ପୋଙ୍ଗୟାଙ୍ଗ୍,୨୮।୭ : ଉତ୍ତର କୋରିଆ ଏବଂ ଦକ୍ଷିଣ କୋରିଆ ମଧ୍ୟରେ ପୁଣି ଥରେ ଉତ୍ତେଜନା ସୃଷ୍ଟି ହୋଇଛି। ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନଙ୍କ କଡ଼ା ଚେତାବନୀ ନେଇ ଏଭଳି ହୋଇଛି। କିମ୍ କହିଛନ୍ତି ଯେ, ଆମେରିକା ଏବଂ ଦକ୍ଷିଣ କୋରିଆ ସହିତ ଯୁଦ୍ଧ ହେଲେ ସେ ଆଣବିକ ଅସ୍ତ୍ର ବ୍ୟବହାର କରିବେ ବୋଲି ଧମକ ଦେଇଛନ୍ତି। କିମ ଦାବି କରିଛନ୍ତି ଯେ ତାଙ୍କ ପ୍ରତିଦ୍ୱନ୍ଦ୍ୱୀମାନେ କୋରିଆ ଉପଦ୍ୱୀପକୁ ଯୁଦ୍ଧ ଆଡ଼କୁ ଠେଲି ଦେଉଛନ୍ତି। ୧୯୫୦-୫୩ କୋରିଆ ଯୁଦ୍ଧର ୬୯ ତମ ବାର୍ଷିକୀ ଅବସରରେ ଭେଟେରାନମାନଙ୍କୁ ସମ୍ବୋଧିତ କରିବାବେଳେ କିମ ଏହି ମନ୍ତବ୍ୟ ଦେଇଛନ୍ତି।
ଏହି ଭାଷଣର ଉଦ୍ଦେଶ୍ୟ ହେଉଛି ମହାମାରୀ ସହ ଜଡିତ ଆର୍ଥିକ ଅସୁବିଧା ସହ ମୁକାବିଲା କରୁଥିବା ଦେଶରେ ଆଭ୍ୟନ୍ତରୀଣ ଏକତାକୁ ପ୍ରୋତ୍ସାହିତ କରିବା। କେତେକ ପର୍ଯ୍ୟବେକ୍ଷକ କହିଛନ୍ତି ଯେ ଆମେରିକା ଏବଂ ଦକ୍ଷିଣ କୋରିଆ ବିରୋଧରେ ଉତ୍ତର କୋରିଆର ଧମକ ବଢ଼ିବାର ଆଶଙ୍କା ସୃଷ୍ଟି ହୋଇଛି। କାରଣ ଦୁଇ ସହଯୋଗୀ ନିଜର ସାମରିକ ଅଭ୍ୟାସକୁ ବିସ୍ତାର କରିବାକୁ ଯୋଜନା କରୁଛନ୍ତି। ଏହାକୁ ନେଇ ଉତ୍ତରକୋରିଆର ଆକ୍ରୋଶ ବୃଦ୍ଧି ପାଉଛି।
ଦକ୍ଷିଣ କୋରିଆ ଅନୁଯାୟୀ ଏହାର ୧୬ ଟି ଏଫ୍-୩୫ଏ ,ଏଫ୍ ୧୫କେଏବଂ ଏଫ୍ -୧୬ ଯୁଦ୍ଧ ବିମାନ ଏହି ସମରାଭ୍ୟାସରେ ଭାଗ ନେଇଥିଲେ। ଏହା ବ୍ୟତୀତ ଆମେରିକାର ବାୟୁସେନାର ୪ ଟି ଏଫ୍-୧୬ ବିମାନ ମଧ୍ୟ ଏଥିରେ ଅଂଶଗ୍ରହଣ କରି ଏକତା ପ୍ରଦର୍ଶନ କରିଥିଲେ। ଆମେରିକାର ଯୁଦ୍ଧ ବିମାନ ଦକ୍ଷିଣ କୋରିଆର କୁନ୍ସାନ ଏୟାର ବେସରେ ସ୍ଥାୟୀ ଭାବରେ ଅବସ୍ଥାନ କରିଛି। ଏହି ଯୁଦ୍ଧ ବିମାନଗୁଡ଼ିକ ମଧ୍ୟରୁ ଅଧିକାଂଶ ମାରାତ୍ମକ ଅସ୍ତ୍ରଶସ୍ତ୍ରରେ ସଜାଯାଇଥିଲା। ଦକ୍ଷିଣ କୋରିଆ କହିଛି ଯେ ଆମର ଯୁଦ୍ଧ ବିମାନ ଉତ୍ତର କୋରିଆର ଯେ କୌଣସ ପଦକ୍ଷେପକୁ ଉପଯୁକ୍ତ ଉତ୍ତର ଦେବାକୁ ସକ୍ଷମ।
ଆମେରିକା ଏବଂ ଦକ୍ଷିଣ କୋରିଆ ଦ୍ୱାରା କରାଯାଇଥିବା ଏହି ବ୍ୟାୟାମ ଉପରେ ପ୍ରତିରକ୍ଷା ବିଶେଷଜ୍ଞମାନେ କହିଛନ୍ତି ଯେ ଏହି ଯୁଦ୍ଧ ବିମାନଗୁଡ଼ିକ ଉତ୍ତର କୋରିଆର କ୍ଷେପଣାସ୍ତ୍ର, ପରମାଣୁ ଭିତ୍ତିଭୂମି, କିମ ଜୋଙ୍ଗ ସରକାରୀ କାର୍ଯ୍ୟାଳୟ ଏବଂ କମାଣ୍ଡ କଣ୍ଟ୍ରୋଲ ବଙ୍କର୍ଗୁଡ଼ିକୁ ଧ୍ୱଂସ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଉତ୍ତର କୋରିଆ ଭୂମି ତଳେ ଅନେକ ବଙ୍କର ନିର୍ମାଣ କରିଛି । ଉତ୍ତର କୋରିଆର ବିପଦକୁ ଦୃଷ୍ଟିରେ ରଖି ଦକ୍ଷିଣ କୋରିଆ ପାରମ୍ପାରିକ ସାମରିକ ଶକ୍ତି ହାସଲ ପାଇଁ ବହୁ ଅର୍ଥ ଖର୍ଚ୍ଚ କରିଛି। ଏହି ଯୁଦ୍ଧ ବିମାନ ଏବଂ ଅତ୍ୟାଧୁନିକ ଅସ୍ତ୍ର ଉତ୍ତର କୋରିଆର ବାୟୁ ପ୍ରତିରକ୍ଷାକୁ ନଷ୍ଟ କରିପାରିବ ବୋଲି କୁହାଯାଉଛି। ଉତ୍ତର କୋରିଆର ନିରନ୍ତର କ୍ଷେପଣାସ୍ତ୍ର ପରୀକ୍ଷଣ ଏବଂ ବର୍ତ୍ତମାନ ପରମାଣୁ ବୋମା ପରୀକ୍ଷା ପାଇଁ ପ୍ରସ୍ତୁତ ହେଉଥିବା ବେଳେ ଆମେରିକା ଏବଂ ଦକ୍ଷିଣ କୋରିଆ ଏକାସାଙ୍ଗରେ ୨୦ ଟି ଯୁଦ୍ଧ ବିମାନ ଉଡ଼ାଇ କିମ ଜୋଙ୍ଗ ଉନଙ୍କୁ ସିଧାସଳଖ ବାର୍ତ୍ତା ପଠାଇଛନ୍ତି।
