ପୁରୀ,୯।୧(ଅଜିତ୍ କୁମାର ମହାନ୍ତି): ସମ୍ପ୍ରତି ଶ୍ରୀମନ୍ଦିରରେ ଶ୍ରୀବିଗ୍ରହମାନଙ୍କ ପହିିଲି ଭୋଗ ନୀତି ଚାଲିଛି । ନିଷ୍ପତ୍ତି ଅନୁଯାୟୀ ରାତି ୨ଟା ପରଠାରୁ ଶ୍ରୀମନ୍ଦିର ଦ୍ୱାର ଖୋଲାଯାଇ ନୀତିକାନ୍ତି କରାଯିବା ସହ ରାତି ୧୧ଟାରେ ପହୁଡ଼ କରାଯିବା କଥା। ତେବେ ବୁଧବାର ରାତିରେ ଶ୍ରୀବିଗ୍ରହମାନଙ୍କ ରାତ୍ର ପହୁଡ଼ ହୋଇନାହିଁ । ନୀତିରେ ବିଳମ୍ବ ହେବାରୁ ରାତ୍ର ପହୁଡ଼ କରାଯାଇ ନ ଥିବା ସୂଚନା ମିଳିଛି । ବୁଧବାର ରାତି ୩ଟା ୧୫ରେ ସନ୍ଧ୍ୟାଧୂପ ସମ୍ପନ୍ନ ହେବା ପରେ ସମୟ ଅଭାବରୁ ବାକି ନୀତିଗୁଡ଼ିକ ଖଲଲ ବା ବାତିଲ କରାଯାଇଥିବା ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ବୁଧବାର ଶ୍ରୀବିଗ୍ରହଙ୍କ ବନକଲାଗି ନୀତି ରହିଥିଲା। ତେବେ ମହାପ୍ରଭୁଙ୍କ ସକାଳ ଧୂପ ସମ୍ପନ୍ନ ପରେ ଭକ୍ତମାନେ ଭିତରକାଠ ନିକଟରେ ଦର୍ଶନ କରୁଥିଲେ। ଏହି ସମୟରେ ଭିତର କାଠ ନିକଟରେ ବାନ୍ତି ପଡ଼ିଥିବା ଦେଖିବାକୁ ମିଳିଥିଲା। ଫଳରେ ବଡ଼ମହାସ୍ନାନ ନୀତି ଅନୁଷ୍ଠିତ ହୋଇଥିଲା। ଏଥିଯୋଗୁ ନୀତିରେ କିଛି ସମୟ ବିଳମ୍ବ ହୋଇଥିଲା। ସେହିପରି ବନକଲାଗି ମଧ୍ୟ ଅନୁଷ୍ଠିତ ହୋଇଥିଲା। ରାତି ୧୦ଟା ୧୫ରେ ବନକଲାଗି ନୀତି ଓ ୧୧.୧୦ରେ ମହାସ୍ନାନ ପୂଜା ଶେଷ ହୋଇଥିଲା।
ମଧ୍ୟରାତ୍ରି ୧.୨୦ରେ ସନ୍ଧ୍ୟା ଆଳତି, ୨.୧୦ରେ ସନ୍ଧ୍ୟାଧୂପ ଛେକ, ୨.୧୫ରେ ସନ୍ଧ୍ୟାଧୂପ ପୂଜା, ୩.୧୫ରେ ସନ୍ଧ୍ୟାଧୂପ ସରିଥିଲା। ସମୟ ଅଭାବରୁ ବାକି ନୀତିଗୁଡିକ ଖଲଲ କରାଗଲା ଅର୍ଥାତ ବାତିଲ କରାଗଲା ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଅପରପକ୍ଷରେ ରାତି ୩.୧୫ରେ ସନ୍ଧ୍ୟାଧୂପ ଶେଷ ହେବା ପରେ ଗୁରୁବାର ସକାଳ ୭ଟାରେ ମଙ୍ଗଳ ଆଳତି ହୋଇଥିଲା। କିନ୍ତୁ ବୁଧବାର ରାତ୍ର ପହୁଡ଼ କି ମହାପ୍ରଭୁଙ୍କ ବଡ଼ସିଂହାର ବେଶ ହୋଇ ନ ଥିଲା, ଯେଉଁଥିପାଇଁ ମହାପ୍ରଭୁ ଶ୍ରୀଜଗନ୍ନାଥ ରାତି ଅନିଦ୍ରା ରହିଥିଲେ। ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନ ଥିବାବେଳେ ଜଗନ୍ନାଥପ୍ରେମୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
