କେନ୍ଦୁଝର,୧୮ା୩(ସ୍ବ.ପ୍ର.): କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାର ଗୁରୁତ୍ୱପୂର୍ଣ୍ଣ ଡାଇରିଆ ଓ ଟିବି ଓ୍ବାର୍ଡ ଶୁକ୍ରବାର ଅନ୍ଧାରରେ ରହିଥିଲା। ଦିନ ୩.୩୦ରୁ ଲାଇନ କଟିଯାଇଥିବାରୁ ରୋଗୀ ଓ ସ୍ବାସ୍ଥ୍ୟ କର୍ମଚାରୀ ଅକଥନୀୟ ସମସ୍ୟା ଭୋଗୁଛନ୍ତି। ଏହିଭଳି ପ୍ରତ୍ୟେକ ଦିନ ବିଦ୍ୟୁତ କାଟ୍ ହେଉଥିବାରୁ ରୋଗୀ ହନ୍ତସନ୍ତ ହେଉଛନ୍ତି। ଅନ୍ଧାରରେ ରୋଗୀମାନେ ମଶାଙ୍କ ପ୍ରାଦୁର୍ଭାବରେ ଅସ୍ତବ୍ୟସ୍ତ ହୋଇ ପଡୁଥିବା ବେଳେ ରୋଗୀ ସେବାରେ ନିୟୋଜିତ କର୍ମଚାରୀମାନେ ରୋଗୀଙ୍କୁ ସାଇଲାଇନ, ଇଞ୍ଜେକ୍ସନ, ଔଷଧ ଦେବାରେ ଅସୁବିଧା ଭୋଗୁଛନ୍ତି। ସେହିପରି ଡାକ୍ତରମାନେ ମଧ୍ୟ ଟର୍ଚ୍ଚ, ମୋବାଇଲ ଲାଇଟ୍ରେ ସେବା କରିବାକୁ ବାଧ୍ୟ ହେଉଛନ୍ତି। ଦୀର୍ଘ ମାସ ହେଲା ଡିଜିର ଚେଞ୍ଜ ଓଭର ଖରାପ ହୋଇଯାଇଥିଲେ ହେଁ ସଜଡ଼ା ଯାଉ ନ ଥିବାରୁ ଏଭଳି ପରିସ୍ଥିତି ଉପୁଜିଛି ବୋଲି ଜଣାପଡ଼ିଛି। ଡାକ୍ତରଖାନାକୁ ରୋଗୀ ସେବା ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଥିବା ବେଳେ ଏଥିପ୍ରତି ସ୍ବାସ୍ଥ୍ୟ ବିଭାଗ ପକ୍ଷରୁ ପଦକ୍ଷେପ ନିଆଯାଉ ନ ଥିବାରୁ ରୋଗୀ ଓ ସେମାନଙ୍କ ସମ୍ପର୍କୀୟମାନେ ଅସନ୍ତୋଷ ବ୍ୟକ୍ତ କରିଛନ୍ତି। ଲାଇନ କାଟି ବିଦ୍ୟୁତ ବିଭାଗ କାମ କରୁଥିବାରୁ ଏଭଳି ସମସ୍ୟା ଦେଖାଦେଇଛି। କିଛି ସମୟ ପରେ ଲାଇନ ଆସିଯିବ ବୋଲି ହସ୍ପିଟାଲ ମ୍ୟାନେଜର ସୁଚିସ୍ମିତା ଦାସ କହିଛନ୍ତି।
