ବେଗୁନିଆପଡ଼ା,୧୮ା୧୨(ଡି.ଏନ୍.ଏ.): ଗଞ୍ଜାମ ଜିଲା କୋଦଳା ଏନ୍ଏସି କାଉନସିଲ ସାଧାରଣ ବୈଠକ କରାଇ ନ ଦେବା ନେଇ ଷଡ଼ଯନ୍ତ୍ର କରିଥିଲେ ନିର୍ବାହୀ ଅଧିକାରିଣୀ। ମ୍ୟୁନିସିପାଲିଟି ଆଇନ ଓ ନିୟମର ଧଜିଆ ଉଡ଼ାଇ ଅଯଥା ହସ୍ତକ୍ଷେପ କରିଥିଲେ ଏବଂ ବୈଠକକୁ ବିଧାୟକ, ଏମ୍ପିଙ୍କୁ ଉପସ୍ଥିତ ରହିବାକୁ ଅନୁରୋଧ କରାଯାଇଥିଲେ ମଧ୍ୟ ବିଧାୟିକାଙ୍କୁ ଡକା ଯାଇନି କହି ବୈଠକ ହୋଇ ପାରିବ ନାହିଁ ବୋଲି ଜିଲା ପ୍ରଶାସନକୁ ଜଣାଇଥିଲେ ନିର୍ବାହୀ ଅଧିକାରିଣୀ। ତେବେ ନିର୍ବାହୀ ଅଧିକାରିଣୀଙ୍କ ଏଭଳି କାର୍ଯ୍ୟରେ ଅସନ୍ତୋଷ ପ୍ରକାଶ କରି ଜିଲା ପ୍ରଶାସନକୁ ତଥ୍ୟ ପ୍ରମାଣ ଆଧାରରେ ନିର୍ବାଚିତ କାଉନସିଲର ଓ ଏନ୍ଏସି ଅଧ୍ୟକ୍ଷ ସୂର୍ଯ୍ୟ ନାରାୟଣ ନାୟକ ଜଣାଇଥିଲେ ମଧ୍ୟ କୌଣସି ପଦକ୍ଷେପ ନ ନିଆଯିବାରୁ ସେମାନେ ହାଇକୋର୍ଟଙ୍କ ଦ୍ବାରସ୍ଥ ହେବା ସହ ଏନେଇ ଏକ ମାମଲା ଦାୟର କରିଛନ୍ତି। ମାମଲା ଗୁରୁତ୍ୱ ଥିବା ଏବଂ ମ୍ୟୁନିସିପାଲିଟି ଆଇନକୁ ଜଣେ ସରକାରୀ ଅଧିକାରୀ ଜାଣିଶୁଣି ଅଣଦେଖା କରିବା ଅନୁଭବ କରି ହାଇକୋର୍ଟ ଏନେଇ ଜିଲା ପ୍ରଶାସନକୁ ତାଗିଦ କରିଛନ୍ତି। ଏନ୍ଏସିର ବୈଠକକୁ ଅଧ୍ୟକ୍ଷ ହିଁ ପରିଚାଳିତ କରିବେ ଏବଂ ଏଥିରେ କୌଣସି ଅଧିକାରୀ ହସ୍ତକ୍ଷେପ କରି ପାରିବେ ନାହିଁ ବୋଲି ହାଇକୋର୍ଟ କହିଛନ୍ତି। ଏଥି ସହିତ ଆଗାମୀ ୧୦ ଜାନୁୟାରୀରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ। ଗଞ୍ଜାମ ଜିଲା ଅର୍ବାନ ପ୍ରୋଜେକ୍ଟ ଡାଇରେକ୍ଟର, ଜିଲାପାଳ, ତହସିଲଦାର ତଥା କୋଦଳା ଏନ୍ଏସି କାର୍ଯ୍ୟ ନିର୍ବାହୀ ଅଧିକାରିଣୀଙ୍କ ସମେତ ବିଭାଗୀୟ ସଚିବଙ୍କୁ ଏହି ମାମଲାରେ ପକ୍ଷଭୁକ୍ତ କରିଛନ୍ତି ହାଇକୋର୍ଟ।
ସୂଚନାଯୋଗ୍ୟ, ଗତ ୩୦ ସେପ୍ଟେମ୍ବରରେ କୋଦଳା ଏନ୍ଏସି ଅଧ୍ୟକ୍ଷ ସୂର୍ଯ୍ୟ ନାରାୟଣ ନାୟକ ସାଧାରଣ ବୈଠକ ପାଇଁ ନୋଟିସ୍ କରିଥିଲେ ମଧ୍ୟ ଦାୟିତ୍ୱରେ ଥିବା ନିର୍ବାହୀ ଅଧିକାରିଣୀ ଉଦ୍ଦେଶ୍ୟ ମୂଳକ ଭାବେ ବୈଠକ କରାଇ ନ ଦେବାକୁ ଚାଲ୍ ରଚିଥିବା ଅଭିଯୋଗ କରିଥିଲେ ୮ କାଉନସିଲର ଓ ଅଧ୍ୟକ୍ଷ। ଯାହାକୁ ନେଇ ବିବାଦ ଉପୁଜିଥିଲା। କୋଦଳା ଏନ୍ଏସି ନିର୍ବାହୀ ଅଧିକାରିଣୀ ଜଣେ ତହସିଲଦାର ହୋଇଥିବାରୁ ଆଇନକୁ ଅବମାନନା କରିବା ନେଇ ଅନେକ ନାପସନ୍ଦ କରିଥିଲେ। ତେବେ ହାଇକୋର୍ଟରେ ମାମଲା ପରେ ଘଟଣା ଏବେ ରୋଚକ ମୋଡ଼ରେ ପହଞ୍ଚିଛି। ଏନେଇ ନିର୍ବାହୀ ଅଧିକାରିଣୀଙ୍କ ପ୍ରତିକ୍ରିୟା ପାଇଁ ଯୋଗାଯୋଗ କରାଯାଇଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇପାରି ନାହିଁ।
