ଯୋଡ଼ା,୧୧ା୭(ମାନସ ମହାନ୍ତି): କେନ୍ଦୁଝର ଜିଲା ଯୋଡ଼ା ସହର ଦେଇ ଯାଇଥିବା ଜୁରୁଡ଼ି ବାମେବାରି ରାସ୍ତା ମରଣଯନ୍ତା ପାଲଟିଛି। ଜରିବାହାଲ, ଆନ୍ତରାମାନ୍ତର ଛକ ନିକଟରେ ବଡ଼ ବଡ଼ ଖାଲ ସୃଷ୍ଟି ହୋଇଛି। ରାସ୍ତା ଦେଇ ବିଭିନ୍ନ ଖଣି କମ୍ପାନୀ ଖଣିଜ ପରିବହନ କରିଥାଆନ୍ତି। ଦୈନିକ ହଜାର ହଜାର ଭାରିଯାନ ଚଳାଚଳ କରିଥାଏ। ଫଳରେ ରାସ୍ତା ଅବସ୍ଥା ଅଧିକ ବିପର୍ଯ୍ୟସ୍ତ ହେଉଛି। ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଯେ, ବର୍ଷକ ପୂର୍ବେ ଏକ ଠିକା ସଂସ୍ଥା ରାସ୍ତାକୁ ନିର୍ମାଣ କରିଥିଲା। ତେବେ ଠିକା ସଂସ୍ଥା ଉକ୍ତ ଛକଠାରୁ ରେଳ ଓଭର ବ୍ରିଜ ପର୍ଯ୍ୟନ୍ତ ରାସ୍ତାକୁ ନିର୍ମାଣ ନ କରି ରେଳ ବିଭାଗର ଅଞ୍ଚଳ ବୋଲି ଛାଡ଼ି ଦେଇଥିଲା। ଏକ ବର୍ଷ ପୂର୍ବେ ରାସ୍ତାରେ ଛୋଟ ଛୋଟ ଖାଲ ସୃଷ୍ଟି ହୋଇଥିଲା। ମରାମତି ନ ହେବାରୁ ବର୍ତ୍ତମାନ ଗଭୀର ଗର୍ତ୍ତ ସୃଷ୍ଟି ହୋଇଛି। ଖଣିଜ ବୋଝେଇ ଟ୍ରକ୍ ଚଳାଚଳ କରିବା ଦ୍ୱାରା ରାସ୍ତାର ଅବସ୍ଥା ଆହୁରି ଖରାପ ହୋଇଯାଇଛି। ବର୍ଷା ପାଣି ଜମି ଏକ ପ୍ରକାର ପୋଖରୀ ସୃଷ୍ଟି ହେଉଛି। ବର୍ଷା ଦିନ ଚାଲୁଥିବାରୁ ଉକ୍ତ ରାସ୍ତାରେ ଦୁଇ ଚକିଆ, ଚାରି ଚକିଆ ଯାନ, ଅଟୋ ରିକ୍ସା ପାସେଞ୍ଜର ବିପଦ ସଙ୍କୁଳ ଅବସ୍ଥାରେ ଯିବା ଆସିବା କରୁଛନ୍ତି। ଅନେକ ସମୟରେ ଦୁର୍ଘଟଣା ଘଟୁଛି। ଏ ନେଇ ସ୍ଥାନୀୟ ଅଞ୍ଚଳର ସୁରେନ୍ଦ୍ର ମହାନ୍ତି, ଦାଶରଥି ପେଣ୍ଠେଇ, ଶିବ ନାରାୟଣ ପ୍ରସାଦ, ବୁଲୁ ମିଶ୍ର ପ୍ରମୁଖ ଜୁରୁଡ଼ି ରେଳ ଷ୍ଟେଶନ ମ୍ୟାନେଜରଙ୍କୁ ଭେଟି ଉକ୍ତ ଓଭରବ୍ରିଜ୍ ରାସ୍ତା ମରାମତି ନିମନ୍ତେ ଜଣାଇଥିବା କହିଛନ୍ତି। ଡାଙ୍ଗୁଆପଶି ଓ ଚକ୍ରଧରପୁରସ୍ଥିତ ରେଳ ବିଭାଗ ଅଧିକାରୀଙ୍କୁ ଲିଖିତଭାବେ ଜଣାଇବେ ବୋଲି କହିଛନ୍ତି। ତେଣୁ ପ୍ରଶାସନ ବିପଦପୂର୍ଣ୍ଣ ରାସ୍ତାର ମରାମତି ଦିଗରେ ଦୃଷ୍ଟି ଦେବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।
