ନୂଆଦିଲ୍ଲୀ, ୧୯।୭: ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନିଙ୍କୁ ଥଟ୍ଟା କରି ହଟହଟା ହେଲେ ଖବରଦାତା। ମେଲୋନିଙ୍କ ଉଚ୍ଚତା ଉପରେ ସୋସିଆଲ ମିଡିଆରେ ଥଟ୍ଟା ପୋଷ୍ଟ କରିଥିବା ଖବରଦାତାଙ୍କ ଉପରେ ୫,୦୦୦ ୟୁରୋ (୪.୫ ଲକ୍ଷ ଟଙ୍କା) ର ଜରିମାନା ଲଗାଇଲେ କୋର୍ଟ।
ସେହିପରି ଅକ୍ଟୋବର ୨୦୨୧ ରେ ମେଲୋନିଙ୍କ ଉଚ୍ଚତା ଉପରେ ଟ୍ୱିଟର (ବର୍ତ୍ତମାନ ଏକ୍ସ)ରେ କଟାକ୍ଷ କରିବା ପାଇଁ ଖବରଦାତା ଜୁଲିଆ କର୍ଟେସଙ୍କୁ ଅତିରିକ୍ତ ୧,୨୦୦ ୟୁରୋ (ଏକ ଲକ୍ଷ ଟଙ୍କା) ଜରିମାନା କରାଯାଇଛି। ଯାହା ଏକ ଶାରୀରିକ ଆକ୍ଷେପ ଅଟେ।
ଏହି ମାମଲାରେ କୋର୍ଟ ତାଙ୍କର ରାୟ ଶୁଣାଇବା ପରେ ଜୁଲିଆ କର୍ଟେସ ଏକ୍ସରେ ଲେଖିଛନ୍ତି, ‘ଅଭିବ୍ୟକ୍ତିର ସ୍ୱାଧୀନତା ଏବଂ ଭିନ୍ନ ମତକୁ ନେଇ ଇଟାଲୀ ସରକାରଙ୍କର ଏକ ଗୁରୁତର ସମସ୍ୟା ରହିଛି।’ ତିନି ବର୍ଷ ପୂର୍ବେ ସୋସିଆଲ ମିଡିଆରେ ମୁହାଁମୁହିଁ ହେବା ପରେ ମେଲୋନି ଖବରଦାତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲେ।
Italy’s government has a serious problem with freedom of expression and journalistic dissent. This country seems to get closer to Orbán’s Hungary: these are bad times for independent Journalists and opinion leaders. Let’s hope for better days ahead. We won’t give up!@Reuters https://t.co/sWojOlMJz1
— Giulia Cortese (@GiuliaCortese1) July 18, 2024
ମାମଲା ରୁଜୁ କରିବା ସମୟରେ ମେଲୋନିଙ୍କ ପାର୍ଟି ‘ବ୍ରଦର୍ସ ଅଫ ଇଟାଲୀ’ ବିରୋଧୀ ଆସନରେ ଥିଲେ ଯେତେବେଳେ ଜୁଲିଆ କର୍ଟେସ ତାଙ୍କୁ ଉପହାସ କରି ଏକ ପୋଷ୍ଟ କରିଥିଲେ। ଯେଉଁଥିରେ ମେଲୋନିଙ୍କ ଫଟୋ ଏବଂ ବ୍ୟାକଗ୍ରାଉଣ୍ଡର ଫାସିଷ୍ଟ ନେତା ବେନିଟୋ ମୁସୋଲିନିଙ୍କ ଫଟୋ ଥିଲା।
ଏହି ପୋଷ୍ଟରେ ଜୁଲିଆ କର୍ଟେସ ଲେଖିଥିଲେ “ତୁମେ ମୋତେ ଭୟଭୀତ କରିପାରିବ ନାହିଁ, ଜର୍ଜିଆ ମେଲୋନି। ସର୍ବଶେଷରେ, ତୁମେ ମାତ୍ର ୧.୨ ମିଟର (୪ ଫୁଟ)। ମୁଁ ତୁମକୁ ମଧ୍ୟ ଦେଖିପାରୁ ନାହିଁ।” ସୂଚନାଯୋଗ୍ୟ ବିଭିନ୍ନ ମିଡିଆ ୱେବସାଇଟରେ ମେଲୋନିଙ୍କ ଉଚ୍ଚତା ୧.୫୮ ମିଟରରୁ ୧.୬୩ ମିଟର ମଧ୍ୟରେ ଦିଆଯାଏ।
ତେବେ କର୍ଟେସ ଏହି ଦଣ୍ଡ ବିରୋଧରେ ଆବେଦନ କରିପାରିବେ ଏବଂ ମେଲୋନିଙ୍କ ଓକିଲ କହିଛନ୍ତି ଯେ ପ୍ରଧାନମନ୍ତ୍ରୀଙ୍କୁ ଯଦି କୌଣସି କ୍ଷତିପୂରଣ ମିଳେ ସେ ତାହା ଚାରିଟିକୁ ଦାନ କରିବେ।
କୋର୍ଟଙ୍କ ରାୟ ପରେ ଗୁରୁବାର ଏକ୍ସ’ରେ ଜୁଲିଆ କର୍ଟେସ କହିଛନ୍ତି ଯେ, ”ଇଟାଲୀର ସ୍ୱାଧୀନ ଖବରଦାତାଙ୍କ ପାଇଁ ଏହା ଏକ କଠିନ ସମୟ। କେବଳ ଭଲ ଦିନ ପାଇଁ ଆଶା କରିବା। ଆମେ ହାର ମାନିବୁ ନାହିଁ!”
ସେପଟେ ଇଟାଲୀରେ ଚଳିତ ବର୍ଷ ଖବରଦାତାଙ୍କ ବିରୋଧରେ ମାମଲା ବୃଦ୍ଧି ପାଇଛି, ଯାହା ଇଟାଲୀକୁ ୨୦୨୪ ୱାର୍ଲ୍ଡ ପ୍ରେସ୍ ଫ୍ରିଡମ୍ ଇଣ୍ଡେକ୍ସରେ ପାଞ୍ଚ ସ୍ଥାନ ପଛକୁ ଯାଇ ୪୬ ତମ ସ୍ଥାନରେ ରହିଛି।
ଖବରଦାତାଙ୍କୁ କୋର୍ଟକୁ ଟାଣିବା ମେଲୋନିଙ୍କ ପାଇଁ ନୂଆ ନୁହେଁ। ୨୦୨୧ରେ ମେଲୋନିଙ୍କୁ ଏକ ଟିଭି କାର୍ୟ୍ୟକ୍ରମରେ କଟାକ୍ଷ କରିବା ପରେ ଗତ ବର୍ଷ ରୋମ କୋର୍ଟ ସର୍ବାଧିକ ବିକ୍ରି ହୋଇଥିବା ଲେଖକ ରୋବର୍ଟୋ ସାଭିଆନୋଙ୍କୁ ୧୦୦୦ ୟୁରୋ ଏବଂ ଆଇନଗତ ଖର୍ଚ୍ଚ ଜରିମାନା କରିଥିଲେ।
