ନୂଆଦିଲ୍ଲୀ,୬।୧୨:ଦିଲ୍ଲୀ ସୀମାରେ କୃଷକମାନେ ସେମାନଙ୍କର ଦାବି ଗ୍ରହଣ କରିବାକୁ ଡିସେମ୍ବର ୮ରେ ଭାରତ ବନ୍ଦ ଡାକରା ଦେଇଛନ୍ତି। ସରକାରଙ୍କ ବିରୋଧରେ କୃଷକଙ୍କ ପକ୍ଷରୁ ଭାରତ ବନ୍ଦ ଡାକରାକୁ ୧୮ଟି ବିରୋଧୀ ଦଳର ସମର୍ଥନ ମିଳିଛି। ନିକଟରେ ରାଷ୍ଟ୍ରୀୟ କଂଗ୍ରେସ ପାର୍ଟି ମୁଖ୍ୟ ଶରଦ ପାୱାର ମଧ୍ୟ ଚେତାବନୀ ଦେଇଛନ୍ତି ଯେ, ଯଦି ଦାବିଗୁଡିକ ବିଚାର ନ ହୁଏ ତେବେ ସମଗ୍ର ଦେଶର ଲୋକମାନେ ଏହି ଆନ୍ଦୋଳନରେ କୃଷକଙ୍କ ସହ ଛିଡା ହେବେ। କୃଷକ ଏବଂ ସରକାରଙ୍କ ମଧ୍ୟରେ ପାଞ୍ଚ ରାଉଣ୍ଡ ବୈଠକ ଅନୁଷ୍ଠିତ ହୋଇଥିଲେ ମଧ୍ୟ କୌଣସି ନିଷ୍କର୍ସ ବାହାରି ପାରିନାହିଁ। ଆସନ୍ତା ଡିସେମ୍ବର ୯ରେ ସରକାର ଏବଂ କୃଷକମାନେ ପୁଣି ଥରେ ଆଲୋଚନା କରିବେ। ଏହା ପୂର୍ବରୁ ଡିସେମ୍ବର ୮ ରେ ସାରା ଦେଶରେ ହେବାକୁ ଥିବା ଧର୍ମଘଟରେ କଂଗ୍ରେସ ସମେତ ୧୮ଟି ପ୍ରମୁଖ ବିରୋଧୀ ଦଳ ଚାଷୀଙ୍କୁ ସହାୟତା କରିବାକୁ ନିଷ୍ପତ୍ତି ନେଇଛନ୍ତି। ବାମପନ୍ଥୀ ଦଳ, ଆରଏସପି, ଡିଏମକେ, ଆରଜେଡି, ଆରଜେଡି, ତୃଣମୂଲ କଂଗ୍ରେସ (ଟିଏମସି), ତେଲେଙ୍ଗାନା ରାଷ୍ଟ୍ର ସମିତି (ଟିଆରଏସ), ଆମ ଆଦମୀ ପାର୍ଟି (ଏଏପି), ଭିସିକେ, ଏମଏମକେ, ଆଇଜେ, କେଏନଏମଏନକେ, ଏମଡିଏମକେ, ଆଇୟୁଏମଏଲ ପାର୍ଟି ଚାଷୀଙ୍କୁ ସହାୟତା କରିବାକୁ ନିଷ୍ପତ୍ତି ନେଇଛନ୍ତି। କୃଷକଙ୍କ ଏହି ଆନ୍ଦୋଳନରେ ଦିଲଜିତ ଦୋସାଞ୍ଜଙ୍କ ସମେତ ମନୋରଞ୍ଜନ ଜଗତର ଅନେକ ସେଲିବ୍ରିଟି ନିଜର ସମର୍ଥନ ଜଣାଇଛନ୍ତି। ପଞ୍ଜାବୀ ଗାୟକ ତଥା ଅଭିନେତା ଦିଲଜିତ ଚାଷୀଙ୍କ ପାଇଁ ଉଷୁମ ପୋଷାକର ବ୍ୟବସ୍ଥା ପାଇଁ ଏକ କୋଟି ଟଙ୍କା ଦାନ କରିଛନ୍ତି। ନିର୍ଦ୍ଦେଶକ ହଂଶଲ ମେହେଟ୍ଟା, ଅଭିନେତା ରିତେଶ ଦେଶମୁଖ, ସୋନୁ ସୁଦ, ପଞ୍ଜାବୀ ଗାୟକ ସୁଖବୀର, ଗୁରୁଦାସ ମାନ, ଆମି ୱାର୍କ, ଜାଜି ବି ସମେତ ବହୁ ବଡ କଳାକାରଙ୍କୁ ସମର୍ଥନ ଚାଷୀଙ୍କ ସମର୍ଥନରେ ଆଗକୁ ଆସିଛନ୍ତି।
