ଭୁବନେଶ୍ୱର,୩୦।୬: ବର୍ତ୍ତମାନ ସମୟରେ ଲୋକେ ସବୁଥିରେ ବୀମା କରିବାକୁ ଆଗ୍ରହ ପ୍ରକାଶ କରୁଛନ୍ତି। ଏହାଫଳରେ ସେମାନେ ସବୁ ସ୍ତରରେ ସୁରକ୍ଷିତ ହୋଇପାରିବେ, ହେଲେ ବେଳେ ବେଳେ ଏପରି ପରିସ୍ଥିତି ଆସେ ବୀମାର କିସ୍ତି ଜମା ଲାଗି ପଇସା ଯୋଗାଡ ହୋଇପାରେନିି। ଏପରି ପରିସ୍ଥିତିରେ ଉପଭୋକ୍ତାଙ୍କ ବୀମା ରଦ୍ଦ ହୋଇପାରେ। ବର୍ତ୍ତମାନ ବୀମା କିସ୍ତି ପୈଠ ପାଇଁ ମଧ୍ୟ ଋଣ ସୁବିଧା ମିଳୁଛି। ଉକ୍ତ ଋଣ ନେଇ ଗ୍ରାହକ ଜଣକ ବୀମା କିସ୍ତି ପୈଠ କରିପାରିବେ। ଭାରତୀୟ ବୀମା ବିନିୟାମକ ଏବଂ ବିକାଶ ପ୍ରାଧିକରଣ (ଆଇଆରଡିଏ) ଇନସ୍ୟୁରାନ୍ସ କରିଥିବା ଗ୍ରାହକଙ୍କ ଲାଗି ଖୁବ୍ଶୀଘ୍ର ଏଭଳି କିଛି ଖୁସିଖବର ଦେବାକୁ ଯାଉଛନ୍ତି। ଏଥିରେ ରିଟେଲ ଓ କର୍ପୋରେଟ ଉଭୟ ବୀମା ଗ୍ରାହକଙ୍କ ଲାଗି ପ୍ରିମିୟମ ଫାଇନାନ୍ସ ପ୍ରପୋଜାଲ ଆଣିବେ। ଲୋକେ ବୀମା ପ୍ରିମିୟମ ଥରକରେ ପୈଠ କରିଦିଅନ୍ତୁ ଓ ଏ ବାବଦ ଦେୟ କିସ୍ତିରେ ପୈଠ କରନ୍ତୁ ଏହା ଆଇଆରଡିଏଙ୍କ ଯୋଜନା ରହିଛି। ଏକା ଥରକେ ପୈଠ କରିବା ଅପେକ୍ଷା ଇଏମଆଇରେ ପୈଠ କରିବା ପ୍ରାୟତଃ ସରଳ ହୋଇଥାଏ। ତେବେ ଇନସ୍ୟୁରାନ୍ସ ପ୍ରିମିୟମ ପୈଠ ଲାଗି ଲୋନ ମିଳୁଥିଲେ ବି ଏହାର ଉପଯୋଗ ସେତେବେଳେ କରନ୍ତୁ ଯେତେବେଳେ ଏହା ଆପଣଙ୍କ ଲାଗି ନିତାନ୍ତ ଜରୁରୀ, ଅନ୍ୟଥା ବୀମା ଆପଣଙ୍କ ଲାଗି ମହଙ୍ଗା ହୋଇପାରେ କାରଣ ଇନସ୍ୟୁରାନ୍ସ କିସ୍ତି ପୈଠ ପାଇଁ ଋଣ ନେଉଥିଲେ ବି ଏଥିଲାଗି ଆପଣଙ୍କୁ ସବୁ ପ୍ରକାର ଚାର୍ଜ ପୈଠ କରିବାକୁ ପଡିଥାଏ ଯଥା ପ୍ରୋସେସିଂ ଚାର୍ଜରୁ ଆରମ୍ଭ କରି ସୁଧ ଓ ଜିଏସଟି ଆଦି ପୈଠ କରିବାକୁ ହୋଇଥାଏ। ଏଣୁ ବୀମା ମହଙ୍ଗା ହେବା ସ୍ବାଭାବିକ। କୌଣସି ବ୍ୟକ୍ତି ବୀମା କରିବା ଦ୍ୱାରା ପରିବାରର ଭବିଷ୍ୟତକୁ ନେଇ ନିଶ୍ଚିତ ହୋଇଯାଇଥାଏ। ଯଦି ବୀମା କରିଥିବା ବ୍ୟକ୍ତିଙ୍କର କିଛି ହୋଇଯାଏ ତେବେ ତାଙ୍କ ପରିବାର ଲୋକଙ୍କୁ ତାଙ୍କ ଅବର୍ତ୍ତମାନରେ କାହା ଉପରେ ନିର୍ଭର କରିବାକୁ ପଡେନି। ବୀମା ଲାଗି ପୂରା ଜୀବନ ପ୍ରତିବର୍ଷ କିଛି କିଛି ସଞ୍ଚୟ କରିବାକୁ ପଡିଥାଏ ଓ ଘଟଣା ଦୁର୍ଘଟଣାରେ ଏକକାଳୀନ ବୀମା ରାଶି ମିଳିଥାଏ।
