ନୂଆଦିଲ୍ଲୀ,୧୬।୩: ଏବେ IPL ୨୦୨୫ ଆରମ୍ଭ ହେବାକୁ ୧ ସପ୍ତାହରୁ କମ ସମୟ ବାକି ଅଛି। କିନ୍ତୁ ଏପର୍ଯ୍ୟନ୍ତ ଲକ୍ଷ୍ନୌ ସୁପରଜାଏଣ୍ଟସର ୩ ପ୍ରମୁଖ ପେସର ମୋହସିନ ଖାନ, ଆଭେଶ ଖାନ ଏବଂ ମୟଙ୍କ ଯାଦବଙ୍କୁ ଟୁର୍ଣ୍ଣାମେଣ୍ଟରେ ଖେଳିବା ପାଇଁ NCA ପକ୍ଷରୁ ସବୁଜ ସଙ୍କେତ ମିଳିନାହିଁ। ଲକ୍ଷ୍ନୌ ଦଳ ଏହାକୁ ନେଇ ଚିନ୍ତିତ। ଏହି ସମୟରେ ଏବେ ଏକ ଆଶ୍ଚର୍ଯ୍ୟଜନକ ଦାବି କରାଯାଇଛି। ଏକ ରିପୋର୍ଟ ଅନୁଯାୟୀ LSG ଏହାର ୨୨ ବର୍ଷୀୟ ଯୁବ ପେସ ସେନସେଶନ୍ ମୟଙ୍କ ଯାଦବଙ୍କୁ ସମଗ୍ର ସିଜିନ ପାଇଁ ଅଯୋଗ୍ୟ ଘୋଷଣା କରିବାକୁ NCA ଡାକ୍ତରଙ୍କ ସହିତ ଯୋଗାଯୋଗ କରିଛି। ଏହି ଦାବି ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ପ୍ରଥମ ଥର ପାଇଁ କୌଣସି ଆଇପିଏଲ ଫ୍ରାଞ୍ଚାଇଜ ଏପରି ଦାବି କରିଛି।
OneCricket ରିପୋର୍ଟ ଅନୁଯାୟୀ, BCCIର ଏକ ସୂତ୍ର ମୟଙ୍କ ଯାଦବଙ୍କୁ ସମଗ୍ର ସିଜିନ ପାଇଁ ବାଧ୍ୟତାମୂଳକ ଭାବରେ ଅଯୋଗ୍ୟ ଘୋଷଣା କରିବାକୁ LSGର ଦାବି ନେଇ ଖୁଲାସା କରିଛି। ସେ କହିଛନ୍ତି, ’ଏହା ପ୍ରଥମ ଥର ଯେ ଏକ ଆଇପିଏଲ ଦଳ ଏତେ ଅଜବ ଦାବି କରୁଛି।’ ଏହି ଅନୁରୋଧ ଶୁଣି NCA ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଛନ୍ତି। ପ୍ରକୃତରେ IPLର ନିୟମ ଅନୁଯାୟୀ, କୌଣସି ଫ୍ରାଞ୍ଚାଇଜ ଖେଳାଳିଙ୍କୁ ବାଦ ନ ଦେଲେ ତାଙ୍କ ବଦଳରେ ଅନ୍ୟ ଖେଳାଳି ଆଣିପାରିବ ନାହିଁ। ସେଥିପାଇଁ ଲକ୍ଷ୍ନୌ ଏନ୍ସିଏ ସମ୍ମୁଖରେ ଏପରି ଦାବି ରଖିଛି। ତଥାପି LSG ପରିଚାଳନା ବିଭାଗ ରିପୋର୍ଟରେ ଏହି ଦାବିଗୁଡ଼ିକୁ ଅସ୍ବୀକାର କରିଛି।
