ରାୟଗଡ଼ା ଅଫିସ,୧୪ା୧୧: ଉଠା ଜଳସେଚନ ବିଭାଗର ବୋରଓ୍ବେଲ୍ ଖନନ ବିଜ୍ଞାପନକୁ ନେଇ ରାୟଗଡ଼ା ଜିଲା ସଦର ବ୍ଲକ ପେଣ୍ଟା ଗ୍ରାମର ଚାଷୀ ଟଙ୍କା ଜମା କରିଥିଲେ। ହେଲେ ବର୍ଷ ବର୍ଷ ବିତିଯାଇଥିଲେ ମଧ୍ୟ ପ୍ରକଳ୍ପ କାର୍ଯ୍ୟକାରୀ ହେଉନାହିଁ। ଫଳରେ ଚାଷ ଜମିକୁ ପାଣି ମାଡ଼ୁ ନ ଥିବାରୁ ଖରିଫ ଫସଲ ଅମଳ ହୋଇପାରୁନାହିଁ। ଚାଷୀ ନିଜ ସମସ୍ୟାକୁ ନେଇ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ଶୀଘ୍ର ବୋରଓ୍ବେଲ୍ ଖନନ ପାଇଁ ଦାବି କରିଛନ୍ତି।
ଏବେ ଖରିଫ ଋତୁରେ ଧାନଚାଷ ହୋଇଥିବାବେଳେ ପାଣି ଅଭାବରୁ ମାଟି ଫାଟି ଆଁ କରିଛି। ଧାନ ଫସଲ ଏବେ ଅଗାଡ଼ି ହୋଇଛି। ଚାଷୀ ଋଣ କରି ଏକର ଏକର ଜମିରେ ଧାନଚାଷ କରିଥିବାବେଳେ ଏବେ ତାହା କିପରି ଶୁଝିବେ ଏବଂ ପରିବାର କିଭଳି ଚଳିବ ଚାଷୀ ସେହି ଚିନ୍ତାରେ ଅଛନ୍ତି। ଚାଷ ଜମିକୁ ଜଳସେଚନର ସୁବିଧା ରହିଥିଲେ ମଧ୍ୟ ଜମିକୁ ପାଣି ଅଣ୍ଟୁନି। ବିଭାଗର ବୋରୱେଲ୍ ପ୍ରକଳ୍ପକୁ ଆଶା କରି ଚାଷୀ ହନ୍ତସନ୍ତ ହେଉଥିବା ବେଳେ ଚାଷ ଜମିକୁ ପାଣି ଯୋଗାଇବା ସରକାରଙ୍କ ଦୟା ନା ଚାଷୀଙ୍କ ଅଧିକାର ବୋଲି ସେମାନେ ପ୍ରଶ୍ନ କରିଛନ୍ତି। ସୂଚନାଯୋଗ୍ୟ, ବୋରଓ୍ବେଲ୍ ନିମନ୍ତେ ବିଭାଗର ବିଜ୍ଞାପନ ଦେଖି ପେଣ୍ଟା ଗ୍ରାମର ୧୩ ଚାଷୀଙ୍କ ସମେତ ଜିଲାର ୮୦ରୁ ଊର୍ଦ୍ଧ୍ୱ ଚାଷୀ ୨୦୧୯-୨୦ରେ ରାୟଗଡ଼ା ଜିଲା ଉଠା ଜଳ ସେଚନ ବିଭାଗ କାର୍ଯ୍ୟାଳୟ, ଗୁଣପୁର ନିର୍ବାହୀ ଯନ୍ତ୍ରୀଙ୍କ ନାମରେ ୧୦ ହଜାରରୁ ୨୦ ହଜାର ଟଙ୍କା ପର୍ଯ୍ୟନ୍ତ ଟଙ୍କା ଜମା କରିଥିଲେ। ୩ ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ବୋରୱେଲ୍ ଖନନ କରାଯାଉ ନ ଥିବାରୁ ଚାଷୀ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ଅନ୍ୟପକ୍ଷରେ ପ୍ରକଳ୍ପ କାର୍ଯ୍ୟକାରୀ ନିମନ୍ତେ ୨୦୨୧ ରେ ଟେଣ୍ଡର ଡକାହୋଇ ସାରିଥିବା ବେଳେ ଉଚ୍ଚସ୍ତରୀୟ କମିଟି ଦ୍ୱାରା ବୋରୱେଲ ଖନନ ପ୍ରକଳ୍ପ କାର୍ଯ୍ୟକାରୀ ସ୍ଥଗିତ ରଖାଯାଇଛି ବୋଲି ରାୟଗଡ଼ା ଅଫିସର ସହକାରୀ ନିର୍ବାହୀ ଯନ୍ତ୍ରୀ ସୂଚନା ଦେଇଛନ୍ତି।
