ଭୋପାଳ,୨୭।୪: ମଧ୍ୟ ପ୍ରଦେଶ ସରକାର ଜଙ୍ଗଲରେ ବାଘଙ୍କ ସୁରକ୍ଷା ପାଇଁ ଅଗ୍ନିବୀରଙ୍କ ଭଳି ଜଙ୍ଗଲବୀରଙ୍କୁ ଭର୍ତ୍ତି କରିବାକୁ ଯୋଜନା କରୁଛନ୍ତି। ଏହି ପ୍ରସ୍ତାବ ରାଜ୍ୟ ସରକାରଙ୍କ ନିକଟରେ ବିଚାରାଧିନ ରହିଛି। ଏହାକୁ ଖୁବଶୀଘ୍ର ଅନ୍ତିମ ରୂପ ଦିଆଯିବ। ଏହି ପ୍ରସ୍ତାବ ଅନୁଯାୟୀ, ମଧ୍ୟ ପ୍ରଦେଶର ନ୍ୟାଶନାଲ ପାର୍କ, ଟାଇଗର ରିଜର୍ଭ ଓ ଓ୍ବାଇଲଡ ଲାଇଫ ସେଂଚୁରୀରେ ଏହାର ଆଖପାଖ ଅଞ୍ଚଳରେ ରହୁଥିବା ଲମ୍ବା ଚଉଡା ୧୮-୨୧ ବର୍ଷ ବୟସର ଯୁବକଙ୍କୁ ଚୟନ କରାଯିବ। ଚୟନ ପରେ ସେଠାରେ ଏମାନଙ୍କୁ ପ୍ରଶିକ୍ଷଣ ଦିଆଯିବ। ଟ୍ରେନିଂ ପରେ ଏହି ଯୁବକମାନଙ୍କୁ ଜଙ୍ଗଲବୀର ଭାବେ ପରିଚୟ ମିଳିବ। ଏଥିପାଇଁ ବନ ବିଭାଗରେ ଫରେଷ୍ଟ ଗାର୍ଡଙ୍କଠାରୁ ଭିନ୍ନ ଏକ କ୍ୟାଡର କରାଯିବ।
ଏହି ଯୋଜନା ମାଧ୍ୟମରେ ପ୍ରତିବର୍ଷ ପ୍ରାୟ ୭୦୦-୧୦୦୦ ଜଙ୍ଗଲବୀରଙ୍କୁ ନିଯୁକ୍ତି ମିଳିପାରେ। ଏମାନଙ୍କ ବେତନ ଭାବେ ପ୍ରତିମାସରେ ୨୫ ହଜାର ଟଙ୍କା ଦିଆଯିବ। ଏହା ଫିକ୍ସ ରହିବ। ପାଞ୍ଚ ବର୍ଷ ପରେ ଏମାନଙ୍କ ମଧ୍ୟରୁ ୨୫-୫୦ ପ୍ରତିଶତ ବାଘ ରକ୍ଷକଙ୍କୁ ସ୍ଥାୟୀ ଫରେଷ୍ଟ ଗାର୍ଡ କରିଦିଆଯିବ। ଶିବରାଜ ସିଂ ଚୌହାନ ସରକାର ଏହି ଯୋଜନାର ଘୋଷଣା ବିଧାନସଭା ନିର୍ବାଚନର ଠିକ ପୂର୍ବରୁ କରିପାରନ୍ତି। ଭର୍ତ୍ତି ପାଇଁ ଶାରୀରିକ ମାପଦଣ୍ଡ ଓ ବ୍ୟବହାରକୁ ଅଧିକ ଗୁରୁତ୍ୱ ଦିଆଯିବ, ଏହି ପଦ ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତା ଦ୍ୱାଦଶ ପାସ ହୋଇପାରେ।
