ଚିତ୍ରଡ଼ା,୧୮।୯(ଡି.ଏନ.ଏ): ମୟୂରଭଞ୍ଜ ଜିଲା ରାସଗୋବିନ୍ଦପୁର ବନାଞ୍ଚଳରେ ହାତୀ ଆତଙ୍କ ଥମିବାର ନାଁ ଧରୁନି। ପୁଣି ହାତୀ ପାଇଁ ଜଣେ ବାଳକଙ୍କ ଜୀବନ ଯାଇଛି। ମୃତକ ହେଲେ ରାସଗୋବିନ୍ଦପୁର ଥାନା ଅଧୀନ ନଳଗଜା ପଞ୍ଚାୟତ ଉପର ମଧୁରିଆ ଗ୍ରାମର ଫାତାଇ ମୁର୍ମୁଙ୍କ ପୁଅ ଚନ୍ଦନ(୧୨)।
ମିଳିଥିବା ସୂଚନା ଅନୁଯାୟୀ, ଶୁକ୍ରବାର ବିଳମ୍ବିତ ରାତିରେ ୨ଟି ହାତୀ ଖାଦ୍ୟ ଅନ୍ବେଷଣରେ ଉପର ମଧୁରିଆ ଗ୍ରାମରେ ପଶିଥିଲେ। ପରେ ହାତୀ ଦ୍ୱୟ ଫାତାଇଙ୍କ ଘର କାନ୍ଥ ଭାଙ୍ଗି ଦେଇଥିଲେ। ଏହା ଜାଣିି ଫାତାଇ ଏବଂ ତାଙ୍କ ସ୍ତ୍ରୀ ଭୟରେ ବାହାରକୁ ଦୌଡ଼ି ଆସିଥିଲେ। ହେଲେ ଚନ୍ଦନ କାନ୍ଥ ତଳେ ଚାପିହୋଇ ଘର ଭିତରେ ରହିଯାଇଥିଲେ। ହାତୀକୁ ଘଉଡାଇ ଦେଖିଲା ବେଳକୁ ଚନ୍ଦନଙ୍କ ମୃତ୍ୟୁ ହୋଇଯାଇଥିଲା। ଖବର ପାଇ ବନ ବିଭାଗ ସହ ପୋଲିସ କର୍ମଚାରୀ ପହଞ୍ଚି ମୃତଦେହ ଜବତ କରିଥିଲେ। ମୃତଦେହ ବ୍ୟବଚ୍ଛେଦ ପାଇଁ ମେଡିକାଲକୁ ପଠାଯାଇଛି।
