ସୋନପୁର,୧୧।୪(ନି.ପ୍ର.): ମନ୍ଦିରମାଳିନୀ ତଥା ଐତିହ୍ୟ ସମ୍ପନ୍ନ ସୁବର୍ଣ୍ଣପୁର ଜିଲାରେ ରହିଛି ଶତାଧିକ ଏକର ଦୋବୋତ୍ତର ଜମି। ଏହି ସବୁ ଜମି ଜିଲା ସଦର ମହକୁମା ସମେତ ଗ୍ରାମାଞ୍ଚଳରେ ଦେବାଦେବୀଙ୍କ ନାମରେ ରହିଛି। ବିଭିନ୍ନ ମନ୍ଦିରର ସେବାୟତଙ୍କ ନାମରେ ମଧ୍ୟ ଶତାଧିକ ଏକର ମୂଲ୍ୟବାନ ଜମିଅଛି। ଗଡଜାତ ଅମଳରେ ରାଜାମାନେ ଦେବାଦେବୀଙ୍କ ଦୈନିକ ରୀତିନୀତି, ବଳୀଯାତ୍ରା ଓ ସେବା କାର୍ଯ୍ୟ ପାଇଁ ସେବାୟତଙ୍କୁ ମୂଲ୍ୟବାନ ଜମି ଦେଇଥିଲେ। ଏହି ସବୁ ଜମିକୁ ସେବାୟତମାନେ ଭୋଗ ଦଖଲ କରି ଆସୁଛନ୍ତି। ଅନ୍ୟ ସବୁ ଜମିର ଆୟରୁ ମହାପ୍ରଭୁଙ୍କ ପାଖରେ ଭୋଗ ଲାଗିଥାଏ। କିନ୍ତୁ ଏବେ ଦେବୋତ୍ତର ବିଭାଗର ଅଧିକାଂଶ ଜମି ଜବରଦଖଲକାରୀଙ୍କ କବ୍ଜାରେ ରହିଛି । ଆଉ କିଛି ଜମିକୁ ସେବାୟତମାନେ ଚଞ୍ଚକତା କରି ବିକ୍ରି କରିଛନ୍ତି। ଏହି ଜମି କୌଣସିମତେ ବିକ୍ରି ହୋଇ ପାରିବ ନାହିଁ ବୋଲି ନିୟମ ଥିଲେ ମଧ୍ୟ କେତେକ ତହସିଲଦାରଙ୍କ କାରଣରୁ ପୂର୍ବରୁ ଜମି ବେଆଇନଭାବେ ବିକ୍ରି ହୋଇଛି।
ସୂଚନା ଅନୁଯାୟୀ ସୁବର୍ଣ୍ଣମେରୁ ମନ୍ଦିର ପାଇଁ ୭୫.୦୮୪ ଏକର, ସୁରେଶ୍ୱରୀ ମନ୍ଦିର ପାଇଁ ୭.୪୨ ଏକର, ସମଲେଇ ମନ୍ଦିର ପାଇଁ ୧୭୨.୯୩୯ ଏକର, ବୃନ୍ଦାବନ ବିହାରୀ ମନ୍ଦିର ପାଇଁ ୩୦ ଏକର, ମାଣିକେଶ୍ୱରୀ ମନ୍ଦିର ପାଇଁ ୧୧.୯୮୦ ଏକର, ବୈଦ୍ୟନାଥର କୁଶଳେଶ୍ୱର ମହାଦେବଙ୍କ ପାଇଁ ୫.