ଭୁବନେଶ୍ୱର,୨୭।୧୨(ରବିନାରାୟଣ ଜେନା):ରାଜ୍ୟକୁ ଦାଦନମୁକ୍ତ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯିବାକୁ ଯୋଜନା ରହିଛି। ରାଜ୍ୟ ସରକାର ବଲାଙ୍ଗୀର ଅଞ୍ଚଳର ଶ୍ରମିକଙ୍କୁ ଓଡ଼ିଶା ପ୍ରତି ଆକୃଷ୍ଟ କରିବା ତଥା ରାଜ୍ୟରେ ବାନ୍ଧି ରଖିବା ଲାଗି ୯୮ ଟଙ୍କାର ଅତିରିକ୍ତ ମଜୁରି(ଟପ୍ଅପ୍)ପ୍ରଦାନ କରିବାକୁ ଚିନ୍ତା କରିଛନ୍ତି। ଏ ସଂକ୍ରାନ୍ତରେ ପଞ୍ଚାୟତିରାଜ ବିଭାଗ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ରାଜ୍ୟ ସରକାରଙ୍କ ଅନୁମୋଦନ ଲାଗି ପ୍ରେରିତ କରାଯାଇଛି। ରାଜ୍ୟ ସରକାରଙ୍କ ଅନୁମୋଦନ ପରେ ଏହାକୁ ବିଧିବଦ୍ଧ ଭାବେ ଘୋଷଣା କରାଯିବ ବୋଲି ପଞ୍ଚାୟତିରାଜ ବିଭାଗର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ରାଜ୍ୟ ସରକାରଙ୍କ ପକ୍ଷରୁ ରାଜ୍ୟର ୯ଟି ଜିଲାର ୩୦ଟି ଦାଦନ ବ୍ଲକରେ ଦାଦନ ହ୍ରାସ କରିବାକୁ ଲକ୍ଷ୍ୟ ରଖିଛନ୍ତି। ଏହାକୁ ନେଇ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା(ଏମ୍ଜିଏନ୍ଆର୍ଇଜିଏସ୍) ତଥା ଭାରତ ସରକାରଙ୍କ ପକ୍ଷରୁ ଏବେ ଏହାର ପରିବର୍ତ୍ତିତ ନାମ ଭିବି ଜି ରାମ ଜି ଅଧୀନରେ ସରକାରଙ୍କ ପକ୍ଷରୁ ଯେତିକି ଟଙ୍କା ମଜୁରି ଦେବାପାଇଁ ରହିଛି, ଏହା ବାଦ୍ ରାଜ୍ୟ ସରକାର ଅତିରିକ୍ତ ୯୮ ଟଙ୍କାର ଟପ୍ଅପ୍ ଦେବାକୁ ନିଷ୍ପତ୍ତି ନେଇଛନ୍ତି। କେବଳ ସେତିକି ନୁହେଁ, ଏହି ୩୦ ବ୍ଲକରେ ୧୦୦ଦିନର ନିଶ୍ଚିତ କାର୍ଯ୍ୟ ସହିତ ଆଉ ୨୦୦ଦିନର ଅତିରିକ୍ତ କାର୍ଯ୍ୟଦିବସ ଯୋଗାଇ ଦିଆଯିବ। ଏହି ବର୍ଦ୍ଧିତ ୨୦୦ଦିନର କାର୍ଯ୍ୟ ପାଇଁ ସରକାରଙ୍କ ଧାର୍ଯ୍ୟ ମଜୁରି ସହିତ ଅତିରିକ୍ତ ଟପ୍ଅପ୍ ୯୮ଟଙ୍କା ଲେଖାଏ ପ୍ରଦାନ କରାଯିବ। ଫଳରେ ଏହି ୩୦ ବ୍ଲକରେ ଶ୍ରମିକମାନଙ୍କୁ ୩୦୦ଦିନର କାମ ମିଳିବା ସହିତ ଅତିରିକ୍ତ ମଜୁରି ବାବଦକୁ ୯୮ଟଙ୍କା ପ୍ରଦାନ କରାଯିବ। ତେବେ ଏହି ଯୋଜନାର ଅବଧି ୨୦୨୯ ପର୍ଯ୍ୟନ୍ତ ବୃଦ୍ଧି କରାଯିବ କି ଏହାଠାରୁ ଅଧିକ ସେନେଇ ସରକାରଙ୍କ ପକ୍ଷରୁ ପ୍ରସ୍ତାବ ବିଚାରାଧୀନ ରହିଛି। ଖୁବ୍ଶୀଘ୍ର ରାଜ୍ୟ ସରକାରଙ୍କ ପକ୍ଷରୁ ଏନେଇ ବିଧିବଦ୍ଧ ଘୋଷଣା କରାଯିବ ବୋଲି ସୂଚନା ମିଳିଛି।
ବିଭାଗୀୟ ସୂଚନା ଅନୁଯାୟୀ, ୨୦୨୪ରେ ରାଜ୍ୟରୁ ୭୦,୧୪୨ ଶ୍ରମିକ ରାଜ୍ୟ ବାହାରକୁ କାମଧନ୍ଦା ପାଇଁ ଯାଇଥିବାବେଳେ ୨୦୨୫ ନଭେମ୍ବର ସୁଦ୍ଧା ଏହି ସଂଖ୍ୟା ୭୦,୩୬୦ରେ ପହଞ୍ଚିଥିଲା। ୨୦୨୪ରେ ୧,୦୩୭ ଲାଇସେନ୍ସପ୍ରାପ୍ତ ଲେବର ଠିକାଦାରଙ୍କ ଜରିଆରେ ଶ୍ରମିକମାନେ ବାହାର ରାଜ୍ୟକୁ ଯାଇଥିଲେ। ସେଥିମଧ୍ୟରେ ବଲାଙ୍ଗୀରରୁ ସର୍ବାଧିକ ୪୯,୯୮୮ ରହିଥିବାବେଳେ ନୂଆପଡ଼ାରୁ ୧୨,୧୬୦, ଗଞ୍ଜାମରୁ ୧,୫୮୦ ଏବଂ ବରଗଡ଼ରୁ ୧,୩୦୪ଜଣ ରହିଥିଲେ। ଏହାବାଦ୍ ଅନ୍ୟ ୧୫ଟି ଜିଲାରୁ ଶ୍ରମିକମାନେ ଦାଦନ ଖଟିବାକୁ ବାହାରକୁ ଯାଇଥିଲେ। ମାତ୍ର ଚଳିତବର୍ଷ ୧,୧୦୭ ଲାଇସେନ୍ସପ୍ରାପ୍ତ ଲେବର ଠିକାଦାରଙ୍କ ଜରିଆରେ ରାଜ୍ୟ ବାହାରକୁ ଯାଇଥିବା ୭୦,୩୬୦ ଶ୍ରମିକଙ୍କ ମଧ୍ୟରୁ ବଲାଙ୍ଗୀର ଜିଲାର ସର୍ବାଧିକ ୫୧,୫୮୧ଜଣ ରହିଛନ୍ତି। ଏହାସହିତ ନୂଆପଡ଼ାର ୮,୬୫୫ଜଣ ଶ୍ରମିକ ରହିଥିବାବେଳେ ଗଞ୍ଜାମରୁ ୨,୫୫୩ଜଣ ରହିଛନ୍ତି। ତେବେ ଗଜପତି, କନ୍ଧମାଳ, କୋରାପୁଟ, ମାଲକାନଗିରି, ମୟୂରଭଞ୍ଜ ଓ ସୁନ୍ଦରଗଡ଼ରୁ ଜଣେ ହେଲେ ଶ୍ରମିକ ଦାଦନ ଖଟିବାକୁ ବାହାର ରାଜ୍ୟକୁ ଯାଇ ନ ଥିବା ସରକାରୀ ଭାବେ କୁହାଯାଇଛି।
Dharitri – Odisha’s No.1 Odia Daily
