ପଦ୍ମପୁର,୧୪ା୧(ପ୍ରଦୀପ୍ତ ଦାଶ): ଜାନୁଆରୀରେ ବିଭାଜନ ସ୍ତରୀୟ ପାଣି ପଞ୍ଚାୟତ ପାଳନ ହେଉଛି। ଏ ନେଇ ବହୁ ଆଡମ୍ବରରେ ସଚେତନତା ସଭା ମଧ୍ୟ ଆୟୋଜନ ହେଉଛି। ହେଲେ ଫଳ ଶୂନ। କାରଣ ବିଗତ ବର୍ଷ ଅବସ୍ଥା ଯାହା ଥିଲା ଏବେ ବି ତାହା ରହିଛି। କେବଳ ସରକାରଙ୍କ ନିର୍ଦ୍ଦେଶକୁ ପାଳନ କରିବା ପାଇଁ ପଦ୍ମପୁର କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ଏହି ଦିବସ ପାଳନ କରାଯାଇଛି ବୋଲି ଚାଷୀମାନେ ଅଭିଯୋଗ କରୁଛନ୍ତି। ଚାଷୀମାନେ ହେଲେ ପାଣିପଞ୍ଚାୟତର ମୁଖ୍ୟ ଅଙ୍ଗ। ସେମାନଙ୍କ ମାଧ୍ୟମରେ ସମନ୍ବିତ ଭାବେ ସୁଷମ ଜଳ ପରିଚାଳନ କରିବା ହିଁ ଏହି ପଞ୍ଚାୟତର ମୁଖ୍ୟ ଲକ୍ଷ୍ୟ। ଜଳ ସଂରକ୍ଷଣ, ଉତ୍ତମ ବଣ୍ଟନ ଓ ଅଧିକ ଉତ୍ପାଦନ ଉଦ୍ଦେଶ୍ୟରେ କୃଷକଙ୍କୁ ସଂଘଟିତ କରି ପାଣି ପଞ୍ଚାୟତ ଗଠନ ହୋଇଥିବା ବେଲେ ପଦ୍ମପୁର କ୍ଷୁଦ୍ର ଜଳସେଚନ ବିଭାଗରେ ଏହି ପାଣି ପଞ୍ଚାୟତ କମିଟିମାନଙ୍କୁ ପଙ୍ଗୁ କରିଦିଆଯାଇଥିବା ଦେଖବାକୁ ମିଲିଛ। ଏକଦା ଓଡ଼ିଶାର କ୍ଷୁଦ୍ର ଜଳସେଚନ ବିଭାଗ ମଧ୍ୟରେ ପଦ୍ମପୁର ଡିଭିଜନର ନାମ ଥିବା ବେଳେ ଅପାରଗ ଯନ୍ତ୍ରୀମାନଙ୍କ ପାଇଁ ଚାଷୀମାନେ ଜଳସେଚନ ସୁବିଧାରୁ ବଞ୍ଚିତ ରହୁଛନ୍ତି। ପ୍ରତ୍ୟେକ ବର୍ଷ କେନାଲ ସଫେଇ ଓ ମରାମତି ଆଳରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଉଥିଲେ ମଧ୍ୟ ତାହା ଠିକ୍ ଭାବେ କାର୍ଯ୍ୟକାରୀ ହେଉନାହିଁ ବୋଲି ଚାଷୀ ମହଲରେ ଅଭିଯୋଗ ହେଉଛି। ତେଣୁ ପଦ୍ମପୁର କ୍ଷୁଦ୍ର ଜଳସେଚନ ଅଧୀନରେ ଥିବା ସମସ୍ତ କେନାଲର ମରାମତି କରାଯିବା ସହିତ ପ୍ରତେକ ଚାଷୀ ଯେପରି କେନାଲ ପାଣିରୁ ଉପକୃତ ହେବେ ସେଥିପ୍ରତି ଦୃଷ୍ଟି ଦେବା ଆବଶ୍ୟକ ବୋଲି ଚାଷୀମାନେ ଦାବି କରିଛନ୍ତି। ନଚେତ ପାଣି ପଞ୍ଚାୟତ ପକ୍ଷ ପାଳନ କରିବା ଧର୍ମକୁ ଆଖିଠାର ବୋଲି ଚାଷୀ ମହଲରେ ଚର୍ଚ୍ଚା ଚାଲିଛି।
