡିଆ ସେନବାଉମ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କହିଛନ୍ତି, ଆହତମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ଏବଂ ମୃତକଙ୍କ ପରିବାରକୁ ସହାୟତା କରିବା ପାଇଁ ବରିଷ୍ଠ ଅଧିକାରୀମାନଙ୍କୁ ଘଟଣାସ୍ଥଳକୁ ପଠାଯାଇଛି।
୨୦୨୩ ମସିହାରେ ପୂର୍ବତନ ରାଷ୍ଟ୍ରପତି ଆଣ୍ଡ୍ରେସ ମାନୁଏଲ ଲୋପେଜ ଓବ୍ରାଡୋରଙ୍କ ଦ୍ୱାରା ଇଣ୍ଟରଓସେନିକ ଟ୍ରେନର ଉଦଘାଟନ କରାଯାଇଥିଲା। ଏହା ବୃହତ୍ତର ଇଣ୍ଟରଓସେନିକ କରିଡର ପ୍ରକଳ୍ପର ଏକ ଅଂଶ ଏବଂ ମେକ୍ସିକୋର ପ୍ରଶାନ୍ତ ମହାସାଗରୀୟ ବନ୍ଦର ସାଲିନା କ୍ରୁଜ କୁ ଗଲ୍ଫ ଉପକୂଳରେ ଥିବା କୋଆଟଜାକୋଆଲକୋସ ସହିତ ସଂଯୋଗ କରୁଥିବା ତେହୁଆଣ୍ଟେପେକ ଇସ୍ଥମସ ଦେଇ ରେଳ ସଂଯୋଗକୁ ଆଧୁନିକୀକରଣ କରିବା ପାଇଁ ଡିଜାଇନ କରାଯାଇଥିଲା।
Dharitri – Odisha’s No.1 Odia Daily
