କେନ୍ଦୁଝର,୧୦।୩(ନରେଶ ଚନ୍ଦ୍ର ପଟ୍ଟନାୟକ): ଶିକ୍ଷିତ ଯୁବତୀ, ଯୁବକମାନଙ୍କୁ ନିଯୁକ୍ତି ସୁଯୋଗ ଯୋଗାଇବା ଉଦ୍ଦେଶ୍ୟରେ ଆସନ୍ତା ୧୩ରେ ସ୍ଥାନୀୟ ଓଡ଼ିଶା ଖଣି ଓ ଯାନ୍ତ୍ରିକ ବିଦ୍ୟାଳୟ ପଡ଼ିଆରେ ଜିଲାସ୍ତରୀୟ ନିଯୁକ୍ତି ମେଳା ଅନୁଷ୍ଠିତ ହେବ। ଏନେଇ ଜିଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ସକାଳ ୯.୦୦ଟାରୁ ଅପରାହ୍ନ ୪.୦୦ଟା ପର୍ଯ୍ୟନ୍ତ ଏହି ନିଯୁକ୍ତି ମେଳା ଚାଲିବ। ମେଳାରେ ଶିଳ୍ପ, ଖଣି, ବ୍ୟାଙ୍କି, ରିଟେଲ, ସ୍ବାସ୍ଥ୍ୟ ସେବା ସାଙ୍ଗକୁ ବିଭିନ୍ନ ପ୍ରତିଷ୍ଠିତ ନିଯୁକ୍ତିଦାତା ଯୋଗଦେଇ ଯୋଗ୍ୟ ପ୍ରାର୍ଥୀଙ୍କୁ ନିଯୁକ୍ତି ପ୍ରଦାନ କରିବେ।
୧୮ ରୁ ୩୫ ବର୍ଷ ବୟସର ସମସ୍ତ ପୁରୁଷ ଓ ମହିଳା ପ୍ରାର୍ଥୀ ନିଯୁକ୍ତି ମେଳାରେ ଯୋଗଦେଇ ନିୟୋଜକମାନଙ୍କ ସହ ଆଲୋଚନା କରି ଉପଯୁକ୍ତ ଚାକିରି ସୁଯୋଗ ଲାଭ କରିପାରିବେ ବୋଲି ପ୍ରଶାସନ ପକ୍ଷରୁ କୁହାଯାଇଛି।
ଯୋଗଦାନ କରିବାକୁ ଇଚ୍ଛୁକ ପ୍ରାର୍ଥୀମାନେ ନିଜର ବାୟୋଡାଟା, ସମସ୍ତ ଶିକ୍ଷାଗତ ପ୍ରମାଣପତ୍ର, ଆଧାର କାର୍ଡ ଏବଂ ପାସପୋର୍ଟ ସାଇଜ ଫଟୋଗ୍ରାଫ ସହିତ ଉପସ୍ଥିତ ରହିବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି।
ପ୍ରାର୍ଥୀମାନେ ନିୟୋଜକଙ୍କ ସହ ସିଧାସଳଖ ଆଲୋଚନା ଓ ସାକ୍ଷାତକାର ମାଧ୍ୟମରେ ଚୟନ ହୋଇପାରିବେ। ମେଳାରେ ଯୋଗ୍ୟ ଯୁବତୀ, ଯୁବକ ବହୁ ସଂଖ୍ୟାରେ ଯୋଗଦେବାକୁ ପ୍ରଶାସନ ପକ୍ଷରୁ ଆହ୍ବାନ କରାଯାଇଛି।
