କଟକ ଅଫିସ,୫।୭: କଟକ ସହର ମାଣିକଘୋଷରୁ ଶନିବାର ୧୧ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରେ ୭ ଜଣ ପୁରୁଷ ଏବଂ ୪ଜଣ ମହିଳା ଅଛନ୍ତି। ଏମାନେ ସମସ୍ତେ ସମ୍ପର୍କୀୟ। ଗତ କିଛି ଦିନ ପୂର୍ବରୁ ମାଣିକଘୋଷରେ ଏହି ପରିବାର ଏକ ବିବାହ ଭୋଜି ଆୟୋଜନ କରିଥିଲେ। ଏଥିରେ ଭୁବନେଶ୍ବରରୁ ଜଣେ ସମ୍ପର୍କୀୟ ଯୋଗ ଦେଇଥିଲେ। ପରବର୍ତ୍ତୀ ସମୟରେ ଉକ୍ତ ସମ୍ପର୍କୀୟ ଜଣକ କରୋନା ପିଜିଟିଭ ଚିହ୍ନଟ ହୋଇଥିଲେ। ଏଣୁ ଭୋଜି ଆୟୋଜନ କରିଥିବା ପରିବାରର ସଦସ୍ୟଙ୍କୁ ଗୃହ ସଙ୍ଗରୋଧରେ ରଖା ଯାଇଥିଲା। ୧୮ ଜଣଙ୍କ ସ୍ବାବ ସଂଗ୍ରହ କରାଯାଇ ଥିଲା। ସେଥିରୁ ୧୧ଜଣ କରୋନା ପିଜିଟିଭ ଚିହ୍ନଟ ହୋଇଛନ୍ତି।
ସେହିଭଳି ସିଡିଏ ସେକ୍ଟର-୬ରୁ ୩ଜଣ ଆକ୍ରାନ୍ତ ହୋଇଛନ୍ତି। ସେମାନଙ୍କ ମଧ୍ୟରେ ୪୨ ବର୍ଷୀୟା ମହିଳା, ୧୭ ଏବଂ୧୨ ବର୍ଷୀୟ ପୁରୁଷ ରହିଛନ୍ତି। ବମ୍ଫକୁଦାରୁ ଜଣେ ୩୨ ବର୍ଷୟୀ ପୁରୁଷ ଚିହ୍ନଟ ହୋଇଛନ୍ତି। ପୂର୍ବରୁ ସେ ଜଣେ ଆକ୍ରାନ୍ତଙ୍କ ସମ୍ପର୍କରେ ଆସିଥିଲେ। ମାଳିସାହିରୁ ୧୩ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ସେମାନେ ଶୁକ୍ରବାରଠାରୁ ଚିହ୍ନଟ ହୋଇଥିଲେ ମଧ୍ୟ ରବିବାର ଏନେଇ ସୂଚନା ଦିଆଯାଇଛି। ଏପରିକି ଶନିବାର ଏହି ସାହିକୁ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। ପୂର୍ବରୁ ସାହିର ଜଣେ ବାସିନ୍ଦା ପଜିଟିଭ ଚିହ୍ନଟ ହେବା ପରେ ତାଙ୍କ ସମ୍ପର୍କରେ ଆସିଥିବା ସମସ୍ତଙ୍କୁ ସରକାରୀ ସଙ୍ଗରୋଧରେ ରଖା ଯାଇଥିଲା। ଏଥିରୁ ୧୩ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି।
ଅପରପକ୍ଷେ ୩ଜଣ କରୋନା ଯୋଦ୍ଧା ଏବଂ ମାଳିସାହି ଆକ୍ରାନ୍ତଙ୍କ ସଂସ୍ପର୍ଶରେ ଆସି ୫ଜଣ ଆକ୍ରାନ୍ତ ହୋଇଛନ୍ତି। ଏଭଳି ଭାବେ ଶନିବାର କଟକ ମହାନଗର ଅଞ୍ଚଳରେ ମୋଟ ୭୪ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ସହରରେ ମୋଟ ଆକ୍ରାନ୍ତଙ୍କ ସଂଖ୍ୟା ୧୯୦ରେ ପହଞ୍ଚିଛି। ୨୨ଜଣ ସୁସ୍ଥ ହୋଇଥିବା ବେଳେ ୧୬୬ଜଣ ଚିକିତ୍ସିତ ଅଛନ୍ତି। ୨ଜଣଙ୍କ ମୃତ୍ୟୁ ଘଟିଛି। ସେହିଭଳି ଶନିବାର କଟକ ଗ୍ରାମାଞ୍ଚଳରୁ ୧୯ଜଣ ଯଥା ମାହଙ୍ଗାରୁ ୮ଜଣ, ବଡମ୍ବାରୁ ୬, ବାଙ୍କୀରୁ ୪ ଏବଂ ନିଆଳିରୁ ଜଣେଙ୍କ ସମେତ ଜଣେ ଏନ୍ଡିଆର୍ଏଫ ଯବାନ ମଧ୍ୟ ଆକ୍ରାନ୍ତ ହୋଇଛନ୍ତି। ଏଥିସହିତ ଜିଲାରେ ମୋଟ ଆକ୍ରାନ୍ତଙ୍କ ସଂଖ୍ୟା ୮୧୩ରେ ପହଞ୍ଚିଛି। ୨୯୪ ଜଣ ଚିକିତ୍ସିତ ହେଉଥିବା ବେଳେ ୫୧୩ ଜଣ ସୁସ୍ଥ ହୋଇଛନ୍ତି। ୪ଜଣଙ୍କ ମୃତ୍ୟୁ ଘଟିଛି।
