ମୁମ୍ବାଇ: ମହିନ୍ଦ୍ରା ଆଣ୍ଡ ମହିନ୍ଦ୍ରା ଲିମିଟେଡ୍ ପକ୍ଷରୁ ଏହାର ପିକ୍ଅପ୍ ରେଞ୍ଜର ଯାନ ଉପରେ ଗ୍ରାହକଙ୍କ ଲାଗି କରୋନା ବୀମା ସମ୍ପର୍କରେ ଘୋଷଣା କରାଯାଇଛି। ମେଗା ଫେଷ୍ଟିସ ଅଫର ଅନ୍ତର୍ଗତ କମ୍ପାନୀ ପକ୍ଷରୁ ୧ ଲକ୍ଷ ଟଙ୍କାର ବୀମା କଭର ପ୍ରଦାନ କରାଯାଉଛି। ଏଥିରେ ଯାନ କ୍ରୟ କରୁଥିବା ଗ୍ରାହକ ତାଙ୍କ ସ୍ତ୍ରୀ ଏବଂ ୨ ପିଲାଙ୍କୁ ବୀମା ସୁବିଧା ମିଳିପାରିବ। ନଭେମ୍ବର ୩୦ ଯାଏ ଏହାର ଲାଭ ଗ୍ରାହକ ଉଠାଇପାରିବେ। ଯାନ କ୍ରୟର ୯.୫ ମାସ ଯାଏ ବୀମା କଭର ଉପଲବ୍ଧ ହୋଇପାରିବ। ବୋଲେରୋ ପିକ୍ ଅପ୍ ରେଞ୍ଜ ଯଥା ବୋଲେରୋ ପିକ୍ ଅପ୍, ବୋଲେରୋ ମାକ୍ସି ଟ୍ରକ୍, ବୋଲେରୋ ସିଟି ପିକ୍ ଅପ୍ ଏବଂ ବୋଲେରୋ କ୍ୟାମ୍ପର କ୍ରୟରେ ଏଭଳି ସୁବିଧା ଦିଆଯାଉଛି। ଏଥିଲାଗି କମ୍ପାନୀ ଓରିଏଣ୍ଟାଲ ଇନସ୍ୟୁରାନ୍ସ ସହ ଚୁକ୍ତିରେ ସାମିଲ ହୋଇଛି। ବର୍ତ୍ତମାନର ଚ୍ୟାଲେଞ୍ଜିଂ ସମୟରେ ଅଂଶୀଦାରଙ୍କ ଜୀବନରେ ଉନ୍ନତିକୁ ଧ୍ୟାନରେ ରଖି ଏଭଳି ସୁବିଧା ହାତକୁ ନିଆଯାଇଥିବା ମହିନ୍ଦ୍ରା ଆଣ୍ଡ ମହିନ୍ଦ୍ରା ଅଟୋମୋଟିଭ ଡିଭିଜନର ସେଲ୍ସ ଏବଂ କଷ୍ଟମର କେୟାର ବରିଷ୍ଠ ଉପସଭାପତି ସତୀନ୍ଦର ବାଜଓ୍ବା ସୂଚନା ଦେଇଛନ୍ତି। ବୀମା ଲାଭ କରିବା ଲାଗି ଗ୍ରାହକଙ୍କୁ ନିଜ ଏବଂ ପରିବାର ସଦସ୍ୟଙ୍କ ନାମ, ଜନ୍ମ ତାରିଖ ଏବଂ ଠିକଣାକୁ ପଞ୍ଜୀକରଣ କରିବାକୁ ପଡିବ। କୋଭିଡ୍-୧୯ ପଜିଟିଭରେ ହସ୍ପିଟାଲରେ ଆଡମିଶନ କିମ୍ବା ଏଥି ସଂକ୍ରାନ୍ତ ଖର୍ଚ୍ଚ ଭରଣା ଲାଗି ବୀମା ସୁବିଧା ଦିଆଯାଇଥିବା କମ୍ପାନୀ ପକ୍ଷରୁ ସୂଚନା ରହିଛି।
