ମ.ରାମପୁର,୪ା୯(ଶଶିଭୂଷଣ ପ୍ରହରାଜ): ରାଜ୍ୟ ସରକାରଙ୍କ ଦ୍ୱାରା ଗତ ୩୧ ତାରିଖ ରାଜ୍ୟର ଅନେକ ଅଞ୍ଚଳ ବିଜ୍ଞାପିତ ଅଞ୍ଚଳ ଘୋଷଣା କରାଯାଇଥିଲା। କିନ୍ତୁ ମ.ରାମପୁର ଏହି ଘୋଷଣାରେ ସାମିଲ ନ ହେବା ଯୋଗୁ ଅଞ୍ଚଳବାସୀ ତୀବ୍ର ଅସନ୍ତୋଷ ପ୍ରକାଶ କରି ଆଜି ୪ ତାରିଖ ଗୁରୁବାର ମ.ରାମପୁର ବନ୍ଦ କରିଛନ୍ତି। ଗତ ସରକାର ମ.ରାମପୁରକୁ ବିଜ୍ଞାପିତ ଅଞ୍ଚଳ ହେବ ବୋଲି ଘୋଷଣା କରିଥିଲେ। ସମ୍ପ୍ରତି ଘୋଷଣା ଉହ୍ୟ ହେତୁ ଲୋକେ ରାଜରାସ୍ତାକୁ ଓହ୍ଲାଇଆସିଛନ୍ତି। ମ.ରାମପୁରକୁ ୨୦୧୧ ଜନଗଣନା ପ୍ରକାରେ ସରକାର ଜନସଂଖ୍ୟା ସହର ମାନ୍ୟତା ଦେଇଥିଲେ। ରାଜ୍ୟର ନୂତନ ଘୋଷିତ ବିଜ୍ଞାପିତ ଅଞ୍ଚଳ ମଧ୍ୟରୁ ଅର୍ଦ୍ଧାଧିକ ଅଞ୍ଚଳର ଜନସଂଖ୍ୟାଠାରୁ ମ.ରାମପୁର ଜନ ସଂଖ୍ୟା ଦୁଇ ଗୁଣ ଅଧିକ।
ସେହିପରି ମ.ରାମପୁରର ମାସିକ ଆୟ ପାଖାପାଖି ଲକ୍ଷେ ଅଟେ। ସେହିପରି ଏଇଠି ୪ଟି ବ୍ଲକ ଅଞ୍ଚଳକୁ ନିୟନ୍ତ୍ରଣ କରୁଥିବା ଉପଖଣ୍ଡ କାର୍ଯ୍ୟାଳୟ ରହିଛି। ମ.ରାମପୁର ଦେଇ ଜାତୀୟ ରାଜପଥ ନଂ ୫୯, ରାଜ୍ୟ ରାଜପଥ ନଂ ୬(କ); ଜିଲା ମୁଖ୍ୟ, ଅନ୍ୟ ଜିଲା ମୁଖ୍ୟ ରାସ୍ତା ସଂଯୋଗୀକରଣ ହେଇ ଚାରି ଛକ ରହିଛି। ଏହି ରାସ୍ତା ଦେଇ ସହସ୍ରାଧିକ ଯାନବାହନ ଯାତାୟାତ ହେଉଛି। ଏହି ଜିଲାର ନର୍ଲା, କର୍ଲାମୁଣ୍ଡା, ଲାଞ୍ଜିଗଡ଼, ମ.ରାମପୁର ଆଦି ଅଞ୍ଚଳ ଲୋକେ ପ୍ରଶାସନିକ,ରାଜନୀତିକ, ନ୍ୟାୟିକ ଅନେକ ବହୁବିଧ କାର୍ଯ୍ୟ ପାଇଁ ମ.ରାମପୁରରେ ନିର୍ଭର କରନ୍ତି। ମ.ରାମପୁର ଭଳି ଗୁରୁତ୍ୱ ବହନ କରୁଥିବା ବିଜ୍ଞାପିତ ଅଞ୍ଚଳ ସମସ୍ତ ମାନଦଣ୍ଡ, ପରିମାପ ପରିପୂରଣ କରିପାରୁଛି। ଏହା ସହିତ ରାଜସ୍ବ ଉପଖଣ୍ଡ ମାନ୍ୟତା ମଧ୍ୟ ମାପଦଣ୍ଡ ପୂରଣ କରୁଛି। ତେଣୁ ରାଜ୍ୟ ସରକାର ଯୋଥୋଚିତ ଦୃଷ୍ଟି ଦେଇ ମ.ରାମପୁର ଅଞ୍ଚଳର ଗ୍ରହଣୀୟ ଦାବି ପୂରଣ ପାଇଁ ଅଞ୍ଚଳବାସୀ ଦାବି କରିଛନ୍ତି।
ଆଜିର ବନ୍ଦ ଜିଲାପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂହଦେଓ, ସମିତି ସଭ୍ୟ ତଥା ଭାଜପା ମଣ୍ଡଳ ସଭାପତି ଯଜ୍ଞସେନ ପଣ୍ଡା, ସିପିଏମ୍ ନେତା ସତ୍ୟଜିତ ଚାଟାର୍ଜୀ, ପୂର୍ବତନ ସରପଞ୍ଚ କିଶୋର ପ୍ରହରାଜ, ଜିବେଶ ପଣ୍ଡା, ଚିତ୍ତ ବାଗ, ସାମାଜିକ କର୍ମୀ ବିକାଶ ସିଂହଦେଓ(ଘନ),ନୀଳମାଧବ ସିଂହଦେଓ,ସତ୍ୟ ସାହୁ,ବାର ଆସୋସିଏଶନ ସଭାପତି ଜୟ ସିଂହଦେଓ, ଚମରା ବଗର୍ତ୍ତି, ପ୍ରକାଶ ମାଝୀ, ଚିରାଗ ସିଂହ ଦେଓ, ଶ୍ରୀକାନ୍ତ ହୋତା ପ୍ରମୁଖ ନେତୃତ୍ୱ ନେଇ ଆନ୍ଦୋଳନରେ ଶତାଧିକ ଲୋକ ସାମିଲ ହୋଇଛନ୍ତି। ସକାଳୁ ଆରମ୍ଭ ହେଇଥିବ ଆନ୍ଦୋଳନ ଜାରି ରହିଛି। ଚାରି ଛକଠାରେ ଚାରି ପାଖ ରାସ୍ତା ବନ୍ଦ କରାଯାଇଛି। ସହର ସମସ୍ତ ଦୋକାନ, ବଜାର, ସରକାରୀ, ବେସରକାରୀ ଅନୁଷ୍ଠାନ ସମ୍ପୂର୍ଣ୍ଣ ବନ୍ଦ ରହିଛି। ମ.ରାମପୁରକୁ ବିଜ୍ଞାପିତ ଅଞ୍ଚଳ,ରାଜସ୍ବ ଉପଖଣ୍ଡ ମାନ୍ୟତା ନ ହେବା ଯାଏ ଅଭିଯାନ ଜାରି ରହିବ କୁହାଯାଇଛି। ଆଜି ୧୨ ଘଣ୍ଟା ପର୍ଯ୍ୟନ୍ତ ବନ୍ଦ ପାଳନ କରାଯିବା କୁହାଯାଇଛି।
