ନୂଆଦିଲ୍ଲୀ,୨୮।୮: ସର୍ଟ ଭିଡିଓ ଆପ୍ ଟିକ୍ଟକ ଗତ କିଛି ଦିନ ହେବ ବିଭିନ୍ନ ସମସ୍ୟା ସାମ୍ନା କରୁଛି। ଏହି କମ୍ପାନୀ ବର୍ତ୍ତମାନ ସମୟରେ ବିଭିନ୍ନ ବିବାଦୀୟ ପରିସ୍ଥିତ ଦେଇ ଗତି କରୁଛି। ଏଭଳି ଏକ ଘଡିସନ୍ଧି ସମୟରେ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ କେଭିନ ମେୟର କମ୍ପାନୀ ନିକଟକୁ ଇସ୍ତଫା ପତ୍ର ପଠାଇଥିବା ରଏଟର୍ସ ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି। ସେହିଭଳି କମ୍ପାନୀର ଜେନେରାଲ ମ୍ୟାନେଜର ଭାବେ କାର୍ଯ୍ୟରତ ଭାନୀସା ପାପସ୍ ଅନ୍ତରୀଣ ସିଇଓ ଭାବରେ କାର୍ଯ୍ୟ କରିବେ ବୋଲି ସୂଚନା ମିଳିଛି। କମ୍ପାନୀ ଗତ କିଛି ମାସ ହେବ ଆର୍ଥିକ ମାନ୍ଦାବସ୍ଥା ଦେଇ ଗତି କରୁଛି। ଚାଇନା ସହ ବିଭିନ୍ନ ଦେଶର ସମ୍ପର୍କ ବିଗିଡିବା ଯୋଗୁ କମ୍ପାନୀର କାରବାର ପ୍ରଭାବିତ ହୋଇଥିବା କୁହାଯାଇଛି। ସେହିପରି ଆସନ୍ତା କିଛି ଦିନ ମଧ୍ୟରେ ଆମେରିକାରେ ମଧ୍ୟ ଏହି ସର୍ଟ ଭିଡିଓ ବ୍ୟାନ ହୋଇପାରେ ବୋଲି ସୂଚନା ରହିଛି। ଟ୍ରମ୍ପ ପ୍ରଶାସନ ପକ୍ଷରୁ ଜାରି ହୋଇଥିବା ନିର୍ଦେଶାବଳୀ ଓ ବର୍ତ୍ତମାନ ସମୟର ରାଜନୈତିକ ପରିସ୍ଥିତ ସହ ଅନ୍ୟାନ୍ୟ ସମସ୍ୟା ବିଷୟରେ ମେୟର ତାଙ୍କ ଚିଠିରେ ଉଲ୍ଲେଖ କରିଛନ୍ତି। ଭାରତରୁ ଏହି ସର୍ଟ ଭିଡିଓ ଆପ୍ ଚାଇନା ସରକାରଙ୍କ ବିଭିନ୍ନ ମନମୁଖୀ କାର୍ଯ୍ୟ କାରଣରୁ ବ୍ୟାନ କରାଯାଇଛି ।