ମୟଙ୍କ ଯାଦବ ଅକ୍ଟୋବର ୨୦୨୪ରେ ବାଂଲାଦେଶ ବିପକ୍ଷରେ ଟିମ୍ ଇଣ୍ଡିଆ ପାଇଁ ଡେବ୍ୟୁ କରିଥିଲେ। ଏହି ୩ ମ୍ୟାଚ୍ ବିଶିଷ୍ଟ T୨୦ ସିରିଜରେ ସେ ଚମତ୍କାର ବୋଲିଂ କରିଥିଲେ। ତଥାପି ସେ ଶେଷ ମ୍ୟାଚ୍ରେ ଆହତ ହୋଇଥିଲେ। ସେବେଠାରୁ ସେ କ୍ରିକେଟରୁ ଦୂରରେ ଅଛନ୍ତି ଏବଂ NCAରେ ରିହାବ୍ କରୁଛନ୍ତି। ତାଙ୍କ ଆଘାତ ସମ୍ପର୍କରେ ବିସିସିଆଇ କୌଣସି ଆନୁଷ୍ଠାନିକ ସୂଚନା ଦେଇନାହିଁ। କିନ୍ତୁ କ୍ରିକବଜ ରିପୋର୍ଟ ଅନୁଯାୟୀ, ସେ IPLର ପ୍ରଥମାର୍ଦ୍ଧରେ ଖେଳିପାରିବେ ନାହିଁ।
ଯଦି ଏହା ହୁଏ, ତେବେ ଏହା ଲକ୍ଷ୍ନୌ ଦଳ ପାଇଁ ଏକ ବଡ଼ ଝଟ୍କା ହେବ। ସେ ଦଳର ପେସ ଆକ୍ରମଣର ଏକ ଗୁରୁତ୍ୱପୂର୍ଣ୍ଣ ଅଂଶ । ଫ୍ରାଞ୍ଚାଇଜ ତାଙ୍କୁ ଏହି ସିଜିନ ପାଇଁ ୧୧ କୋଟି ଟଙ୍କାରେ ରିଟେନ କରିଛି। ଲକ୍ଷ୍ନୌ ଚଳିତ ସିଜନର ପ୍ରଥମ ମ୍ୟାଚ୍ ୨୪ ମାର୍ଚ୍ଚରେ ବିଶାଖାପାଟଣାରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଖେଳିବାର କାର୍ଯ୍ୟକ୍ରମ ରହିଛି। ମୟଙ୍କଙ୍କ ବ୍ୟତୀତଙ୍ ଯଦି ମୋହସିନ ଏବଂ ଆଭେଶ ମଧ୍ୟ ଏହି ମ୍ୟାଚ ପୂର୍ବରୁ ଫିଟ ନ ହୁଅନ୍ତି, ତେବେ ଲକ୍ଷ୍ନୌରେ କେବଳ ଆକାଶ ଦୀପ ଏବଂ ଶାମର ଯୋସେଫ ଦ୍ରୁତ ବୋଲର ଭାବରେ ରହିବେ।
ଏଲ୍ଏସ୍ଜି ସ୍କ୍ବାର୍ଡ:
ନିକୋଲାସ ପୂରନ, ରବି ବିଷ୍ଣୋଇ, ମୟଙ୍କ ଯାଦବ, ମୋହସିନ ଖାନ, ଆୟୁଷ ବାଡୋନି, ରିଷଭ ପନ୍ତ, ଡେଭିଡ୍ ମିଲର୍, ଆଇଡେନ ମାର୍କରାମ, ମିଚେଲ ମାର୍ଶ, ଆଭେଶ ଖାନ, ଅବଦୁଲ ସମାଦ, ଆର୍ଯ୍ୟନ ଜୁୟାଲ, ଆକାଶ ଦୀପ, ଶାହବାଜ ଅହମ୍ମଦ, ଏମ. ସିଦ୍ଧାର୍ଥ, ଆକାଶ ସିଂହ, ଦିଗବେଶ ସିଂହ, ହିମ୍ମତ ସିଂହ, ଆର୍ଯ୍ୟନ ଜୁୟାଲ, ଶାମର ଯୋସେଫ, ଯୁବରାଜ ଚୌଧୁରୀ, ପ୍ରିନ୍ସ ଯାଦବ, ମାଥ୍ୟୁ ବ୍ରିଟ୍ଜକେ, ରାଜବର୍ଦ୍ଧନ ହଙ୍ଗାରଗେକର, ଅର୍ଶିନ କୁଲକର୍ନି।
