ନୂଆଦିଲ୍ଲୀ: ତାମିଲନାଡୁର ଘରୋଇ କ୍ଷେତ୍ର ଲକ୍ଷ୍ମୀବିଳାସ ବ୍ୟାଙ୍କରୁ ଉଠାଣ ଉପରେ କେନ୍ଦ୍ର ସରକାର କଟକଣା ଲଗାଇଛନ୍ତି। ସରକାର ଏବେ ଏହି ବ୍ୟାଙ୍କକୁ ମୋରାଟୋରିୟମ ପରିସରରେ ରଖିଛନ୍ତି। ଏହାର ଗ୍ରାହକ ଡିସେମ୍ବର ୧୬ ଯାଏ ମାସିକ ୨୫ ହଜାର ଟଙ୍କା ଉଠାଣ କରିପାରିବେ ବୋଲି ଅର୍ଥମନ୍ତ୍ରଣାଳୟ ପକ୍ଷରୁ ମଙ୍ଗଳବାର ସ୍ପଷ୍ଟ କରାଯାଇଛି। ମାତ୍ର ଚିକିତ୍ସା, ଉଚ୍ଚ ଶିକ୍ଷା ପେମେଣ୍ଟ ଏବଂ ବିବାହ ଭଳି ଖର୍ଚ୍ଚ ଲାଗି ଲୋକମାନେ ରିଜର୍ଭ ବ୍ୟାଙ୍କର ଅନୁମତି ନେଇ ୨୫ ହଜାର ଟଙ୍କାରୁ ଉର୍ଦ୍ଧ୍ୱ ଅର୍ଥ ଉଠାଇ ପାରିବେ। ବ୍ୟାଙ୍କର ଆର୍ଥତ୍କ ସ୍ଥିତି ବର୍ତ୍ତମାନ ବିଗିଡିଛି। ରିଜର୍ଭ ବ୍ୟାଙ୍କର ପରାମର୍ଶ କ୍ରମେ ସରକାର ଏଭଳି ପଦକ୍ଷେପ ହାତକୁ ନେଇଛନ୍ତି। ଜମାକାରୀଙ୍କ ସ୍ବାର୍ଥକୁ ନଜରରେ ରଖି ବ୍ୟାଙ୍କର ଆର୍ଥତ୍କ ସ୍ଥିରତା ଲାଗି ଏଭଳି କାର୍ଯ୍ୟାନୁଷ୍ଠାନ ନିଆଯାଇଥିବା ରିଜର୍ଭ ବ୍ୟାଙ୍କ ଅନ୍ୟ ଏକ ସ୍ପଷ୍ଟୀକରଣରେ କହିଛି। ଏହି ବ୍ୟାଙ୍କର ପୁନରୁଦ୍ଧାର ଲାଗି ସରକାରଙ୍କ ନିକଟରେ ବର୍ତ୍ତମାନ ଯାଏ ଭରଷାଯୋଗ୍ୟ ଯୋଜନା ନାହିଁ। ଏହାକୁ ଧ୍ୟାନରେ ରଖି କେନ୍ଦ୍ରୀୟ ବ୍ୟାଙ୍କ ବାଧ୍ୟ ହୋଇ ମୋରାଟୋରିୟମ ଦ୍ୱାରା ଉଠାଣ କଟକଣା ଜାରି କରିଛି। ଆସେଟ୍ କ୍ୱାଲିଟି ବା ସମ୍ପତ୍ତି ଗୁଣବତ୍ତା ଖରାପ ହେବା ଯୋଗୁ ବ୍ୟାଙ୍କ ନିକଟରେ ଆବଶ୍ୟକ ମୁତାବକ ଜରୁରୀକାଳିନ ପୁଞ୍ଜି ନାହିଁ। ବ୍ୟାଙ୍କକୁ ନୂଆ ଅର୍ଥ ଯୋଗାଣ ଏବଂ ମିଶ୍ରଣ ଲାଗି ଏହା କ୍ଲିକ୍ସ କ୍ୟାପିଟାଲ ସହ ଆଲୋଚନା କରିଥିବା ମଧ୍ୟ ଜଣାପଡିଛି। ଇଣ୍ଡିଆ ବୁଲ୍ସ ଫାଇନାନ୍ସ ସହ ମିଶ୍ରଣ ନେଇ ରହିଥିବା ପ୍ରସ୍ତାବକୁ ରିଜର୍ଭ ବ୍ୟାଙ୍କ ଅଗ୍ରାହ୍ୟ କରିବା ପରେ ଏହି ବ୍ୟାଙ୍କର ସମସ୍ୟା ୨୦୧୯ରେ ବଢି ଯାଇଥିଲା। ବ୍ୟାଙ୍କ କୌଣସି ନଗଦ ସମସ୍ୟା ସାମ୍ନା କରୁନାହିଁ ବୋଲି ଗତ ମାସରେ ଏହାର ପ୍ରତିଷ୍ଠାତା କେ.ଆର୍. ପ୍ରଦୀପ ବ୍ଲୂମବର୍ଗକୁ କହିଥିଲେ। ନଗଦ ଅନୁପାତ ଆବଶ୍ୟକତା ସୀମାଠାରୁ ଅଧିକ ରହିଥିବା ସେ ସ୍ପଷ୍ଟୀକରଣ ଦେଇଥିଲେ। ବ୍ୟାଙ୍କର ସମସ୍ୟା ସମାଧାନ ଲାଗି ସେପ୍ଟେମ୍ବର ମାସରେ କେନ୍ଦ୍ରୀୟ ବ୍ୟାଙ୍କ ମିତା ମଖନଙ୍କ ଅଧ୍ୟକ୍ଷତାରେ ୩ ଜଣିଆ କମିଟି ବସାଇଥିଲା। ହେଲେ ସମସ୍ୟାରେ କୌଣସି ସୁଧାର ନ ଆସିବାରୁ ବାଧ୍ୟ ହୋଇ ରିଜର୍ଭ ବ୍ୟାଙ୍କ ଉଠାଣ ଉପରେ କଟକଣା ଲଗାଇଛି।
