ପଟ୍ଟାଙ୍ଗି,୧୨।୨(ଶରତ କୁମାର ଧଳ): ଭାଲେଣ୍ଟାଇନ୍ ସପ୍ତାହ ଚାଲିଥିବା ବେଳେ ପ୍ରେମର ଏକ କରୁଣ ପରିଣତି ଦେଖିବାକୁ ମିଳିଛି। କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ପେଟୁରୁ ପଞ୍ଚାୟତରେ ଏକ ପ୍ରେମୀଯୁଗଳ ଗୋଟିଏ ଗଛର ଗୋଟିଏ ଡାଳରେ ଆତ୍ମହତ୍ୟା କରିଥିବା ଘଟଣା ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି।
ସୁଙ୍କି ଥାନା ଅନ୍ତର୍ଗତ ଉକ୍ତ ପଞ୍ଚାୟତର ମାଟାମ୍ ଜିଲ୍ଲା ଗୁଣ୍ଠା ଗ୍ରାମର ଆରୁଜୁ ସିନ୍ଦେରିଙ୍କ ପୁଅ ରବି ସିନ୍ଦେରି ଏବଂ ବଡାଗୁଡା ଗ୍ରାମର ବିରୁସୁ ସୋଡା ପେଲିଙ୍କ ନାବାଳିକା ଝିଅ ମେରି ସୋଡା ପେଲି ଦୁହିଁଙ୍କ ମୃତଦେହ ଦେଖିବାକୁ ମିଳିଥିଲା। ଗୁରୁବାର ସକାଳୁ ଝିଅର ଗ୍ରାମରେ ରହିଥିବା ପ୍ରାଥମିକ ବିଦ୍ୟାଳୟ ପଛ ପଟେ ଏକ ତେନ୍ତୁଳି ଗଛରେ ଓହଳି ଥିବା ଦେଖି ଗ୍ରାମବାସୀ ପ୍ରଥମେ ଭୟଭୀତ ହୋଇ ପଡି ଝିଅର ଘର ଲୋକଙ୍କୁ ଜଣାଇଥିଲେ। ଏହାପରେ ପୁଅ ଘରକୁ ମଧ୍ୟ ଖବର ଦେଇଥିଲେ। ଉଭୟ ପୁଅ ଝିଅ ପରିବାର ଘଟଣା ସ୍ଥଳେ ପହଞ୍ଚି ଦେଖିବାକୁ ପାଇଥିଲେ ଗୋଟିଏ ଗଛର ଗୋଟିଏ ଡାଳରେ ଦୁହେଁ ଓହଳି ପଡିଛନ୍ତି।
ସୂଚନା ଅନୁଯାୟୀ, ରବି ଓ ମେରିଙ୍କ ମଧ୍ୟରେ କିଛି ବର୍ଷ ଧରି ପ୍ରେମ ସମ୍ପର୍କ ରହିଥିଲା। ସେମାନେ ବିବାହ କରିବାକୁ ଚାହୁଁଥିଲେ ମଧ୍ୟ ପରିବାର ଏଥିରେ ରାଜି ହୋଇନଥିଲେ। ଏଥିସହ ରବି ପୂର୍ବରୁ ବିବାହିତ ଥିଲେ ଏବଂ ତାଙ୍କର ଏକ ସନ୍ତାନ ମଧ୍ୟ ରହିଛି। ପରିବାରର ବିରୋଧ ଏବଂ ପ୍ରେମରେ ବିଫଳତାକୁ ସହ୍ୟ ନକରି ପାରି ଉଭୟ ଏହି ଚରମ ପଦକ୍ଷେପ ନେଇଥିବା ଚର୍ଚ୍ଚା ହେଉଛି।
ଖବର ପାଇ ସୁଙ୍କି ଥାନା ଅଧିକାରୀ ଚତୁର୍ଭୁଜ ନାୟକ ସଦଳବଳେ ଘଟଣାସ୍ଥଳରେ ପହଞ୍ଚି ଶବ ଜବତ କରିଥିଲେ। ପରେ ପଟ୍ଟାଙ୍ଗି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ବ୍ୟବଚ୍ଛେଦ କରାଯାଇ ମୃତଦେହକୁ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି।
ନାବାଳିକା ବାପାଙ୍କ ଅଭିଯୋଗ କ୍ରମେ କେସ୍ ନଂ ୦୧/୨୬ ଏବଂ ପୁଅର ବାପାଙ୍କ ଅଭିଯୋଗ କ୍ରମେ କେସ୍ ନଂ ୦୨/୨୬ ରେ ପୃଥକ ମାମଲା ରୁଜୁ କରି ପୋଲିସ ଅଧିକ ତଦନ୍ତ ଜାରି ରଖିଛି। ପ୍ରେମ ସପ୍ତାହ ଶେଷ ହେବାକୁ ଆଉ ଦିନକ ବାକି ଥିବା ବେଳେ ଏଭଳି ଅଘଟଣ ଦୁଇଟି ଗ୍ରାମକୁ ସ୍ତବ୍ଧ କରିଦେଇଛି।