ଭଞ୍ଜନଗର,୨୦।୧୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଦୀର୍ଘ ୮ ବର୍ଷ ପରେ ଶନିବାର ସନ୍ଧ୍ୟାରେ ତ ବାର୍ଷିକ ଉତ୍ସବ ପାଳନ କରିଛି। ୨୦୧୭ ମସିହାରେ ଶେଷ ଥର ପାଇଁ ବାର୍ଷିକ ଉତ୍ସବ ହୋଇଥିଲା। ପରବର୍ତ୍ତୀ ପର୍ଯ୍ୟାୟରେ କରୋନା ସମେତ ଅନ୍ୟାନ୍ୟ କାରଣ ଯୋଗୁ ବାର୍ଷିକ ଉତ୍ସବ ପାଳନ ହୋଇପାରି ନ ଥିଲା । କେବଳ ବାର୍ଷିକ କ୍ରୀଡ଼ା ପ୍ରତିଯୋଗିତା ହେଉଥିଲା। ୮ ବର୍ଷ ପରେ ଶନିବାର ସନ୍ଧ୍ୟାରେ
ସ୍ଥାନୀୟ ଚକାଡୋଳା ରିସର୍ଟରେ ବାର୍ଷିକ ଉତ୍ସବ ପାଳନ ହୋଇଥିଲା। ଭଞ୍ଜନଗର ଉପ ଜିଲାପାଳ ଉମା ଶଙ୍କର ବେହେରା ମୁଖ୍ୟ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଏହି ଅବସରରେ ସେ କହିଥିଲେ ଯେ, ଛାତ୍ରୀଛାତ୍ରମାନେ ସର୍ବଦା ଧର୍ଯ୍ୟ ରଖନ୍ତୁ, ଭୁଲ ହେଲେ ଧର୍ଯ୍ୟ ହରା ହେବା ନାହିଁ, ଚେଷ୍ଟା ଜାରି ରଖିଲେ ସଫଳତା ନିଶ୍ଚିତ ମିଳିବ। କେନ୍ଦ୍ରୀୟ ବିଦ୍ୟାଳୟ ନୂତନ କୋଠା କାମ ତୁରନ୍ତ ଆରମ୍ଭ ହେବ। ଯୁକ୍ତ ୨ ଚଳିତ ବର୍ଷ ଖୋଲିବା ପାଇଁ ପଦକ୍ଷେପ ନିଆଯାଇଛି ବୋଲି ଉପ ଜିଲାପାଳ କହିଥିଲେ। ଏଥିସହ ସେ କହିଥିଲେ ଯେ, ଭଲ ମଣିଟିଏ ହୁଅନ୍ତୁ। ନିଜର ଆଚାର ବ୍ୟବହାର ଭଲ କରିବା। ଅଭିଭାବକ ମାନେ ନିଜ ଛୁଆ ଉପରେ ଭବିଷ୍ୟତ ଗଢ଼ିବା ପାଇଁ ଚାପ ପକାନ୍ତୁ ନାହିଁ। ଛାତ୍ରୀଛାତ୍ର ମାନେ ନିଜ ଭବିଷ୍ୟତ ନିଜେ ବାଛନ୍ତୁ । ଏଥିପ୍ରତି ଅଭିଭାବକ ମାନେ ସଚେତନ ହେବାକୁ ଉପ ଜିଲାପାଳ ବେହେରା ଉପସ୍ଥିତ ଅଭିଭାବକଙ୍କୁ ଆହ୍ବାନ କରିଥିଲେ। ଅନ୍ୟମାନଙ୍କ ମଧ୍ୟରେ ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ଶିକ୍ଷକ ଶିକ୍ଷା ମହାବିଦ୍ୟାଳୟ ଅଧକ୍ଷ ଡ. ଦିଲ୍ଲୀପ କୁମାର ଖୁଣ୍ଟିଆ ସମ୍ମାନୀତ ଅତିଥି ଭାବେ ଯୋଗଦେଇ ଛାତ୍ରୀଛାତ୍ର ମାନଙ୍କ ମଧ୍ୟରେ ସଂସ୍କାର ଲୋଡା ବୋଲି କହିଥିଲେ। ଏଥିସହ ସେ କହିଥିଲେ ଛାତ୍ରୀଛାତ୍ର, ଶିକ୍ଷକ, ସମାଜ ଏବଂ ଅଭିଭାବକ ମଧ୍ୟରେ ସମନ୍ବୟ ରହିଲେ। ଗୁଣାତ୍ମକ ତଥା ସଂସ୍କାର ମୂଳକ ଶିକ୍ଷାର ବିକାଶ ହୋଇପାରିବ । ଶିକ୍ଷା ଭାରତୀୟ ଜ୍ଞାନ ପରମ୍ପରା ଭିତ୍ତିକ ହେବା ଦରକାର ବୋଲି ସେ କହିଥିଲେ । ବିଦ୍ୟାଳୟ ଅଧକ୍ଷ ପ୍ରଦୀପ କମାନୁ ସଭାରେ ଅଧ୍ୟକ୍ଷତା କରିଥିଲେ। ବିଦ୍ୟାଳୟର ଛାତ୍ରୀଛାତ୍ର୍ମାନେ କ୍ରୀଡ଼ା ଏବଂ ଶିକ୍ଷା କ୍ଷେତ୍ରରେ ବହୁ ଆଗକୁ ବଢିଛନ୍ତି । ଯାହା ଆମ ପାଇଁ ଗର୍ବର ବିଷୟ ବୋଲି ଅଧକ୍ଷ କହିଥିଲେ। ଛାତ୍ରୀ ସମ୍ୟଶ୍ରି ଚଇନି, ବୈଶାଳୀ ପ୍ରିୟଦର୍ଶିନୀ ଦାସ, ସାଇ ଜଗତ୍ ଜନନୀ ପାଳ, ସୁପ୍ରିୟା ମଲ୍ଲିକ ସଭାକୁ ସଂଯୋଜନା କରିଥିଲେ।
ଶିକ୍ଷକ ଜ୍ୟୋତି ପ୍ରକାଶ ସାହୁ ଧନ୍ୟବାଦ ପ୍ରଦାନ କରିଥିଲେ। କାର୍ଯ୍ୟକ୍ରମକୁ ପରିଚାଳନା କରିବାରେ ବିଦ୍ୟାଳୟର ସମସ୍ତ ଶିକ୍ଷକ, ଶିକ୍ଷୟତ୍ରୀ, କର୍ମଚାରୀ ସହଯୋଗ କରିଥିଲେ।
