ଧୂଷୁରୀ,୫ା୧୧(ଦୀପ୍ତିରଞ୍ଜନ ନାୟକ): ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡ଼ିରେ ଥିବା ବାବା ଆଖଣ୍ଡଳମଣିଙ୍କ ଶିବଗଙ୍ଗା ପୁଷ୍କରିଣୀରେ ଶ୍ରଦ୍ଧାଳୁମାନେ ପବିତ୍ର କାର୍ତ୍ତିକ ପୂର୍ଣ୍ଣିମା ଅବସରରେ ଧର୍ମର ଡଙ୍ଗା ଭସାଇଛନ୍ତି। ଶହଶହ ସଂଖ୍ୟାରେ ଶ୍ରଦ୍ଧାଳୁ ନିଜ ଡଙ୍ଗାରେ ପାନ, ଗୁଆ, ଦୀପ, ଧୂପ ରଖି ଆ – କା- ମା – ବୈ କହି ଏହାକୁ ଭସାଇଥିଲେ। ଡଙ୍ଗା ଭସାଇ ସେମାନେ ପଞ୍ଚୁକ ବ୍ରତ ଭଙ୍ଗ କରିଥିଲେ।
ଶ୍ରଦ୍ଧାଳୁଙ୍କ ହରିବୋଲ, ହୁଳହୁଳି ଧ୍ବନିରେ ପୀଠ ମୁଖରିତ ହୋଇଥିଲା। ଭୋର୍ ୪.୩୦ରେ ବାବାଙ୍କ ମନ୍ଦିରର ପହୁଡ଼ ଖୋଲାଯାଇ ମଙ୍ଗଳ ଆଳତି କରାଯାଇଥିଲା ଓ ପୀଠରେ ଥିବା ଜଗନ୍ନାଥ ମନ୍ଦିରରେ ପୂର୍ଣ୍ଣ ଆଳତି ଦେଖି ଭକ୍ତମାନେ ଆନନ୍ଦିତ ହୋଇଥିଲେ। ଦିନ ତମାମ ପୀଠରେ ଭକ୍ତଙ୍କ ଭିଡ଼ ଜମିଛି। ସନ୍ଧ୍ୟାରେ ପ୍ରଭୁଙ୍କର ହରଗୌରୀ ବେଶ ଅନୁଷ୍ଠିତ ହେବ। ଏହି ବେଶ ଦେଖିଲେ ପୁଣ୍ୟ ମିଳିଥାଏ ବୋଲି ବିଭିନ୍ନ ଶାସ୍ତ୍ରରେ ଉଲ୍ଲେଖ ରହିଛି।