କେନ୍ଦୁଝର,୧୫।୧୧(ସ୍ବ.ପ୍ର): କେନ୍ଦୁଝର ସଦର ବ୍ଲକ ପଳାଶପଙ୍ଗ-ବାମେବାରୀ ରାସ୍ତାରେ ଲୁହାପଥର ବୋଝେଇ ଟ୍ରକ୍, ଟ୍ରେଲର ଆଦି ଭାରୀଯାନ ଚଳାଚଳ କରୁଛି। ଧୂଳି ଉଡ଼ି ବାୟୁମଣ୍ଡଳ ପ୍ରଦୂଷିତ ହେବା ସହ ରାସ୍ତା ଭାଙ୍ଗି ବିପଦପୂର୍ଣ୍ଣ ଅବସ୍ଥାରେ ରହିଛି। ପ୍ରଦୂଷଣ ଯୋଗୁ ରାସ୍ତାପାର୍ଶ୍ୱରେ ବସବାସ କରୁଥିବା ଗ୍ରାମର ଲୋକେ ଅକଥନୀୟ ଯନ୍ତ୍ରଣା ଭୋଗୁଛନ୍ତି। ଏହାକୁ ନେଇ ପୁଞ୍ଜିଭୂତ ଜନଅସନ୍ତୋଷ ବୃଦ୍ଧି ପାଇବାରେ ଲାଗିଛି। ପ୍ରଦୂଷଣ ରୋକିବା ପାଇଁ କଣ୍ତରାପଶି ପଞ୍ଚାୟତର ସରପଞ୍ଚ ସାବିତ୍ରୀ ନାଏକ ଏବଂ ୱାର୍ଡମେମ୍ବରଙ୍କ ସମେତ ଗ୍ରାମବାସୀ ସୋମବାର ଜିଲାପାଳ ଆଶିଷ ଠାକ୍ରେଙ୍କୁ ଚିଠି ଲେଖିଛନ୍ତି। ୭ ଦିନ ମଧ୍ୟରେ ସମାଧାନ ନ ହେଲେ ବାଧ୍ୟହୋଇ ଆନ୍ଦୋଳନକୁ ଓହ୍ଲାଇବେ ବୋଲି ସେମାନେ ଚେତାବନୀ ଦେଇଛନ୍ତି।
ଖଣିଖାଦାନ ଯୋଡ଼ା ଅଞ୍ଚଳକୁ ସଂଯୋଗ କରିଥିବା ଏହି ରାସ୍ତା ବିପଦପୂର୍ଣ୍ଣ ଅବସ୍ଥାରେ ଥିବାବେଳେ ନିୟମିତ ମରାମତି ହେଉ ନ ଥିବାରୁ ଲୋକେ ଯିବାଆସିବା କରିବାରେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ବିଶେଷକରି ବହୁ ସଂଖ୍ୟାରେ ଲୁହାପଥର ବୋଝେଇ ଟ୍ରକ୍, ଟ୍ରେଲର ଆଦି ଯାତାୟାତ ଯୋଗୁ ଶବ୍ଦ, ବାୟୁ ଓ ପରିବେଶ ପ୍ରଦୂଷିତ ହେଉଛି। ପ୍ରଦୂଷଣ ଯୋଗୁ ଲୋକେ ଶ୍ୱାସଜନିତ ରୋଗରେ ଆକ୍ରାନ୍ତ ହେବା ସହ ଜଳାଶୟ, ଘର, ବାଡ଼ି ବଗିଚା, ଚାଷଜମି ଆଦି କ୍ଷତିଗ୍ରସ୍ତ ହେଉଛି। ସେହିପରି ରାସ୍ତା ଖରାପ ହେବାରୁ ଗାଡ଼ି ଚଳାଚଳରେ ସମସ୍ୟା ଦେଖାଦେଉଛି।
