ଦିଗପହଣ୍ଡି/ପାଟପୁର,୩ା୧(ଅଶେଷ ନାଥ ମିଶ୍ର/ସୀମାଞ୍ଚଳ ସାହୁ): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ମୌଳାଭଞ୍ଜା ପଞ୍ଚାୟତ ସରପଞ୍ଚ ବର୍ଷା ସେଠୀଙ୍କ ବିରୋଧରେ ଅନାସ୍ଥା ପ୍ରସ୍ତାବକୁ କେନ୍ଦ୍ରକରି ଦୀର୍ଘଦିନ ଧରି ଲାଗି ରହିଥିବା ରାଜନୈତିକ ଛକାପଞ୍ଝାର ଅବସାନ ଘଟିଛି । ଗୁରୁବାର ଆବଶ୍ୟକ ଓ୍ବାର୍ଡ ସଭ୍ୟାସଭ୍ୟଙ୍କ ଅନୁପସ୍ଥିତ ତଥା କୋରମ ଅଭାବରୁ ଭୋଟିଂ ପ୍ରକିୟା ବାଧାପ୍ରାପ୍ତ ହୋଇଥିବା ବେଳେ କାଟ୍ ଖାଇଛି ଅନାସ୍ଥା ପ୍ରସ୍ତାବ। ବ୍ରହ୍ମପୁର ଉପଜିଲାପାଳଙ୍କ ନିର୍ଦ୍ଦେଶ କ୍ରମେ ପଞ୍ଚାୟତ କାର୍ଯ୍ୟାଳୟରେ ସାନଖେମୁଣ୍ଡି ତହସିଲଦାର ତଥା ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ ରାମଚନ୍ଦ୍ର ପଟ୍ଟନାୟକଙ୍କ ଉପସ୍ଥିତିରେ ଭୋଟିଂ କାର୍ଯ୍ୟ ଆରମ୍ଭ ହୋଇଥିଲା। ଶାନ୍ତିଶୃଙ୍ଖଳା ଆଶଙ୍କାରେ ଦିଗପହଣ୍ଡି ପୋଲିସ ପକ୍ଷରୁ ଏକ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଥିଲା। ଗତ ୨୦୨୪ ଅକ୍ଟୋବର ୧୮ରେ ସରପଞ୍ଚଙ୍କ ଖାମଖିଆଲି ମନୋଭାବ ଏବଂ ସରକାରଙ୍କ ବିକାଶ ଯୋଜନାକୁ ନିର୍ବାଚିତ ପ୍ରତିନିଧିଙ୍କୁ ଅବଗତ କରାଯାଉ ନ ଥିବା ନେଇ ପଞ୍ଚାୟତର ୧୮ ଜଣ ଓ୍ବାର୍ଡ ସଭ୍ୟାସଭ୍ୟଙ୍କ ମଧ୍ୟରୁ ୧୫ଜଣ ବ୍ରହ୍ମପୁର ଉପଜିଲାପାଳଙ୍କ ନିକଟରେ ଅନାସ୍ଥା ପ୍ରସ୍ତାବ ନେଇ ଦାବିପତ୍ର ପ୍ରଦାନ କରିଥିଲେ। ଏହାର କିଛିଦିନ ପରେ ୭ ଜଣ ଓ୍ବାର୍ଡ ସଭ୍ୟାସଭ୍ୟ ସରପଞ୍ଚଙ୍କ ବିରୋଧରେ ଅନାସ୍ଥା ନୋଟିସ୍କୁ ବିରୋଧ କରି ଏକ ନାଟକୀୟ ଘଟଣାକ୍ରମେ ସରପଞ୍ଚଙ୍କ ସପକ୍ଷରେ ଯାଇ ବ୍ରହ୍ମପୁର ଉପଜିଲାପାଳଙ୍କ ନିକଟରେ ହାଜର ହୋଇ ସରପଞ୍ଚଙ୍କୁ ବଦନାମ କରିବା ପାଇଁ ନାଏବ ସରପଞ୍ଚ ବିଟୁ ଗୌଡ଼ ସମସ୍ତଙ୍କୁ ମିଛ କହି ସ୍ବାକ୍ଷର ନେଇଥିଲେ ବୋଲି ଅଭିଯୋଗ ପତ୍ର ପ୍ରଦାନ କରିଥିଲେ। ଏନେଇ ସେମାନେ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିମନ୍ତେ ଦାବି ମଧ୍ୟ କରିଥିଲେ। କିନ୍ତୁ ଜିଲା ପ୍ରଶାସନ ସରପଞ୍ଚଙ୍କ ବିରୋଧରେ ପୂର୍ବରୁ ଦିଆଯାଇଥିବା ଅନାସ୍ଥା ନୋଟିସ୍କୁ ଭିତ୍ତିକରି ସରପଞ୍ଚଙ୍କ ବିରୋଧରେ ଅନାସ୍ଥା ଭୋଟିଂ ପାଇଁ ଗୁରୁବାର ସମୟ ଧାର୍ଯ୍ୟ କରିଥିଲେ। ତେବେ ଭୋଟିଂ ସମୟରେ ସମୁଦାୟ ୧୮ ଓ୍ବାର୍ଡ ସଭ୍ୟାସଭ୍ୟଙ୍କ ମଧ୍ୟରୁ ମାତ୍ର ୧୨ ଜଣ ଉପସ୍ଥିତ ଥିଲେ।
ପରବର୍ତ୍ତୀ ସମୟରେ ବ୍ରହ୍ମପୁର ଉପଜିଲାପାଳଙ୍କ ନିର୍ଦ୍ଦେଶକ୍ରମେ ଭୋଟିଂ ବକ୍ସ ସିଲ୍ କରାଯାଇ ଫଳାଫଳ ଘୋଷଣା କରାଯାଇ ନ ଥିବା ଦାୟିତ୍ୱରେ ରହିଥିବା ନିର୍ବାଚନ ପରିଚାଳନା ଅଧିକାରୀ ତଥା ତହସିଲଦାର ସୂଚନା ଦେଇଛନ୍ତି। ଏହାକୁ ନେଇ ବର୍ତ୍ତମାନ ପଞ୍ଚାୟତରେ ରାଜନୈତିକ ଉଷ୍ଣତା ବୃଦ୍ଧି ପାଇଥିବା ବେଳେ ଆଗାମୀ ଦିନରେ ଏହା କେଉଁ ମୋଡ଼ ନେବ ସେ ନେଇ ସାଧାରଣରେ ନାନା ଚର୍ଚ୍ଚା ଲାଗିରହିଛି।
