ରାୟଗଡ଼ା,୪।୧୦(ସ୍ବ.ପ୍ର): କୁକୁର କାମୁଡ଼ାରେ ଗୁରୁତର ଆହତ ହୋଇ ଉଦ୍ଧାର ହୋଇଥିବା କୁଟୁରାର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି। ମିଳିଥିବା ସୂଚନା ମୁତାବକ, ରାୟଗଡ଼ା ଜେଏସ୍କୋ ଜଙ୍ଗଲ ପରିସରରେ ଏକ କୁଟୁରା ଆହତ ହୋଇ ପଡ଼ିଥିବା ସାମାଜିକ କର୍ମୀ ଆପଲସ୍ବାମୀ କାଡ୍ରାକାଙ୍କୁ ଖବର ମିଳିଥିଲା। ଖବର ପାଇ ସେ ଘଟଣାସ୍ଥଳରେ ପହଞ୍ଚି କୁଟୁରାକୁ ଉଦ୍ଧାର କରିଥିଲେ। ପରେ ସେ ବନ ବିଭାଗକୁ ସୂଚନା ଦେଇଥିଲେ । ବନ ବିଭାଗ କର୍ମଚାରୀ ପହଞ୍ଚି କୁଟୁରାକୁ ଚିକିତ୍ସା ପାଇ ଜିଲା ପ୍ରାଣୀ ଚିକିତ୍ସାଳୟକୁ ନେଇଥିଲେ। ସେଠାରେ କୁଟୁରାକୁ କୁକୁର କାମୁଡ଼ି କ୍ଷତାକ୍ତ କରିଦେଇଥିବା ଜଣାପଡ଼ିଥିଲା। ଏନେଇ ଜିଲା ପ୍ରାଣୀ ଚିକିତ୍ସାଳୟରେ କୁଟୁରାର ଚିକିତ୍ସା କରାଯାଇ କ୍ଷତ ସ୍ଥାନକୁ ଷ୍ଟିଚ୍ ପକାଯାଇଥିଲା । ହେଲେ ପରବର୍ତ୍ତୀ ସମୟରେ କୁଟୁରାର ମୃତ୍ୟୁ ଘଟିଥିଲା। ଏହାର ଆନୁମାନିକ ବୟସ ପ୍ରାୟ ୩ ବର୍ଷ ହେବ ବୋଲି ବନ ବିଭାଗ ପକ୍ଷରୁ କୁହାଯାଇଛି।
