ଫୁଲବାଣୀ ଅଫିସ, ୩ା୪: ଦୀର୍ଘ ଦିନର ବ୍ୟବଧାନ ପରେ କନ୍ଧମାଳ ଜିଲାକୁ ପୁଣି ଫେରିିଛି କଣ୍ଟେନ୍ମେଣ୍ଟ। ସହରର ୨ ନଂ. ୱାର୍ଡ ୮ ଏବଂ ୫ ନଂ. ୱାର୍ଡରେ ଜଣେ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସଂକ୍ରମଣକୁ ରୋକିିବା ପାଇଁ ଜିଲା ପ୍ରଶାସନ ପକ୍ଷରୁ ଏହି ୨ଟି ଓ୍ବାର୍ଡକୁ ଶନିବାର ମାଇକ୍ରୋ କଣ୍ଟେନ୍ମେଣ୍ଟ ଜୋନ୍ ଭାବେ ଘୋଷଣା କରାଯାଇଛି। ଏହି ଅଞ୍ଚଳକୁ ପ୍ରବେଶ ଏବଂ ପ୍ରସ୍ଥାନ ଉପରେ କଟକଣା ଲାଗୁ କରାଯାଇଛି। ଡାକପାଲାର ସ୍କୁଲ ସାହି ଅଞ୍ଚଳକୁ କଣ୍ଟେନ୍ମେଣ୍ଟ କରାଯାଇଥିବାରୁ ୱାର୍ଡ ପ୍ରବେଶ ପଥରେ ପୋଲିସ ପକ୍ଷରୁ ଏକ ଅସ୍ଥାୟୀ ଚେକ୍ପୋଷ୍ଟ କରାଯାଇଛି। ଫୁଲବାଣୀ ତହସିଲଦାର ଦୀନମଣି ନାୟକଙ୍କୁ ମାଜିଷ୍ଟ୍ରେଟ, ଡାକପାଲା ୟୁପି ସ୍କୁଲ ଶିକ୍ଷୟିତ୍ରୀ ମିନାକ୍ଷୀ ପ୍ରଧାନ ଏବଂ ମାଷ୍ଟରପଡା ୟୁପି ସ୍କୁଲ ଶିକ୍ଷକ ହେମନ୍ତ ମିଶ୍ରଙ୍କୁ ନୋଡାଲ ଅଫିସର ଦାୟିତ୍ୱ ଦିଆଯାଇଛି। ନୋଡାଲ ଅଫିସର ସେଠାକାର ଲୋକମାନଙ୍କୁ କୋଭିଡ୍ ବିଷୟରେ ସଚେତନ କରାଇବେ। ସେହିପରି ଲୋକମାନଙ୍କୁ ପନିପରିବା ଏବଂ ଅତ୍ୟାବଶ୍ୟକ ସାମଗ୍ରୀ ଯୋଗାଣ ଲାଗି ପୌର ପରିଷଦ ନିର୍ବାହୀ ଅଧିକାରୀ ବଳଦେବ ବେହେରାଙ୍କୁ ଦାୟିତ୍ୱ ଦିଆଯାଇଛି।
