ବେଙ୍ଗାଲୁରୁ,୮ା୪: ୨୦୨୩ କର୍ନାଟକ ନିର୍ବାଚନ ପୂର୍ବରୁ ନେତାଙ୍କ ଦଳ ପରିବର୍ତ୍ତନ ଆରମ୍ଭ ହୋଇଯାଇଛି। ଏହି ପରିପ୍ରେକ୍ଷିରେ ଜେଡିଏସ୍କୁ ଏକ ବଡ଼ ଝଟକା ଲାଗିଛି। ଜେଡିଏସ୍ ନେତା ଅବ୍ଦୁଲ ଅଜିଜ୍ ଶନିବାର ଦଳରୁ ଇସ୍ତଫା ଦେଇଛନ୍ତି। ସେ ନରସିଂହରାଜ ବିଧାନସଭା ନିର୍ବାଚନମଣ୍ଡଳୀରୁ ଟିକେଟ ମାଗିଥିଲେ। ହେଲେ ଟିକେଟ ନ ମିଳିବାରୁ ସେ ଈର୍ଷାନ୍ବିତ ହୋଇ ଦଳର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଥିବା ସୂଚନା ମିଳଛି। ଏପରିକି ଅବ୍ଦୁଲ ତାଙ୍କ ଇସ୍ତଫାପତ୍ର ରାଜ୍ୟ ସଚିବ ଏବଂ ସଭାପତିଙ୍କୁ ପ୍ରଦାନ କରିଥିବା ଜଣାପଡ଼ିଛି।
ସୂଚନାନୁସାରେ, ଅବ୍ଦୁଲଙ୍କ ଇସ୍ତଫା ପରେ ଜେଡିଏସ୍ ପକ୍ଷରୁ ଉକ୍ତ ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ଘୋଷଣା କରାଯାଇ ନାହିଁ। ଅନ୍ୟପକ୍ଷେ ଅବ୍ଦୁଲ ତାଙ୍କ ସମର୍ଥକଙ୍କ ସହ ଶନିବାର ବେଙ୍ଗାଲୁରୁରେ କଂଗ୍ରେସ ବିଧାନସଭା ଦଳର ନେତା ସିଦ୍ଦାରମେୟାଙ୍କୁ ଭେଟିଛନ୍ତି। ଏହି ବୈଠକ ପରେ ସେ ଖୁବ୍ଶୀଘ୍ର କଂଗ୍ରେସରେ ଯୋଗଦେବାର ସମ୍ଭାବନା ଦେଖାଦେଇଛି।
ବିରୋଧୀ କଂଗ୍ରେସ ପ୍ରଥମ ଏବଂ ଦ୍ୱିତୀୟ ପର୍ଯ୍ୟାୟରେ ୧୧୬ ପ୍ରାର୍ଥୀଙ୍କ ନାମ ଘୋଷଣା କରିଥିବା ବେଳେ ଜେଡିଏସ୍ ବର୍ତ୍ତମାନ ସୁଦ୍ଧା ୯୩ ପ୍ରାର୍ଥୀଙ୍କ ନାମ ଘୋଷଣା କରିଛି। ହେଲେ ଭାଜପା ଏପର୍ଯ୍ୟନ୍ତ ପ୍ରଥମ ତାଲିକା ଘୋଷଣା କରିନାହିଁ। ଉଲ୍ଲେଖଯୋଗ୍ୟ, ମେ ୧୦ରେ କର୍ନାଟକରେ ଗୋଟିଏ ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହେବ। ୧୩ରେ ଭୋଟ ଗଣନା ହେବ।
