କୋଲକାତା,୧୩।୯: ଭାରତୀୟ କ୍ରିକେଟ ଦଳରେ ଆସନ୍ତା କିଛି ଦିନ ମଧ୍ୟରେ ଏକ ବଡ଼ ପରିବର୍ତ୍ତନ ହେବାର ସମ୍ଭାବନା ରହିଛି। ଅକ୍ଟୋବର-ନଭେମ୍ବରରେ ସଂଯୁକ୍ତ ଆରବ ଏମିରେଟ୍ସ ଏବଂ ଓମାନରେ ଅନୁଷ୍ଠିତ ହେବାକୁ ଥିବା ଟି -୨୦ ବିଶ୍ୱକପ ପରେ ଦଳର ବର୍ତ୍ତମାନର ଅଧିନାୟକ ବିରାଟ କୋହଲି ଏକଦିବସୀୟ ଏବଂ ଟି -୨୦ ଅଧିନାୟକ ପଦରୁ ଇସ୍ତଫା ଦେବେ ବୋଲି ଆଶା କରାଯାଉଛି। ତାଙ୍କ ସ୍ଥାନରେ ରୋହିତ ଶର୍ମାଙ୍କୁ ନିଯୁକ୍ତ କରାଯିବ ବୋଲି ଚର୍ଚ୍ଚା ହେଉଛି। ସେ ସୀମିତ ଓଭରରେ ଟିମ ଇଣ୍ଡିଆର ଅଧିନାୟକ ହେବାର ସମ୍ଭାବନା ରହିଛି। ଭାରତର ସବୁଠାରୁ ସଫଳ ଅଧିନାୟକ ଥିବା ୩୨ ବର୍ଷୀୟ ବିରାଟ କୋହଲିଙ୍କ ପରେ ୩୪ ବର୍ଷିୟ ରୋହିତ ଶର୍ମାଙ୍କୁ ଅଧିନାୟକତ୍ୱ ଗ୍ରହଣ କରିବାର ସୁଯୋଗ ମିଳିବାର ଆଶା ରହିଛି। କୋହଲି ଗତ କିଛି ମାସ ମଧ୍ୟରେ ରୋହିତ ଶର୍ମା ଏବଂ ଦଳ ପରିଚାଳନା ସହ ଏହି ପ୍ରସଙ୍ଗରେ ଦୀର୍ଘ ସମୟ ଧରି ଆଲୋଚନା କରୁଥିବା ନେଇ କେତେକ ଗଣମାଧ୍ୟମ ସଂସ୍ଥା ପକ୍ଷରୁ କୁହାଯାଉଛି।
କୋହଲି ମଧ୍ୟ ଅନୁଭବ କରୁଛନ୍ତି ଯେ ଅଧିନାୟକ ଭାବରେ ତାଙ୍କର ସାମଗ୍ରିକ ଦାୟିତ୍ୱ ବ୍ୟାଟିଂ ଉପରେ ପ୍ରଭାବ ପକାଉଛି। ଯଦି ରୋହିତ ସୀମିତ ଓଭରରେ ଦଳର ଅଧିନାୟକତ୍ୱ ଗ୍ରହଣ କରନ୍ତି, ତେବେ କୋହଲି ଟେଷ୍ଟରେ ଭାରତୀୟ ଦଳର ଅଧିନାୟକତ୍ୱ ଜାରି ରଖିବା ସହିତ ଟି -୨୦ ଏବଂ ଏକଦିବସୀୟ ମ୍ୟାଚରେ ଭଲ ବ୍ୟାଟିଂ କରିପାରିବେ ବୋଲି ଚର୍ଚ୍ଚା ହେଉଛି। କୋହଲି ଆଉ ୫-୬ ବର୍ଷ କ୍ରିକେଟ ଖେଳିବାର ସମ୍ଭାବନା ରହିଛି।
ସୂଚନାଯୋଗ୍ୟ, ମହେନ୍ଦ୍ର ସିଂ ଧୋନିଙ୍କ ଇସ୍ତଫା ପରେ କୋହଲି ୨୦୧୪ ରେ ଭାରତୀୟ ଦଳର ଟେଷ୍ଟ ଅଧିନାୟକ ହୋଇଥିଲେ। ଏହା ପରେ ଧୋନି ୨୦୧୭ ରେ ସମସ୍ତ ଫର୍ମାଟରେ ଅଧିନାୟକତ୍ୱରୁ ଇସ୍ତଫା ଦେଇଥିଲେ ଏବଂ ପରେ କୋହଲିଙ୍କୁ ଟେଷ୍ଟ ପରେ ଟି -୨୦ ଏବଂ ଏକଦିବସୀୟର ଅଧିନାୟକ କରାଯାଇଥିଲା।
କୋହଲି ଏପର୍ଯ୍ୟନ୍ତ ୬୫ ଟି ଟେଷ୍ଟ ମ୍ୟାଚରେ ଅଧିନାୟକତ୍ୱ କରିଛନ୍ତି। ଯେଉଁଥିରେ ସେ ୩୮ ଟି ଜିତିଛନ୍ତି। ଏଥି ସହିତ, ଏକଦିବସୀରେ ସେ ୯୫ ଟି ମ୍ୟାଚରେ ଟିମ ଇଣ୍ଡିଆର ନେତୃତ୍ୱ ନେଇଛନ୍ତି ଏବଂ ୬୫ ଟି ଜିତିଛନ୍ତି। କୋହଲି ୪୫ ଟି-୨୦ ଅନ୍ତର୍ଜାତୀୟ ମ୍ୟାଚରେ ମଧ୍ୟ ଭାରତର ଅଧିନାୟକତ୍ୱ କରିଛନ୍ତି ଯେଉଁଥିରେ ସେ ୨୯ ମ୍ୟାଚରେ ଭାରତ ବିଜୟ ଲାଭ କରିଛି।
