ଥିରୁଭାନନ୍ତପୁରମ୍,୧୫।୭:କେରଳର ଏର୍ନାକୁଲମ ଜିଲାରେ ଏକ ହସ୍ପିଟାଲ ବାହାରେ ପୋଷ୍ଟମର୍ଟମ ପାଇଁ ରଖାଯାଇଥିବା ମୃତବ୍ୟକ୍ତିର ଫଟୋ ନେଉଥିଲେ ଜଣେ ଫଟୋଗ୍ରାଫର। ଅଚାନକ ଏକ ସ୍ବର ଆସିଥିଲା। ଫଟୋଗ୍ରାଫର ଜଣଙ୍କୁ ସନ୍ଦେହ ହେବାରୁ ସେ ମୃତବ୍ୟକ୍ତିଙ୍କ ପାଖକୁ ଯାଇଥିଲେ। ତାଙ୍କ ମୁହଁରୁ ଧୀର ସ୍ବର ଆସୁଥିଲା। ଏହାପରେ ଫଟୋଗ୍ରାଫର ପୋଲିସକୁ ସୂଚନା ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚିବା ପରେ ମୃତବ୍ୟକ୍ତି ଜଣଙ୍କୁ ଜୀବନ୍ତ ଦେଖିବାକୁ ପାଇଥିଲେ। ଏବେ ଉକ୍ତ ବ୍ୟକ୍ତି ଜଣଙ୍କୁ ଆଇସିୟୁରେ ରଖାଯାଇ ଚିକିତ୍ସା କରାଯାଉଛି। ଏହି ଫଟୋଗ୍ରାଫର ଜଣଙ୍କ ହେଉଛନ୍ତି ଟୋମି ଥୋମାସ। ସେ ଜୀବନ୍ତ ଦେଖିଥିବା ବ୍ୟକ୍ତି ଜଣଙ୍କ ସିଭାଦାସନ ବୋଲି ଜଣାପଡିଛି। ସୂଚନାଯୋଗ୍ୟ, ପୋଲିସ ସିଭାଦାସନଙ୍କୁ ମୃତ ବୋଲି କହି ପୋଷ୍ଟମର୍ଟମ ପାଇଁ ତ୍ରିଶୁରର ଜୁବଲୀ ମିଶନ ହସ୍ପିଟାଲକୁ ନେଇଥିଲେ। ଏହାପୂର୍ବରୁ ତାଙ୍କର ଏକ ଫଟୋ ଉଠାଇବା ପାଇଁ ଟୋମିଙ୍କୁ ଡକାଇଥିଲେ।
