ନୂଆଦିଲ୍ଲୀ,୩।୯(ପି.ଟି.): ଭାରତୀୟ ଯୁବ ବ୍ୟାଟ୍ସମ୍ୟାନ ଲୋକେଶ ରାହୁଲଙ୍କୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଫ୍ରାଞ୍ଚାଇଜ୍ କିଙ୍ଗ୍ସ ଇଲେଭେନ୍ ପଞ୍ଜାବର ଅଧିନାୟକ ନିଯୁକ୍ତ କରାଯାଇଛି। ପ୍ରଥମଥର ପାଇଁ ତାଙ୍କ ଏଭଳି ଏକ ହାଇପ୍ରୋଫାଇଲ ଦଳରେ ନେତୃତ୍ୱ ପ୍ରଦାନ କରାଯାଇଛି। ନୂଆ ଦାୟିତ୍ୱ ନେଇ ସେ ବେଶ୍ ଉତ୍ସାହିତ ଅଛନ୍ତି। ବିରଟ୍ କୋହଲି, ମହେନ୍ଦ୍ର ସିଂ ଧୋନୀ ଓ ରୋହିତ ଶର୍ମାଙ୍କଠାରୁ ନେତୃତ୍ୱ ନେବାର କଳା ଶିକ୍ଷା କରିଛି ବୋଲି ରାହୁଲ କହିଛନ୍ତି। ଗତ ୧୦ ବର୍ଷ ମଧ୍ୟରେ ଏହି କ୍ରିକେଟରମାନେ ପ୍ରେରଣାଦାୟୀ ସାବ୍ୟସ୍ତ ହୋଇଛନ୍ତି। ଏହି ମହାନ ଖେଳାଳିଙ୍କ ନେତୃତ୍ୱରେ ଖେଳି ବହୁତ କିଛି ଶିକ୍ଷା କରିଛି ବୋଲି ସେ କହିଛନ୍ତି।
କୋହଲି ଓ ଧୋନୀଙ୍କ ମଧ୍ୟରେ ବହୁତ ଫରକ ରହିଛି। ଦଳକୁ ଏମାନେ ଭିନ୍ନ ଢଙ୍ଗରେ ନେତୃତ୍ୱ ପ୍ରଦାନ କରିଥାନ୍ତି। କିନ୍ତୁ ଦଳ ପ୍ରତି ଉଭୟଙ୍କର ଭଲ ପାଇବା ଓ ଅଙ୍ଗୀକାରବଦ୍ଧତା ପ୍ରାୟ ସମାନ ବୋଲି ସେ କହିଛନ୍ତି। ଦୁହେଁ ଦଳକୁ ଏକାଠି ରଖିବା ସହ ବିଜୟୀ ହେବାକୁ ଚାହିଁଥାନ୍ତି। ଏହି ଆଭିମୁଖ୍ୟକୁ ଗ୍ରହଣ କରିବା ସହ ଏହାର ବ୍ୟବହାର କରିବାକୁ ଚାହେଁ। ଆଗରେ ରହି ଦଳକୁ ଦୃଢ ନେତୃତ୍ୱ ପ୍ରଦାନ କରିବାକୁ ଚାହେଁ ବୋଲି ସେ କହିଛନ୍ତି। ଏପରିକି ପ୍ରତିପକ୍ଷ ଦଳର ଅଧିନାୟକଙ୍କଠାରୁ ମଧ୍ୟ ଶିକ୍ଷା କରିବାର ଆବଶ୍ୟକତା ରହିଛି। ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମାଙ୍କଠାରୁ ବହୁତ କିଛି ଶିକ୍ଷା କରିଛି। ୨୦୧୮ ଏସିଆ କପ୍ରେ ମଧ୍ୟ ରୋହିତ ଦଳର ନେତୃତ୍ୱ ନେଇଥିଲେ।
ଅଧିନାୟକ ଭାବେ କେନ୍ ଓ୍ବଲିୟମସନଙ୍କଠାରୁ ମଧ୍ୟ ବହୁତ କିଛି ଶିକ୍ଷା କରାଯାଇପାରିବ ବୋଲି ସେ କହିଛନ୍ତି। ଆଇପିଏଲ୍ରେ ଓପନିଂ ବ୍ୟାଟିଂ କରିବା ସହ ଉଇକେଟକିପିଙ୍ଗ୍ କରି ରଣନୀତି ପ୍ରସ୍ତୁତ କରିବାର ଗୁରୁଦାୟିତ୍ୱ ରାହୁଲଙ୍କ ଉପରେ ରହିଛି। ଏହା ଏକ ବଡ଼ ଚ୍ୟାଲେଞ୍ଜ୍ ହୋଇଥିଲେ ମଧ୍ୟ ରାହୁଲ ଏହି ଦାୟିତ୍ୱ ନେବାକୁ ବେଶ୍ ଉତ୍ସାହିତ ଅଛନ୍ତି। ନେତୃତ୍ୱକୁ ଉପଭୋଗ କରିବାକୁ ଚାହେଁ। ହେଡ୍ କୋଚ୍ ଅନିଲ କୁମ୍ବଲେ ସହ କାର୍ଯ୍ୟକରିବାର ସୁଯୋଗ ମିଳିବା ଏକ ବଡ଼କଥା। ତାଙ୍କର ବହୁତ ଅଭିଜ୍ଞତା ରହିଛି ବୋଲି ସେ କହିଛନ୍ତି। ଦଳର ଭଲ ପ୍ରଦର୍ଶନ ନେଇ ସେ ଆଶାବାଦୀ ଅଛନ୍ତି। ଦୁବାଇ, ଆବୁଧାବି ଓ ଶାରଜା ପିଚ୍ଗୁଡିକ ମନ୍ଥର ହେବ। ତେଣୁ ସବୁ ଦଳ ସେହିଅନୁସାରେ ପ୍ରସ୍ତୁତି କରିଥିବେ ବୋଲି ସେ କହିଛନ୍ତି।
