ଖରାଛୁଟିରେ ପିଲାମାନେ ଘରେ ରହୁଛନ୍ତି ପୂରା ସମୟ। ଖେଳାବୁଲା ପରେ ବି ହାତରେ ଢେର୍ ସମୟ। ଏ ସମୟରେ ପିଲା ଯେମିତି ବୋର୍ ହେବେ ନାହିଁ ସେଥିପାଇଁ ବିଭିନ୍ନ ପ୍ରକାର ବିକଳ୍ପ ଚିନ୍ତା କରନ୍ତି ମାଆମାନେ। ତେବେ କଣ କଲେ ସେମାନଙ୍କ ସମୟ ଭଲରେ କଟିବା ସହ କ୍ରିଏଟିଭିଟି ବଢିବ ସେନେଇ ଦୃଷ୍ଟି ଦିଅନ୍ତୁ…
ଏବେ ଘରେ ରହି ଛୁଟି ମନାଉଛନ୍ତି ପିଲାମାନେ। ସବୁଠୁ ଲମ୍ବା ଅବଧିର ଛୁଟି। ସ୍କୁଲ ପାଠପଢ଼ାର ବୋଝ କମ୍। ଖେଳାବୁଲା କରିବା ପରେ ବି ପାଖରେ ଢେର୍ ସମୟ। ତେଣୁ ଅନେକ ସମୟ ଘରେ ବସିବାକୁ ପଡ଼େ। ଘରେ କେହି କେହି ଟିଭି କିମ୍ବା ଫୋନ୍ ଦେଖିବାରେ ସମୟ କଟାନ୍ତି ତ ଆଉ କେତେକ ଘରେ ବୋର୍ ହୋଇ ସାଙ୍ଗମାନଙ୍କ ପାଖକୁ ଚାଲି ଯାଆନ୍ତି। ହେଲେ ଘରେ ରହି ସବୁବେଳେ ଫୋନ୍ କି ଟିଭି ଦେଖିବା ଅବା ଅନ୍ୟ କିଛି ବେକାର କାମରେ ଯେମିତି ସମୟ ନଷ୍ଟ ନ ହେଉ ସେହି ଚିନ୍ତା ଥାଏ ଅଭିଭାବକଙ୍କର। କିନ୍ତୁ ଘରେ ରହି ପିଲାମାନେ କେମିତି ଆଦୌ ବୋର୍ ନ ହେବେ ସେଥିପ୍ରତି ଦୃଷ୍ଟିଦେବା ଅଭିଭାବକଙ୍କ ଦାୟିତ୍ୱ। ବିଶେଷକରି ମାଆମାନେ ପିଲାଙ୍କୁ ଘରେ ଏଭଳି ଭାବରେ ବ୍ୟସ୍ତ କରାଇପାରିବେ ଯେ ସେମାନେ ସମୟକୁ ଏନ୍ଜୟ କରିବା ସହ ନୂଆ କଥା ବି ଶିଖିପାରିବେ।
ରୁଟିନ୍ ତିଆରି କରନ୍ତୁ
ଛୁଟିରେ ସ୍କୁଲ ଯିବା ସମୟ ଭଳି ଏକ ରୁଟିନ୍ ଜୀବନ ନ ଥାଏ। ମନ ଇଚ୍ଛାରେ ଖାଇବା, ପିଇବା କିମ୍ବା ଶୋଇବା ଆଦି ସବୁଥିରେ ଥାଏ ସ୍ବାଧୀନତା। ପ୍ରକୃତରେ ଛୁଟିର ଏହା ହିଁ ଅର୍ଥ। ହେଲେ ଛୁଟିରେ ସବୁବେଳେ ଏଭଳି ସମୟ କଟାଇବା ଫଳରେ ସବୁକିଛି ଓଲଟପାଲଟ ହୋଇଯାଏ। ଶାରୀରିକ ସମସ୍ୟା ସାଙ୍ଗକୁ ଏକ ଅପ୍ରୀତିକର ପରିବେଶ ସୃଷ୍ଟି ହୋଇଥାଏ। ତେଣୁ ଛୁଟିରେ ବି କିଛି ସମୟ ପାଇଁ ହେଲେ ବି ରୁଟିନ୍ ଲାଇଫ୍ ଦରକାର। ଛୁଟି କିଭଳି କଟାଇବେ ସେନେଇ ଏକ ରୁଟିନ୍ ଅନୁସରଣ କରିବା ପାଇଁ ପିଲାଙ୍କୁ କୁହନ୍ତୁ। ଯେମିତିକି କିଛି ସମୟ ବାହାରେ ଖେଳିବା, କିଛି ସମୟ ପଢ଼ିବା ଅବା କିଛି ସମୟ ଘରର ଅନ୍ୟ କାମ ପାଇଁ ଦେବାକୁ ହେବ। ଏପରି ଭାବେ ଚିନ୍ତାକଲେ ଆଉ ବୋର୍ ହେବାକୁ ପଡ଼ିବ ନାହିଁ। ତେଣୁ ପିଲାଙ୍କୁ ଏଭଳି କରିବାରେ ସାହାଯ୍ୟ କରନ୍ତୁ।
ଘର କାମରେ
ଛୁଟିରେ ପିଲାଙ୍କ ମନକୁ ଫ୍ରେଶ୍ କରିବା ପାଇଁ ମନୋରଞ୍ଜନ ବି ଜରୁରୀ। ତା ଅର୍ଥ ନୁହେଁ କି ସେମାନେ ସବୁବେଳେ ବୁଲାବୁଲି କରିବେ ଅବା ଟିଭି କିମ୍ବା ଫୋନ୍ ଦେଖିବେ। ତେଣୁ ମାଆମାନେ ସେମାନଙ୍କୁ ଘରକାମରେ ସାହାଯ୍ୟ କରିବା ପାଇଁ କୁହନ୍ତୁ। ବିଶେଷକରି ରୋଷେଇ ଘରେ ନିଜେ ଥିବାବେଳେ ପିଲାଙ୍କୁ ଡାକି ବିଭିନ୍ନ ପ୍ରକାର ପରିବା ଚିହ୍ନାନ୍ତୁ ଓ ସେସବୁର ଉପକାରିତା ସମ୍ପର୍କରେ ଜଣାନ୍ତୁ। ରୋଷେଇ କିପରି ହେଉଛି ଦେଖାନ୍ତୁ ଓ ସାହାଯ୍ୟ କରିବାକୁ କୁହନ୍ତୁ। ସୁଷମ ଖାଦ୍ୟ ତଥା ପରିଷ୍କାର ପରିଚ୍ଛନ୍ନତା ସମ୍ପର୍କରେ ଶିକ୍ଷା ଦିଅନ୍ତୁ। କର୍ମଜୀବୀ ହୋଇଥିଲେ ପିଲାଙ୍କୁ ସବୁବେଳେ ଘରର କିଛି କିଛି କାମରେ ସାହାଯ୍ୟ କରିବା ପାଇଁ ପିଲାଙ୍କୁ ଅଭ୍ୟାସ କରାନ୍ତୁ। ଏପରି ହେଲେ ପିଲାମାନେ ଖାଲି ସମୟରେ ଘରକାମ କରି ସମୟ କଟାଇବା ସହ ଖୁସି ହୋଇପାରିବେ।
କ୍ରିଏଟିଭ୍ ହାବିଟ୍ ବଢ଼ାନ୍ତୁ
ଛୁଟି ସମୟରେ ପାଠପଢ଼ା ବାଦ୍ ସେମାନଙ୍କୁ ଅନ୍ୟ କିଛି କରିବା ପାଇଁ ନିଶ୍ଚୟ କୁହନ୍ତୁ। କିଛି ନୂଆ କୋର୍ସରେ ନାମ ଲେଖାନ୍ତୁ। ଦିନକୁ କିଛି ସମୟ ସେମାନେ ସମର କୋର୍ସ ଯେପରି କରାଟେ, ଚେସ୍, ସ୍କେଟିଂ, ଡ୍ୟାନ୍ସ, ମ୍ୟୁଜିକ୍ ଆଦି ଯେକୌଣସି ବିଷୟରେ ଶିକ୍ଷା ନେବା ପାଇଁ ସୁଯୋଗ ଦିଅନ୍ତୁ। ଏହା ଫଳରେ ପିଲାଙ୍କର କ୍ରିଏଟିଭିଟି ବଢ଼ିବ। ଏକ ସମୟରେ ଛୁଟି ଭଲରେ କଟିବା ସହ ସେମାନଙ୍କ ଦକ୍ଷତା ବିକାଶ ହୋଇପାରିବ।
