ମହାମାରୀ କରୋନା ସମୟରେ ଡାକ୍ତରମାନେ ନିଜ ଜୀବନକୁ ବାଜି ଲଗାଇ ଦିନରାତି ଏକ କରି ରୋଗୀମାନଙ୍କ ସେବା କରିବାରେ ଲାଗିପଡ଼ିଛନ୍ତି। ତେବେ ଏତିକିବେଳେ ଜଣେ କରୋନା ଯୋଦ୍ଧା ଆଉ ପାଦେ ଆଗକୁ ଯାଇ ସମସ୍ତଙ୍କ ପାଇଁ ଉଦାହରଣ ପାଲଟିଛନ୍ତି। ଜଣେ ୬ ମାସର ଶିଶୁଙ୍କ ମା’ବାପା କରୋନା ପଜିଟିଭ ଜଣାପଡ଼ିବା ପରେ ସେ ଶିଶୁଟିକୁ ନିଜ ପାଖରେ ରଖି ତା’ର ସମସ୍ତ ଦାୟିତ୍ୱ ନେଇଛନ୍ତି। ଏହି ଡାକ୍ତର ଜଣଙ୍କ ହେଲେ କେରଳର ମୈରୀ ଅନିତା।
ଏଲଭିନଙ୍କ ମା’ ବାପା କେରଳର ଗୁରୁଗ୍ରାମର ଏକ ହେଲ୍ଥ କେୟାର ସେଣ୍ଟରରେ ନର୍ସଭାବେ କାର୍ଯ୍ୟ କରୁଥିଲେ। ଗତ ମାସରେ ଏଲଭିନଙ୍କ ବାପା କରୋନା ପଜିଟିଭ୍ ବୋଲି ଜଣାପଡ଼ିଥିଲା। ଏହା ପରେ ସେ ହସ୍ପିଟାଲରେ ରହି ଚିକିତ୍ସିତ ହେଲେ। ଏହାର କିଛି ଦିନ ପରେ ଏଲଭିନଙ୍କ ମା’ ମଧ୍ୟ କରୋନା ଆକ୍ରାନ୍ତ ହୋଇ ଚିକିତ୍ସିତ ହେଲେ। ପରେ ଏକ ଚାଇଲ୍ଡ ଓ୍ବେଲ୍ଫେୟାର କମିଟି ଏଲ୍ଭିନ୍ଙ୍କ ଦାୟିତ୍ୱ ନେଲା। କିନ୍ତୁ ଶିଶୁଟି କିଛି ଦିନ ମା’ଙ୍କ ସହ ରହିଥିବାରୁ ତାଙ୍କୁ କରୋନା ହେବାର ସମ୍ଭାବନା ଅଧିକ ଥିଲା। ତେଣୁ ଚାଇଲ୍ଡ ଓ୍ବେଲ୍ଫେୟାର କମିଟି ଅନୁମତିରେ ଡା. ମୈରୀ ଜୁନ୍ ୧୫ରୁ ଏଲଭିନଙ୍କୁ ନେଇ ନିଜର ଖାଲି ଥିବା ଏକ ଫ୍ଲାଟରେ ରଖିଥିଲେ। ମୈରୀଙ୍କର ନିଜର ୩ ପିଲା ଅଛନ୍ତି। ମୈରୀ ଏଲଭିନଙ୍କର ଦେଖାଶୁଣା କରିବା ସହ ତାଙ୍କ ମା’ବାପାଙ୍କ ସହ ପ୍ରତିଦିନ ଭିଡିଓ କଲ୍ରେ ମଧ୍ୟ କଥା କରାଉଛନ୍ତି। ବର୍ତ୍ତମାନ ଏଲଭିନଙ୍କ ମା’ବାପା ଠିକ୍ ଅଛନ୍ତି। ମୈରୀ ଆମପାଇଁ ଭଗବାନ ବୋଲି ଏଲଭିନଙ୍କ ମା’ କହିଛନ୍ତି।
