ଆନନ୍ଦପୁର,୨୨ା୩(ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ଆନନ୍ଦପୁର ବ୍ଲକର ବିଭିନ୍ନ ସ୍ଥାନରେ କାଳବୈଶାଖୀ ତାଣ୍ଡବ ରଚିଛି। କାଳବୈଶାଖୀ ପ୍ରଭାବରେ ଅନେକ ଘରର ଚାଳ ଛପର ଉଡ଼ାଇ ନେଇଯାଇଥିବା ବେଳେ ବି-୧୧ କେଭି ବିଦ୍ୟୁତ ଖୁଣ୍ଟକୁ ଭାଙ୍ଗି ଦେଇଛି ଏବଂ ବଡ଼ବଡ଼ ଗଛ ଉପାଡ଼ି ଦେଇଥିବା ଦେଖିବାକୁ ମିଳିଛି। ଶୁକ୍ରବାର ରାତି ୮/୩୦ରେ କାଳ ବୈଶାଖୀ ପ୍ରଭାବରେ ପବନ ସାଙ୍ଗକୁ ବର୍ଷା କୁଆପଥର ମାଡ଼ରେ କଣ୍ଟିପାଳ ପଞ୍ଚାୟତର ବାରୁଆଁ ଗ୍ରାମର ଜଗନ୍ନାଥ ନାୟକଙ୍କ ୪ ବଖରା ଘରର ଆଜେବେଷ୍ଟସ୍ ସମ୍ପୂର୍ଣ୍ଣ ଉଡ଼ାଇ ଫିଙ୍ଗି ଦେଇଥିବା ବେଳେ ସେହି ଗ୍ରାମର କରବୀର ନାୟକଙ୍କ ଘରେ ଏକ ଗଛ ପଡି ଘର ଭାଙ୍ଗି ଦେଇଥିଲା। ସେହିପରି ବାଉଁଶଗଡ଼ ପଞ୍ଚାୟତର ବାଲିଯୋଡ଼ି ଗ୍ରାମରେ ୧୧ କେଭି ଲାଇନ ଡିପି ଭାଙ୍ଗିଯାଇଥିବା ବେଳେ ସେହି ଗ୍ରାମର ଅର୍ଜୁନ ହୋଙ୍କ ୩ ବଖରା ଘରର ସମ୍ପୂର୍ଣ୍ଣ ଆଜବେଷ୍ଟସ୍ ଉଡ଼ାଇ ଫିଙ୍ଗି ଦେଇଛି। ଯାହାଫଳରେ ପରିବାର ଲୋକେ ରାତି ତମାମ ବର୍ଷାରେ ଭିଜି ଭିଜି ରାତି କଟାଇଛନ୍ତି l ଘରେ ଥିବା ସମସ୍ତ ଆସବାବପତ୍ର ବର୍ଷାରେ ଭିଜି ନଷ୍ଟ ହୋଇଯାଇଥିବାରୁ ଲୋକଙ୍କ ମେରୁଦଣ୍ଡ ଭାଙ୍ଗିଯାଇଛି ସରକାର ତରଫରୁ ସେମାନଙ୍କୁ ସହାୟତା ପାଇଁ ଗ୍ରାମବାସୀ ଅନୁରୋଧ କରିଛନ୍ତି।
