ଆଡିଲେଡ୍,୧୯।୧୨: ସଚିନ ତେନ୍ଦୁଲକର, ରିକି ପଣ୍ଟିଂ, ସୁନିଲ ଗାଭାସ୍କରଙ୍କ ଭଳି କିମ୍ବଦନ୍ତୀଙ୍କୁ ପଛରେ ପକାଇଛନ୍ତି ଇଂଲଣ୍ଡ ଅଧିନାୟକ ଜୋ ରୁଟ୍। ଗୋଟିଏ ବର୍ଷରେ ଟେଷ୍ଟ ଫର୍ମାଟରେ ୧,୬୦୦ରୁ ଅଧିକ ରନ୍ କରିବାରେ ସେ ବିଶ୍ୱର ଚତୁର୍ଥ କ୍ରିକେଟର। ଆଡିଲେଡ୍ ଓଭାଲଠାରେ ଚାଲିଥିବା ଆଶେସ ସିରିଜ୍ର ଦ୍ୱିତୀୟ ତଥା ଦିବାରାତ୍ର ଟେଷ୍ଟର ଉଭୟ ଇନିଂସରେ ରୁଟ୍ ୮୬ ରନ୍ କରିଛନ୍ତି। ଏହାକୁ ମିଶାଇ ଚଳିତ ବର୍ଷ ଟେଷ୍ଟ ଫର୍ମାଟରେ ସେ ସଂଗ୍ରହ କରିଛନ୍ତି ୧,୬୩୦ ରନ୍।
ବ୍ରିସବେନ ଟେଷ୍ଟରେ ଶତକ ହାତଛଡ଼ା କରିଥିବା ରୁଟ୍ ୨୦୨୧ରେ ୧୪ ଟେଷ୍ଟରେ ୬୪.୨୪ ହାରରେ ୧୬୩୦ ରନ୍ କରିଛନ୍ତି। ଏଥିରେ ରହିଛି ୬ ଶତକ। ତାଙ୍କ ପୂର୍ବରୁ କେବଳ ପାକିସ୍ତାନର ମହମ୍ମଦ ୟୁସୁଫ (୨୦୦୬ରେ ୧,୭୮୮ ରନ୍), ଓ୍ବେଷ୍ଟଇଣ୍ଡିଜର ଭିଭିଆନ ରିଚାଡ୍ସ ( ୧୯୭୬ରେ ୧,୭୧୦) ଓ ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ଗ୍ରେମ ସ୍ମିଥ (୨୦୦୮ରେ ୧,୬୫୬ ) ଗୋଟିଏ ବର୍ଷରେ ଟେଷ୍ଟ ଫର୍ମାଟରେ ୧୬୦୦ରୁ ଅଧିକ ରନ୍ କରିଥିଲେ। ୧୩ ବର୍ଷର ବ୍ୟବଧାନ ପରେ ଏହି ସ୍ବତନ୍ତ୍ର ତାଲିକାରେ ଚତୁର୍ଥ ବ୍ୟାଟର ଭାବେ ସ୍ଥାନ ପାଇଛନ୍ତି ରୁଟ୍। ଅନ୍ତିମ ଥର ୨୦୦୮ରେ ଦକ୍ଷିଣ ଆଫ୍ରିକାର କିମ୍ବଦନ୍ତୀ ଗ୍ରେମ ସ୍ମଥ ୧୬୦୦ରୁ ଅଧିକ ରନ୍ କରିଥିଲେ।
