ନୂଆଦିଲ୍ଲୀ,୧୪।୧: “ରନ୍ଧନ ଗ୍ୟାସର ଅଭାବ ହେଲେ ଆମେ ବିକଳ୍ପ ଇନ୍ଧନ ଭାବରେ କିରୋସିନ ଯୋଗାଇବାକୁ ପ୍ରସ୍ତୁତ” । ସାରା ଦେଶରେ ଯେତେବେଳେ ରନ୍ଧନ ଗ୍ୟାସ ଯୋଗାଣରେ ବିଳମ୍ବ ହେଉଛି, ସେତେବେଳେ ଭାରତୀୟ ତୈଳ ବିପଣନ କମ୍ପାନୀଗୁଡ଼ିକ ଏକ ଚାଞ୍ଚଲ୍ୟକର ପଦକ୍ଷେପ ନେଉଛନ୍ତି। ଇକୋନୋମିକ୍ ଟାଇମ୍ସ ଅନୁଯାୟୀ, ଯଦି ଗ୍ୟାସ ସିଲିଣ୍ଡରର ସଙ୍କଟ ଶୋଚନୀୟ ସ୍ଥିତିରେ ପହଞ୍ଚେ, ତେବେ ସେମାନେ ଜନସାଧାରଣଙ୍କ ପାଇଁ ବିକଳ୍ପ ଭାବରେ କିରୋସିନ ଉପଲବ୍ଧ କରାଇବାକୁ ଯୋଜନା କରୁଛନ୍ତି। ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ଏହା କେବଳ ଜରୁରୀକାଳୀନ ପରିସ୍ଥିତିରେ କାର୍ଯ୍ୟକାରୀ କରାଯିବା ପାଇଁ ଏକ ସତର୍କତାମୂଳକ ପଦକ୍ଷେପ।
ଅଧିକାରୀମାନେ ପୁରୁଣା ଉପାୟରେ ରାଶନ ଦୋକାନ ମାଧ୍ୟମରେ ଏହି କିରୋସିନ ବଣ୍ଟନ କରିବାକୁ ଯୋଜନା କରୁଛନ୍ତି। ଏଥିପାଇଁ ସେମାନେ ରାଜ୍ୟ ସରକାରଙ୍କ ସାଧାରଣ ବଣ୍ଟନ ବ୍ୟବସ୍ଥାରେ ସାହାଯ୍ୟ ନେବାକୁ ଯୋଜନା କରୁଛନ୍ତି। ଯଦି ଯୁଦ୍ଧ ପରିସ୍ଥିତି ଥମି ନଯାଏ, ତେବେ ଅଧିକାରୀମାନେ କେତେ ଶୀଘ୍ର ଏହି ବଣ୍ଟନ ପ୍ରକ୍ରିୟା ଆରମ୍ଭ କରାଯାଇପାରିବ ସେନେଇ ବ୍ଲୁପ୍ରିଣ୍ଟ ପ୍ରସ୍ତୁତ କରୁଛନ୍ତି।
ବିଶେଷକରି ପୂର୍ବ ଉତ୍ତର ପ୍ରଦେଶରେ, ତେଲ କମ୍ପାନୀଗୁଡ଼ିକ ପକ୍ଷରୁ ପୁରୁଣା କିରୋସିନ ଡିଲରମାନଙ୍କୁ,କଲ୍ କରାଯାଉଛି। ସେମାନେ ବାରଣାସୀ ଓ ଗୋରଖପୁର ଭଳି ଜିଲ୍ଲାର ପୂର୍ବତନ ଡିଲରମାନଙ୍କ ପୁରୁଣା ଷ୍ଟୋରେଜ୍ ଟ୍ୟାଙ୍କ ଓ ଡିସପେନ୍ସିଂ ମେସିନ୍ କାର୍ଯ୍ୟକ୍ଷମ ଅବସ୍ଥାରେ ଅଛି କି ନାହିଁ ତାହା ଯାଞ୍ଚ କରୁଛନ୍ତି। ଜରୁରୀକାଳୀନ ପରିସ୍ଥିତିରେ ଏହି ବ୍ୟବସ୍ଥା କେତେ ଶୀଘ୍ର ଉପଲବ୍ଧ ହୋଇପାରିବ ତାହା ମଧ୍ୟ ସେମାନେ ଅନୁଧ୍ୟାନ କରୁଛନ୍ତି।
