ଭୁବନେଶ୍ୱର,୧୧ା୧୧: ନିଶାଦ୍ରବ୍ୟ ଜବତ ମାମଲାରେ ଖୋର୍ଦ୍ଧା ଜୁଭେନାଇଲ ଜଷ୍ଟିସ ବୋର୍ଡ କୋର୍ଟରେ ରାୟ ପ୍ରକାଶ ପାଇଛି। ବିଚାରପତି ଚିନ୍ମୟ ରଥ ଏହି ମାମଲାର ବିଚାର କରି ଜଣେ ନାବାଳକଙ୍କୁ ଦୋଷୀ ସାବ୍ୟସ୍ତ କରି ଦଣ୍ଡ ଶୁଣାଇଛନ୍ତି। ଏହି ଅପରାଧ ପାଇଁ ନାବାଳକଙ୍କୁ ୩ ବର୍ଷ ଦଣ୍ଡାଦେଶ ଶୁଣାଇବା ପରେ ତାଙ୍କୁ ବ୍ରହ୍ମପୁରରେ ଥିବା ସ୍ବତନ୍ତ୍ର ହୋମ୍କୁ ପଠାଇ ଦିଆଯାଇଛି। ଅପରପକ୍ଷେ ନାବାଳକଙ୍କ ସଂସ୍କାରମୂଳକ ଆବଶ୍ୟକ ପଦକ୍ଷେପ ନେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଶିକ୍ଷା ,ଦକ୍ଷତା,ଆଚରଣରେ ସଂଶୋଧନ ଆଦି ସେବା ଯୋଗାଇଦେବାକୁ ପରାମର୍ଶ ଦିଆଯାଇଛି । ୧୧ ଜଣ ସାକ୍ଷୀ ଏବଂ ୪୪ ଟି ଦସ୍ତାବିଜ କୋର୍ଟ ରାୟ ଶୁଣାଇଥିଲେ। ତେବେ ନିଶାଦ୍ରବ୍ୟ ମାମଲାରେ ଜଣେ ନାବାଳକଙ୍କୁ ଦୋଷୀ ସାବ୍ୟସ୍ତ କରିବା ଓଡିଶାରେ ପ୍ରଥମ ଘଟଣା ବୋଲି ଏସ୍ଟିଏଫ୍ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ, ୨୦୨୧ରେ ବ୍ରାଉନସୁଗାର କାରବାର ଅଭିଯୋଗରେ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ହାତରେ ନାବାଳକଙ୍କ ସମେତ ୩ ଜଣ ଖୋର୍ଦ୍ଧା ବସ୍ଷ୍ଟାଣ୍ଡ ନିକଟରେ ଧରାପଡ଼ିଥିଲେ। ଯାଞ୍ଚ ସମୟରେ ସେମାନଙ୍କଠାରୁ ୧ କେଜି ୨୬୮ ଗ୍ରାମ ବ୍ରାଉନସୁଗାର ଜବତ ହୋଇଥିଲା। ଆର୍ଥିକ ଲାଭ ପାଇଁ ସେମାନେ ବ୍ରାଉନସୁଗାର କାରବାର କରୁଥିବା ଏସ୍ଟିଏଫ୍ ଆଗରେ ସ୍ବୀକାର କରିଥିଲେ। ଏହାପରେ ଏସ୍ଟିଏଫ୍ ଏନ୍ଡିପିଏସ୍ ମାମଲା ପଞ୍ଜୀକୃତ କରିଥିଲା। ଏହି ମାମଲାକୁ ସରକାରଙ୍କ ପକ୍ଷରୁ ପବ୍ଲିକ ପ୍ରସିକ୍ୟୁଟର ରୁପା ରଞ୍ଜନ ମିଶ୍ର ପରିଚାଳନା କରିଥିଲେ।
