ମାଞ୍ଚେଷ୍ଟର,୩।୭(ଏପି): ୩୦ ବର୍ଷପରେ ଇଂଲିଶ୍ ପ୍ରିମିୟର ଲିଗ୍ ହାସଲ କରିଥିବା ଲିଭରପୁଲ ଏକ ବୃହତ୍ ପରାଜୟ ବରଣ କରିଛି। ଗୁରୁବାର ଖେଳାଯାଇଥିବା ଇଂଲିଶ୍ ପ୍ରିମିୟର ଲିଗ୍ର ଏକ ମ୍ୟାଚ୍ରେ ମାଞ୍ଚେଷ୍ଟର ସିଟି ୪-୦ରେ ଲିଭରପୁଲ୍କୁ ହରାଇଛି।
ଦୀର୍ଘ ୩ ଦଶନ୍ଧି ପରେ ଟାଇଟଲ ହାସଲ କରିଥିବାରୁ ଲିଭରପୁଲ୍କୁ ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ସିଟି ତରଫରୁ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା। ଏଥିରେ ଲିଭରପୁଲ୍ ଖେଳାଳି ଖୁସି ହୋଇଥିଲେ। ତେବେ ଏହା ବେଶି ସମୟ ତିଷ୍ଠି ନ ଥିଲା। ସିଟି ତରଫରୁ ଆକ୍ରମଣାତ୍ମକ ଖେଳି ପ୍ରଦର୍ଶନ କରାଯାଇଥିଲା। ସିଟି ତରଫରୁ ୨୫ ତମ ମିନିଟ୍ରେ ଡି କେଭିନ୍ ଡି ବ୍ରୁନେ ପ୍ରଥମ ଗୋଲ ସ୍କୋର କରି ଖାତା ଖୋଲିଥିଲେ। ଏହାପରେ ୩୫ତମ ମିନିଟ୍ରେ ରାହିମ ଷ୍ଟିର୍ଲିଂ ଓ ୪୫ତମ ମିନିଟ୍ରେ ଫିଲ୍ ଫୋଡେନ ଗୋଲ ସ୍କୋର କରିଥିଲେ। ଶେଷରେ ଲିଭରପୁଲ୍ ତରଫରୁ ୬୬ତମ ମିନିଟ୍ରେ ଓକ୍ସଲାଡ- ଚାମ୍ବରଲାନଙ୍କ ଆତ୍ମଘାତୀ ଗୋଲ ବଳରେ ସିଟି ୪-୦ରେ ବିଜୟୀ ହୋଇଥିଲା। ଷ୍ଟିର୍ଲିଂଙ୍କ ଲୋ- ଡ୍ରାଇଭ୍ ଚାମ୍ବରଲେନ୍ଙ୍କ ଦ୍ୱାରା ସ୍ଲାଇଡ୍ ହୋଇଥିଲା ଓ ଲିଭରପୁଲ୍ ନେଟ୍ସ ଭିତରକୁ ବଲ୍ ଚାଲିଯାଇଥିଲା। ତେବେ ଏହି ପରାଜୟ କୌଣସି ଫରକ ଆଣିବ ନାହିଁ। ୩୨ଟି ମ୍ୟାଚ୍ ଖେଳି ଲିଭରପୁଲ ୮୬ ପଏଣ୍ଟ ହାସଲ କରିଛି ଓ ଗତ ସପ୍ତାହରେ ଚାମ୍ପିୟନ ଘୋଷିତ ହୋଇସାରିଛି। ୭ଟି ଗେମ୍ ବାକିଥାଇ ଲିଭରପୁଲ ସର୍ବାଧିକ ପଏଣ୍ଟ ହାସଲ କରି ଚାମ୍ପିୟନ ଘୋଷିତ ହୋଇଥିଲା। ଟାଇଟଲ ହାସଲରୁ ଅଳ୍ପକେ ବଞ୍ଚିତ ହୋଇଥିବା ସିଟି ୩୨ ମ୍ୟାଚ୍ ଖେଳି ୬୬ ପଏଣ୍ଟ ହାସଲ କରିବା ସହ ଦ୍ୱିତୀୟ ସ୍ଥାନରେ ରହିଛି। ଗତ ଦୁଇବର୍ଷ ହେବ ସିଟି ଟାଇଟଲ ହାସଲ କରି ଆସୁଥିଲା।