୭୭୦ ଏକର ଜମି ରହିଛି। ବିନିକା ବ୍ଲକର ସକ୍ମା ଗ୍ରାମରେ ଶତାଧିକ ଏକ ଜମି ସେବାୟତଙ୍କୁ ଦିଆଯାଇଛି। କିନ୍ତୁ ମନ୍ଦିରଗୁଡିକର ଏତେ ଜମି ଥିଲେ ମଧ୍ୟ ଦେବାଦେବୀଙ୍କ ପାଖରେ ଭୋଗ ଲଗାଇବା ପାଇଁ ଟଙ୍କା ନାହିଁ। ଦେବୋତ୍ତର ବିଭାଗ ମାସକୁ ଜଗନ୍ନାଥ ମନ୍ଦିର ପାଇଁ ୧ହଜାର ୨୦୦ଟଙ୍କା, ବୈଦ୍ୟନାଥ ମନ୍ଦିର ପାଇଁ ୩୦୦ଟଙ୍କା, ବୃନ୍ଦାବନ ବିହାରୀ ମନ୍ଦିର ପାଇଁ ୮୦୦ଟଙ୍କା ଓ ହନୁମାନ ମନ୍ଦିର ପାଇଁ ୫୦୦ଟଙ୍କା ଦେଉଛନ୍ତି। ଏତିକି ଟଙ୍କାରେ ଦେବାଦେବୀଙ୍କ ଗୋଟିଏ ବେଳା ଭୋଗ ପ୍ରସ୍ତୁତ ମଧ୍ୟ କଷ୍ଟ ହୋଇପଡୁଛି। କେବଳ ସେତିକି ନୁହେଁ ପୂଜକ ମାନେ ବିନା ପାରିଶ୍ରମିକରେ ପୂଜାର୍ଚ୍ଚନା କରୁଛନ୍ତି। ବିଭିନ୍ନ ମନ୍ଦିର ପାଇଁ ଚାଷ ଜମି ରହିଥିଲେ ମଧ୍ୟ ଅଧିକାଂଶ ଜମି ଜବର ଦଖଲରେ ରହିଛି। ସୋନପୁର ସହରରେ କେତେକ ବଡ ବଡିଆ ଲୋକ ଏହି ଜମିକୁ ଜବରଦଖଲ କରିଥିବାରୁ ପ୍ରଶାସନ ତାହା ହଟାଇବାକୁ ସାହାସ କରୁନାହିଁ। ଦେବୋତ୍ତର ଜମିରେ ଲୋକେ କୋଠା ନିର୍ମାଣ କରି ରହୁଛନ୍ତି। ଆଉ କେତେକ ଷ୍ଟଲ ନିର୍ମାଣ କରି ବ୍ୟବସାୟୀଙ୍କଠାରୁ ଭଡା ଆଦାୟ କରୁଛନ୍ତି। ଉପଜିଲାପାଳମାନେ ସୋନପୁର ଦୋବୋତ୍ତର ଅଧିକାରୀ ଦାୟିତ୍ୱରେ ରହୁଛନ୍ତି। କାର୍ଯ୍ୟବ୍ୟସ୍ତତା ଭିତରେ ସେମାନେ ଦୋବୋତ୍ତର ଜମିକୁ ସୁରକ୍ଷା ଦେଇ ପାରୁନାହାନ୍ତି। ଜବରଦଖଲ ଓ ବେଆଇନ ଭାବେ ଜମି ବିକ୍ରି ଦିନକୁ ଦିନ ବଢି ଚାଲିଛି। ପ୍ରଶାସନ ଏ ଦିଗରେ ପଦକ୍ଷେପ ନେଉ ନଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି। ଜିଲା ପ୍ରଶାସନ ଓ ଦୋବୋତ୍ତର ବିଭାଗ ଦେବୋତ୍ତର ଜମିରୁ ଜବରଦଖଲ ହଟାଇବା ସହ ଓ ବିକ୍ରି ହୋଇଥିବା ଜମି ପୁନଃ ଦେବାଦେବୀଙ୍କ ନାମକୁ ଫେରାଇ ଆଣିବା ଦିଗରେ ଆବଶ୍ୟକ ପଦକ୍ଷେପ ନେବାକୁ ବୁଦ୍ଧିଜୀବୀଙ୍କ ପକ୍ଷରୁ ଦାବି ହେଉଛି।
