କୋଣାର୍କ,୧୬।୧୧(ଜ୍ୟୋତିରାଜ ମହାନ୍ତି)କୋଣାର୍କ ଏନ୍ଏସି ୧୧ନଂ. ୱାର୍ଡ ନଳକଣ ଗ୍ରାମ ନିକଟସ୍ଥ ବେରୁହଁ ମୌଜାର ପ୍ଲଟ ନଂ-୨୦୦୮, ମୋଟ ଏରିଆ ୧ ଏକର ୫୦ ଡିସିମିଲ ସରକାରୀ ଜମିରେ କୋଣାର୍କ ଏନ୍ଏସି ପକ୍ଷରୁ ପ୍ରାୟ ୨ କୋଟି ୮୯ ଲକ୍ଷ ଟଙ୍କା ବ୍ୟୟରେ ୨୦୨୦ ମସିହାରୁ ଠିକାଦାର ନିଯୁକ୍ତ କରାଯାଇ ବର୍ଜ୍ୟବସ୍ତୁ ପ୍ରକଳ୍ପ କାର୍ଯ୍ୟ ଚାଲୁଛି। ମାତ୍ର ଦୀର୍ଘ ୨ ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ କାର୍ଯ୍ୟ ସମ୍ପୂର୍ଣ୍ଣ ହୋଇପାରି ନାହିଁ। ଠିକାଦାର ଉକ୍ତ ପ୍ରକଳ୍ପରୁ ଅଧିକ ମୁନାଫା ପାଇବା ଲକ୍ଷ୍ୟରେ ଅଧିକାଂଶ ସମୟ ରାତ୍ରି ସମୟରେ ଅତି ନିମ୍ନମାନର ସାମଗ୍ରୀରେ କାର୍ଯ୍ୟ କରୁଥିବା ଜଣାପଡ଼ିଛି। ବିଶେଷ ଭାବେ ଏହି ବର୍ଜ୍ୟବସ୍ତୁ ପ୍ରକଳ୍ପର ବିଭିନ୍ନ କାର୍ଯ୍ୟରେ ସ୍ଥାନୀୟ ଲୁଣି ବାଲି ବ୍ୟବହାର କରାଯାଉଥିବା ଦେଖାଯାଉଛି। ସରକାରୀ ନୀତି ଅନୁଯାୟୀ, ଠିକାଦାର କାର୍ଯ୍ୟ ଆରମ୍ଭ କରିବା ପୂର୍ବରୁ କାର୍ଯ୍ୟର ସମସ୍ତ ବିବରଣୀ ଥିବା ସୂଚନା ଫଳକ ଲଗାଯିବା କଥା। ମାତ୍ର ଏଠି ବିନା ସୂଚନା ଫଳକରେ ମନମୁଖି କାର୍ଯ୍ୟ ଚାଲୁ ରହିଛି। କୋଣାର୍କ ଏନ୍ଏସିର କୌଣସି ଅଧିକାରୀ ଏହି କାର୍ଯ୍ୟ ଅନୁଧ୍ୟାନ କରୁ ନାହାନ୍ତି। ନିମ୍ନମାନର କାର୍ଯ୍ୟକୁ ନେଇ ୧୧ନଂ. ୱାର୍ଡ କାଉନସିଲର ବିଭିନ୍ନ ସମୟରେ ତାଗିଦା କରିବା ସତ୍ତ୍ୱେ ଠିକାଦାର କୌଣସି କର୍ଣ୍ଣପାତ ନ କରି ମନମୁଖି କାର୍ଯ୍ୟ କରୁଥିବା ଅଭିଯୋଗ ହୋଇଛି। ଏନେଇ ବୁଧବାର ଅପରାହ୍ନରେ ନଳକଣ ଗ୍ରାମବାସୀ ପ୍ରକଳ୍ପ ସ୍ଥାନକୁ ଯାଇ ଠିକାଦାର କାର୍ଯ୍ୟକୁ ଜୋରଦାର ବିରୋଧ କରି କାର୍ଯ୍ୟ ବନ୍ଦ କରିଥିଲେ। ଏ ଦିଗରେ ଜିଲାପାଳଙ୍କ ପକ୍ଷରୁ ଏହି ପ୍ରକଳ୍ପର କାର୍ଯ୍ୟକୁ ଭିଜିଲାନ୍ସ ତଦନ୍ତ କରାଯିବା ସହିତ ଏହି ପ୍ରକଳ୍ପର ସମସ୍ତ କାର୍ଯ୍ୟର ମାନ ପରୀକ୍ଷା କରାଯିବା ନିମନ୍ତେ ନିର୍ଦ୍ଦେଶ ଦେବାକୁ ସାଧାରଣରେ ଦାବି ହୋଇଛି। ସୂଚନାଥାଉକି, କୋଣାର୍କ ଏନ୍ଏସିକୁ ଏକ ସ୍ବଚ୍ଛ ସହରର ମାନ୍ୟତା ଦେବା ଲାଗି ପୂର୍ବତନ ପୁରୀ ଜିଲାପାଳ ବଲୱନ୍ତ ସିଂଙ୍କ ଅକ୍ଳାନ୍ତ ଉଦ୍ୟମରେ ଏହି ବର୍ଜ୍ୟବସ୍ତୁ ପ୍ରକଳ୍ପ କାର୍ଯ୍ୟଗୁଡ଼ିକ ଆରମ୍ଭ ହୋଇଥିଲା। ସୂଚନା ମୁତାବକ, ଏବେ କୋଣାର୍କ ଏନ୍ଏସିର ୧୩ଟି ୱାର୍ଡର ପ୍ରତି ଘରୁ ଅଳିଆ ସଂଗ୍ରହ କରାଯାଉଛି। ସଂଗୃହୀତ ଅଳିଆରୁ ବର୍ଜ୍ୟବସ୍ତୁ ପରିଚାଳନା ଯୋଜନାରେ ଜୈବିକ ସାର ପ୍ରସ୍ତୁତ କରାଯିବାର ଲକ୍ଷ୍ୟ ରହିଛି। ଏପରିକି ବର୍ଜ୍ୟବସ୍ତୁ ପରିଚାଳନାରେ ପ୍ରସ୍ତୁତ ଜୈବିକ ସାର ଉପଯୋଗ କରାଯାଇ ସ୍ମାର୍ଟ ପାର୍କ ନିର୍ମାଣର ଲକ୍ଷ୍ୟ ରହିଛି। କୋଣାର୍କରେ ସଂଗର୍ଟୀତ ବର୍ଜ୍ୟବସ୍ତୁକୁ ସୁରକ୍ଷିତ ଭାବେ ରଖିବା ପାଇଁ ଆବଶ୍ୟକ ବର୍ଜ୍ୟବସ୍ତୁ ପରିଚାଳନା ପ୍ଳାଣ୍ଟ ଓ ସ୍ମାର୍ଟ ପାର୍କ ପାଇଁ ପ୍ରଶାସନ ପକ୍ଷରୁ ଏକାଧିକ ସରକାରୀ ଜମି ଚୟନ କରାଯାଇ କାର୍ଯ୍ୟ ଚାଲୁରହିଛି। ଏ ସମ୍ପର୍କରେ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ଜଗଦୀଶ ନାୟକଙ୍କୁ ପଚାରିବାରେ, ସେ ଏ ସମ୍ପର୍କରେ ଠିକାଦାରଙ୍କୁ ତାଗିଦା କରିଛନ୍ତି। ଯଦି କାର୍ଯ୍ୟ ନିମ୍ନମାନର ହେଉଥାଏ, ତେବେ ତାହାର ତଦନ୍ତ କରି ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରକାଶ କରିଛନ୍ତି।
