ପଟ୍ଟାମୁଣ୍ଡାଇ,୨୬ା୧(କଳ୍ପତରୁ ନାୟକ): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ସହରରେ କାଞ୍ଜିଆହୁଦା ଯୋଜନା ପ୍ରହସନରେ ପରିଣତ ହୋଇଛି। ଦିନ ହେଉ କି ରାତି ସହରର ରାସ୍ତାଗୁଡ଼ିକ କାଞ୍ଜିଆହୁଦା ପାଲଟିଛି। ବିଭିନ୍ନ ଛକରେ ମାଳମାଳ ଗୋରୁ ଗୋଠରେ ପଡ଼ି ରହିଲା ଭଳି ରାସ୍ତାରେ ଶୋଇ ରହୁଥିବା ଦେଖାଯାଉଛି। ଯାହା ଅନେକ ସମୟରେ ଲୋକଙ୍କ ପାଇଁ ବିପଦର କାରଣ ହୋଇ ଦୁର୍ଘଟଣା ଘଟୁଛି। ସହରରେ କାଞ୍ଜିଆହୁଦା ଥିଲେ ମଧ୍ୟ ତାହା କାର୍ଯ୍ୟକାରୀ ହେଉନାହିଁ। ଏଠାରେ ଗୋଶାଳା କି ଅନ୍ୟ କୌଣସି ବ୍ୟବସ୍ଥା ନାହିଁ। ଫଳରେ ସହରରେ ବୁଲା ଗୋରୁଙ୍କ ସଂଖ୍ୟା ବଢ଼ିବାରେ ଲାଗିଛି। ସହରାଞ୍ଚଳରେ ଗୋ ପ୍ରାଣୀଙ୍କ ଉପରେ ସୁପ୍ରିମକୋର୍ଟ କଟକଣା ଲଗାଇଥିଲେ ସୁଦ୍ଧା କୋର୍ଟଙ୍କ ଏହି ନିର୍ଦ୍ଦେଶ ଫାଇଲ ଭିତରେ ରହିଯାଇଛି। ଗୋରୁଗୁଡିକ ବାହାରେ ବୁଲୁଥିବାରୁ ଗୋ ଚାଲାଣକାରୀମାନେ ଏହାର ଫାଇଦା ଉଠାଉଛନ୍ତି। ସେମାନେ ରାତିରେ ରାସ୍ତା ଉପରୁ ଏହି ପ୍ରାଣୀମାନଙ୍କୁ ଟ୍ରକ୍ରେ ଉଠାଇ ବାହାରକୁ ଚାଲାଣ କରୁଥିବା ନେଇ କିଛି ମାସ ପୂର୍ବେ ଗଣ୍ଡଗୋଳ ଘଟି ମାମଲା ହୋଇଥିଲା। ପ୍ରଶାସନର ଏଭଳି ଖାମଖିଆଲ ନୀତି ପାଇଁ ସାଧାରଣରେ ଅସନ୍ତୋଷ ବୃଦ୍ଧି ପାଉଛି। ବୁଦ୍ଧିଜୀବୀ ରମେଶ ଦାସ କୁହନ୍ତି, ବୁଲା ଷଣ୍ଢ, ଗାଈ, ଛେଳି ଓ ମେଣ୍ଢା ଆଦି ପ୍ରାଣୀଙ୍କ ଯୋଗୁ ଲୋକଙ୍କ ଫସଲହାନିକୁ ରୋକିବା ଦିଗରେ ପଟ୍ଟାମୁଣ୍ଡାଇ ସହର ମଧ୍ୟଭାଗରେ ବହୁ ଦିନରୁ ଏକ କାଞ୍ଜିଆହୁଦା କରାଯାଇଥିଲା। ମାତ୍ର ପୌର କର୍ମଚାରୀଙ୍କ ଖାମଖିଆଲ ନୀତି ଯୋଗୁ କାଞ୍ଜିଆଘର ମରାମତି ନ ହୋଇ ଭାଙ୍ଗିରୁଜି ଗଲାଣି। ଏଠାରେ ରହୁଥିବା ଗୋରୁଙ୍କ ସୁରକ୍ଷା, ଖାଦ୍ୟପେୟ ତଥା ସ୍ବାସ୍ଥ୍ୟଗତ ସମସ୍ୟା ସୁଧାରିବାରେ ପୌର ପରିଷଦ ଧ୍ୟାନ ଦେଉନାହିଁ। କାଞ୍ଜିଆଘରେ ନେଇ ଗୋରୁଙ୍କୁ ରଖିଲେ ବି ସେମାନଙ୍କର ଯନତ୍ ନେଉନାହାନ୍ତି। ପୌର ପରିଷଦ କର୍ମଚାରୀଙ୍କ ଖାମଖିଆଲ ମନୋଭାବ ଯୋଗୁ ଏବେ କାଞ୍ଜିଆଘରେ ଗୋରୁ ରହୁନାହାନ୍ତି। ଫଳରେ ରାଜରାସ୍ତା ପାଲଟିଛି ଗୁହାଳ।
