ନୂଆଦିଲ୍ଲୀ,୨୫।୮: ଘରେ LPG ଗ୍ୟାସ କନେକ୍ସନ ଥିଲେ ଆପଣଙ୍କ ପାଇଁ ରହିଛି ଦୁଇଟି ଗୁରୁତ୍ୱପୂର୍ଣ୍ଣ ଖବର। ପ୍ରଥମେ, LPG e-KYC କରିବାର ଶେଷ ତାରିଖକୁ ତେଲ କମ୍ପାନୀଗୁଡ଼ିକ ଅଗଷ୍ଟ ୩୧ ପର୍ଯ୍ୟନ୍ତ ବଢ଼ାଇଛନ୍ତି। ଦ୍ୱିତୀୟରେ, ରକ୍ଷାବନ୍ଧନ ପୂର୍ବରୁ ରୋଷେଇ ଗ୍ୟାସ ସିଲିଣ୍ଡର ଦରରେ କୌଣସି ବୃଦ୍ଧି କରାଯାଇନାହିଁ। ଅର୍ଥାତ୍ ବର୍ତ୍ତମାନ ପୂର୍ବରୁ ଲାଗୁ ଥିବା ଦରରେ ହିଁ ସିଲିଣ୍ଡର ମିଳିବ। ଯଦି ଆପଣ ଏପର୍ଯ୍ୟନ୍ତ ବାୟୋମେଟ୍ରିକ କିମ୍ବା e-KYC କରିନାହାନ୍ତି, ତେବେ ଚିନ୍ତା କରିବାର ଆବଶ୍ୟକତା ନାହିଁ। IOCL, HPCL ଏବଂ BPCL ଭଳି ସରକାରୀ ତେଲ କମ୍ପାନୀଗୁଡ଼ିକ ଗ୍ରାହକଙ୍କୁ e-KYC କରିବା ପାଇଁ ଲଗାତାର ସୂଚନା ପଠାଉଛନ୍ତି। ଏହାର ଶେଷ ତାରିଖ ଅଗଷ୍ଟ ୩୧ ପର୍ଯ୍ୟନ୍ତ ବଢ଼ାଯାଇଛି।
ଅଗଷ୍ଟ ୩୧ ପରେ ବନ୍ଦ ହେବ କି ଗ୍ୟାସ ସପ୍ଲାଏ?
ନା, e-KYC ନକରିଲେ ଅଗଷ୍ଟ ୩୧ ପରେ ଗ୍ୟାସ ସିଲିଣ୍ଡର ସପ୍ଲାଏ ତୁରନ୍ତ ବନ୍ଦ ହେବ ନାହିଁ। LPG ଡିଲରମାନଙ୍କ ଅନୁସାରେ, e-KYC ଏକ ନିରନ୍ତର ପ୍ରକ୍ରିୟା ଏବଂ ଡେଡ୍ଲାଇନ ପରେ ମଧ୍ୟ ଏହା କରାଯାଇପାରିବ। ତେବେ e-KYC ନକରିଲେ ଗ୍ରାହକଙ୍କୁ ସବସିଡି ଦରରେ ସିଲିଣ୍ଡର ମିଳିବ କିମ୍ବା କମର୍ସିଆଲ ଦର ଲାଗୁ ହେବ, ସେନେଇ ପେଟ୍ରୋଲିୟମ ମନ୍ତ୍ରଣାଳୟର ଅନ୍ତିମ ନିଷ୍ପତ୍ତି ଆସିବା ବାକି ରହିଛି।
ଅଗଷ୍ଟ ୨୫ ତାରିଖରେ ଘରୋଇ ରୋଷେଇ ଗ୍ୟାସ ଦରରେ କୌଣସି ପରିବର୍ତ୍ତନ ହୋଇନାହିଁ। ସାରା ଦେଶରେ ଅଗଷ୍ଟ ୧ ତାରିଖରୁ ଲାଗୁ ହୋଇଥିବା ଦର ହିଁ ବର୍ତ୍ତମାନ ଜାରି ରହିଛି। ଅଗଷ୍ଟ ୧ରେ କମର୍ସିଆଲ LPG ସିଲିଣ୍ଡର ଦରରେ ପ୍ରାୟ ୨୦୦ ଟଙ୍କା ହ୍ରାସ ହୋଇଥିଲା।
ତେଣୁ ଏବେ LPG ଗ୍ରାହକଙ୍କ ପାଇଁ ଦୁଇଟି ଆଶ୍ୱସ୍ତିର ଖବରe-KYC ପାଇଁ ଡେଡ୍ଲାଇନ ବଢ଼ିଛି ଏବଂ ରୋଷେଇ ଗ୍ୟାସ ଦରରେ କୌଣସି ବୃଦ୍ଧି ହୋଇନାହିଁ।
