ନୂଆଦିଲ୍ଲୀ,୯।୧: ଦେଶର ପ୍ରମୁଖ ବାଣିଜି୍ୟକ ସଂସ୍ଥା ତଥା ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ (ଜେଏସ୍ପିଏଲ୍)ର ନୂତନ ଅଧିଗ୍ରହଣ କମ୍ପାନୀ ମୋନେଟ ପାୱାରର ଭିତ୍ତିଭୂମି ବିକାଶ କାର୍ଯ୍ୟରେ ଜେଏସପିଏଲ ପ୍ରାୟ ୧୫୦୦ କୋଟି ଟଙ୍କା ବିନିଯୋଗ କରିବ ବୋଲି ଜେଏସ୍ପିଏଲ୍ର ଏମ୍ଡି ବିମଳେନ୍ଦ୍ର ଝା ମତପ୍ରକାଶ କରିଛନ୍ତି। ଏପରିକି ମୋନେଟ ପାୱାର ପ୍ରୋଜେକ୍ଟକୁ କାର୍ଯ୍ୟକ୍ଷମ କରାଇବା ଦିଗରେ ଜେଏସପିଏଲ ବ୍ୟାପକ ପଦକ୍ଷେପ ଗ୍ରହଣ କରୁଥିବା ବିଷୟରେ ସେ ବିସ୍ତୃତ ମତବ୍ୟକ୍ତ କରିଛନ୍ତି।
ଉଲ୍ଲେଖଯୋଗ୍ୟ ଯେ ନିକଟରେ ମୋନେଟ ପାୱାରକୁ ଅଧିଗ୍ରହଣ କରିଥିବା ଜେଏସ୍ପିଏଲ୍ ଆଗାମୀ ଦିନରେ ଏହାକୁ କାର୍ଯ୍ୟକ୍ଷମ କରାଇବା ପାଇଁ ବ୍ୟାପକ ପ୍ରସ୍ତୁତି କରୁଥିବା ଜଣାପଡିଛି। ଏପରିକି ଆସନ୍ତା ୧୨ ରୁ ୧୮ ମାସ ମଧ୍ୟରେ ଜେଏସ୍ପିଏଲ୍ ଉକ୍ତ ପରିମାଣ ପୁଞ୍ଜି ବିନିଯୋଗ କରି ତା’ର ବିକାଶ କରିବ। ସେହିଭଳି ୨୦୨୨ ଡିସେମ୍ବରରେ ଜେଏସ୍ପିଏଲ୍ ପ୍ରାୟ ୪୧୦ କୋଟି ଟଙ୍କାରେ ମୋନେଟ ପାୱାରକୁ ହାସଲ କରିଥିଲା। ବିଶେଷକରି ମୋନେଟ ପାଓ୍ବାରର ୧,୦୫୦ ମେଗାୱାଟ (ମେଗାୱାଟ) ନିର୍ମାଣାଧୀନ କୋଇଲାଭିତ୍ତିକ ବିଦ୍ୟୁତ ପ୍ରକଳ୍ପ ଓଡ଼ିଶାର ଅନୁଗୋଳଠାରେ ଥିବା ଜେଏସ୍ପିଏଲ୍ର ଇସ୍ପାତ କାରଖାନା ନିକଟରେ ଅବସ୍ଥିତ।
ଉକ୍ତ ପ୍ଲାଣ୍ଟକୁ କାର୍ଯ୍ୟକ୍ଷମ କରାଇବା ପାଇଁ ଜେଏସ୍ପିଏଲ ୧,୫୦୦ କୋଟି ଟଙ୍କା ପର୍ଯ୍ୟନ୍ତ ନୂତନ ପୁଞ୍ଜି ବିନିଯୋଗ କରିବ ବୋଲି କମ୍ପାନୀ ପକ୍ଷରୁ କୁହାଯାଇଛି। ଏପରିକି ଉପରୋକ୍ତ ପରିମାଣର ପୁଞ୍ଜି ଆସନ୍ତା ୧୨ରୁ୧୮ ମାସ ମଧ୍ୟରେ ବିନିଯୋଗ ହେବ ବୋଲି ଜଣାପଡିଛି। ସେହିପରି ବିକାଶ କାର୍ଯ୍ୟ ଶେଷ ହେବା ପରେ ଏହା ଅନୁଗୋଳସ୍ଥିତ ଜେଏସପିଏଲର ଇସ୍ପାତ କାରଖାନାକୁ ଶକ୍ତି ଯୋଗାଇବ ବୋଲି ଝା କହିଛନ୍ତି। ଅପରପକ୍ଷରେ ମୋନେଟ ପାୱାର ପାଇଁ ଆବଶ୍ୟକ କୋଇଲା ଜେଏସପିଏଲର ଉତ୍କଳ ବି-୧ ଏବଂ୧-୨ ଖଣିରୁ ଯୋଗାଇ ଦିଆଯିବ ବୋଲି ଯୋଜନା ରହିଛି।
ଉଲ୍ଲେଖଯୋଗ୍ୟ ଗତ ବର୍ଷ ଜେଏସପିଏଲ ଇ-ନିଲାମ ପ୍ରକ୍ରିୟାରେ ଅଂଶଗ୍ରହଣ କରି ଓଡିଶାର ଅନୁଗୋଳ ନିକଟରେ ଥିବା କୋଇଲା ଖଣିରୁ ପ୍ରାୟ ୩୪୭ ନିୟୁତ ଟନ୍ ସଂରକ୍ଷିତ ୨ଟି କୋଇଲା ବ୍ଲକ ଜିତିଥିଲା। ସୂଚନାଯୋଗ୍ୟ ଯେ ଓପି ଜିନ୍ଦଲ ଗ୍ରୁପର ଏକ ଅଂଶ ହେଉଛି ଜେଏସ୍ପିଏଲ୍। କମ୍ପାନୀ ବିଶେଷ କରି ଇସ୍ପାତ, ଶକ୍ତି ଏବଂ ଖଣି କ୍ଷେତ୍ରରେ ଏକ ମହତ୍ତ୍ୱପୂର୍ଣ୍ଣ ଉପସ୍ଥିତି ସହ ସମଗ୍ର ବିଶ୍ୱରେ ପ୍ରାୟ ୯୦,୦୦୦ କୋଟି ଟଙ୍କା ବିନିଯୋଗ କରିଥିବା ସୂଚନା ମିଳିଛି।