ଯୁବନେତା ସତ୍ୟପ୍ରିୟ ସାମଲ କୁହନ୍ତି, ଏଠାରେ ଥିବା କାଞ୍ଜିଆହୁଦା ଦୀର୍ଘବର୍ଷ ହେଲା ବନ୍ଦ ହୋଇପଡ଼ିଛି। ଫଳରେ ବୁଲା ଗୋରୁଙ୍କ ସଂଖ୍ୟା ବୃଦ୍ଧି ଯୋଗୁ ଟ୍ରାଫିକ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ସହରର ଜନସଂଖ୍ୟା ବୃଦ୍ଧି ସହିତ ନୂତନ ଜନବସତି ଗଢ଼ିଉଠିଛି। ବିଜୁ ପଟ୍ଟନାୟକ ଛକ, ଆମ୍ବେଡ଼କର ଛକ ଓ ମେଡିକାଲ ଛକରେ ଗୋରୁ ଶୋଇ ରହୁଛନ୍ତି। ପୂର୍ବରୁ ରାସ୍ତାରେ ବିଚରଣ କରୁଥିବା ଗୋରୁଙ୍କୁ ଉଦ୍ଧାର କରି କାଞ୍ଜିଆହୁଦାରେ ରଖାଯାଉଥିଲା। ଜରିମାନା ଆଦାୟ ପରେ ଗୋରୁଗୁଡିକୁ ମାଲିକଙ୍କୁ ହସ୍ତାନ୍ତର କରାଯାଉଥିଲା। ଫଳରେ ଲୋକଙ୍କ ମଧ୍ୟରେ ଭୟ ରହୁଥିଲା। କିନ୍ତୁ କାଞ୍ଜିଆହୁଦା ନିଜର ଅସ୍ଥିତ୍ୱ ହରାଇଛି। କାଞ୍ଜିଆହୁଦା ଭାଙ୍ଗିରୁଜି ଯାଇଥିବାରୁ ଲୋକେ ଗୋରୁଗୁଡିକୁ ରାସ୍ତାରେ ଛାଡ଼ି ଦେଉଛନ୍ତି। ଏ ଦିଗରେ ପୌର ପରିଷଦ ଆବଶ୍ୟକ ପଦକ୍ଷେପ ନେବାକୁ ଦାବି ହେଉଛି। ସାମାଜିକକର୍ମୀ ପ୍ରବୀର ନାୟକ କୁହନ୍ତି, ଏବେ ପଟ୍ଟାମୁଣ୍ଡାଇ ସହର ବୁଲା ଗୋରୁଙ୍କ ନିରାପଦ ଆଶ୍ରୟସ୍ଥଳୀ ପାଲଟିଛି। ମୁଖ୍ୟ ରାସ୍ତା ସହ ବିଭିନ୍ନ ଛକରେ ଦୈନିକ ବହୁ ବୁଲା ଗୋରୁ ଶୋଇରହି ଅସୁବିଧା ସୃଷ୍ଟି କରୁଥିବାରୁ ଯାନବାହନ ଚଳାଚଳ,ସାଧାରଣ ଯାତାୟାତ ବାଧାପ୍ରାପ୍ତ ହେଉଛି। ଗୋରୁ ଓ ଷଣ୍ଢଙ୍କ ମଧ୍ୟରେ ମରାମରି ଓ ମୁଖ୍ୟରାସ୍ତା ଅବରୋଧ ଯୋଗୁ ବିଭିନ୍ନ ସମୟରେ ଛୋଟ ବଡ଼ ଦୁର୍ଘଟଣା ଘଟି ପଥଚାରୀ ଓ ଗାଡ଼ି ଚାଳକମାନେ ଆହତ ହେଉଛନ୍ତି। ହେଲେ ଏ ଦିଗରେ ସ୍ଥାନୀୟ ପୌର କର୍ତ୍ତୃପକ୍ଷ ଆଦୌ ଦୃଷ୍ଟି ଦେଉ ନ ଥିବା ବିଭିନ୍ନ ମହଲରୁ ତଥା ବଜାରର ବ୍ୟବସାୟୀମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ପୌରନିର୍ବାହୀ ଅଧିକାରୀ ରଞ୍ଜନ ଦାଶଙ୍କୁ ପଚାରିବାରେ ଏଠାରେ ଥିବା କାଞ୍ଜିଆହୁଦା ବହୁତ ଛୋଟ। ସହରରେ ବୁଲୁଥିବା ଗୋରୁଙ୍କୁ ସେଠାରେ ରଖାଗଲେ ମଧ୍ୟ ଅନେକ ବାହାରେ ବୁଲୁଛନ୍ତି। ଗୋଶାଳା ଓ କାଞ୍ଜିଆହୁଦା କରାଯିବା ନେଇ ଯୋଜନା ଚାଲିଛି ବୋଲି ସେ କହିଛନ୍ତି।