ନୂଆଦିଲ୍ଲୀ,୩୧।୧ : ହିଣ୍ଡନବର୍ଗ ରିପୋର୍ଟ ପ୍ରକାଶ ପାଇବା ପରେ ଏସିଆର ଅନ୍ୟତମ ଧନୀ ବ୍ୟକ୍ତି ଗୌତମ ଆଦାନୀ ବହୁ କ୍ଷତି ସହିଛନ୍ତି। ତାଙ୍କ ଗ୍ରୁପ କମ୍ପାନୀଗୁଡିକ ତିନି ଦିନ ମଧ୍ୟରେ ୩୪ ଶହ କୋଟି ଡଲାରର କ୍ଷତି କରିଛନ୍ତି। କେବଳ ଏତିକି ନୁହେଁ, ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସରେ ଗୌତମ ଆଦାନୀ ମଧ୍ୟ ଶ୍ରେଷ୍ଠ ଦଶ ଧନୀ ତାଲିକାରୁ ବାହାରି ଯାଇଛନ୍ତି।
ଆଦାନୀ ବିଲିୟନେୟାର ଇଣ୍ଡେକ୍ସରେ ୪ର୍ଥ ସ୍ଥାନରୁ ଏକାଦଶ ସ୍ଥାନକୁ ଖସି ଆସିଛନ୍ତି ଏବଂ ତାଙ୍କ ଗ୍ରୁପ କମ୍ପାନୀଗୁଡିକର ଅଂଶଧନ ହ୍ରାସ ପାଇବାରେ ଲାଗିଛି। ଅନୁମାନ କରାଯାଉଛି ଯେ ଶୀଘ୍ର ଗୌତମ ଆଦାନୀ ମଧ୍ୟ ଏସିଆର ସବୁଠାରୁ ଧନୀ ବ୍ୟକ୍ତିଙ୍କ ମାନ୍ୟତା ମଧ୍ୟ ହରାଇ ପାରନ୍ତି।
ଆଦାନୀଙ୍କ ନିଟ ସମ୍ପତ୍ତି ମୂଲ୍ୟ ୮୪.୪ ବିଲିୟନ ଡ଼ଲାରକୁ ଖସି ଆସିଛି। ସେ ବର୍ତ୍ତମାନ ରିଲାଏନ୍ସ ମାଲିକ ମୁକେଶ ଅମ୍ବାନୀଙ୍କଠାରୁ ମାତ୍ର ଗୋଟିଏ ସ୍ଥାନ ଉପରକୁ ଉଠିଛନ୍ତି। ଅମ୍ବାନୀଙ୍କ ମୋଟ ସମ୍ପତ୍ତି ମୂଲ୍ୟ ହେଉଛି ୮୨.୨ ବିଲିୟନ ଡଲାର ।
ସୂଚନାଯୋଗ୍ୟ,ଜାନୁୟାରୀ ୨୫ରେ, ହିଣ୍ଡନବର୍ଗ ଆଦାନୀ ଗ୍ରୁପ ସମ୍ବନ୍ଧରେ ୩୨,୦୦୦ ଶବ୍ଦର ଏକ ରିପୋର୍ଟ ପ୍ରକାଶ କରିଥିଲେ। ରିପୋର୍ଟର ଅନୁସନ୍ଧାନରେ ୮୮ଟି ପ୍ରଶ୍ନ ଅନ୍ତର୍ଭୁକ୍ତ ଥିଲା। ଏହି ରିପୋର୍ଟରେ ଦର୍ଶାଯାଇଛି ଯେ ଏହି ଗୋଷ୍ଠୀ ଦଶନ୍ଧି ଧରି ଷ୍ଟକ ମାନିପୁଲେଶନ ଏବଂ ଆକାଉଣ୍ଟ ଠକେଇରେ ଜଡିତ ଥିଲା। ରିପୋର୍ଟରେ କୁହାଯାଇଛି ଯେ ଶେୟାର ମୂଲ୍ୟ ବୃଦ୍ଧି ହେତୁ ତିନି ବର୍ଷ ମଧ୍ୟରେ ଆଦାନୀ ଗ୍ରୁପ ପ୍ରତିଷ୍ଠାତା ଗୌତମ ଆଦାନୀଙ୍କ ସମ୍ପତ୍ତି ୧ ବିଲିୟନ ଡ଼ଲାରରୁ ୧୨୦ ବିଲିୟନ ଡ଼ଲାରରେ ପହଞ୍ଚିଛି। ଏହି ଅବଧି ମଧ୍ୟରେ, ଗୋଷ୍ଠୀର ୭ ଟି କମ୍ପାନୀର ଶେୟାର ହାରାହାରି ୮୧୯ ପ୍ରତିଶତ ବୃଦ୍ଧି ପାଇଛି ।
