ପାଟନା,୧୮।୧୧: ବିହାରରେ ବାଚସ୍ପତି ପଦ ପାଇଁ ଭାଜପା ଏବଂ ଜେଡିୟୁ ଉଭୟ ଦାବି କରୁଛନ୍ତି। ସୂତ୍ର ଅନୁଯାୟୀ, ଆଲୋଚନା ମାଧ୍ୟମରେ ସମାଧାନ ଖୋଜିବା ପାଇଁ ପ୍ରୟାସ ଚାଲିଛି। ଜେଡିୟୁ ଚାହୁଁଛି ଯେ, ଯଦି ଭାଜପା ବାଚସ୍ପତି ପଦବୀ ପାଏ, ତେବେ କେବଳ ଜଣେ ଉପମୁଖ୍ୟମନ୍ତ୍ରୀଙ୍କୁ ନିଯୁକ୍ତି ଦେବା ଉଚିତ। ଜେଡିୟୁ ବିହାରରେ ଦୁଇଜଣ ଉପମୁଖ୍ୟମନ୍ତ୍ରୀ ଚାହୁଁନାହିଁ। ବିହାରରେ ନୂତନ ସରକାରଙ୍କ ଶପଥ ଗ୍ରହଣ ସମାରୋହ ନଭେମ୍ବର ୨୦ରେ ପାଟନାର ଐତିହାସିକ ଗାନ୍ଧୀ ମୈଦାନରେ ଅନୁଷ୍ଠିତ ହେବ। ଆଜି ମୁଖ୍ୟମନ୍ତ୍ରୀ ନୀତୀଶ କୁମାର, ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଏବଂ ବିଜୟ ସିହ୍ନାଙ୍କ ସହିତ ଗାନ୍ଧୀ ମଇଦାନ ଗସ୍ତ କରି ଶପଥ ଗ୍ରହଣ ଉତ୍ସବର ପ୍ରସ୍ତୁତି ସମୀକ୍ଷା କରିଛନ୍ତି।
ବୁଧବାର ବିହାରରେ ଏକ ଗୁରୁତ୍ୱପୂର୍ଣ୍ଣ ଦିନ ହେବାକୁ ଯାଉଛି। ଭାଜପା ବିଧାୟକ ଦଳ ବୈଠକ ଆସନ୍ତାକାଲି ଅନୁଷ୍ଠିତ ହେବାର କାର୍ଯ୍ୟକ୍ରମ ଅଛି। ଏହି ବୈଠକରେ ଭାଜପା ବିଧାୟକ ଦଳର ନେତା ନିର୍ବାଚିତ ହେବେ। ଏହି ବୈଠକ ପାଇଁ ୟୁପି ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କୁ ପର୍ଯ୍ୟବେକ୍ଷକ ଭାବରେ ନିଯୁକ୍ତ କରାଯାଇଛି। ସକାଳ ୧୦ଟାରେ ପାଟନାର ଭାଜପା କାର୍ଯ୍ୟାଳୟରେ ବୈଠକ ଅନୁଷ୍ଠିତ ହେବ।
NDA ବିଧାୟକ ଦଳ ବୈଠକ ମଧ୍ୟ ଆସନ୍ତାକାଲି ଅନୁଷ୍ଠିତ ହେବାର ସମ୍ଭାବନା ରହିଛି। ଏହି ବୈଠକରେ NDA ବିଧାୟକ ଦଳର ନେତା ନିର୍ବାଚିତ ହେବେ। ନିର୍ବାଚିତ ନେତା ରାଜ୍ୟପାଳଙ୍କୁ ବିଧାୟକମାନଙ୍କ ଦ୍ୱାରା ଦସ୍ତଖତ କରାଯାଇଥିବା ଏକ ପତ୍ର ପ୍ରଦାନ କରିବେ ଏବଂ ନୂତନ ସରକାର ଗଠନ ପାଇଁ ଦାବି କରିବେ। NDAରେ JDU ଏବଂ ଭାଜପା ସହିତ ଚିରାଗ ପାସୱାନ, ଜିତନ ରାମ ମାଞ୍ଝି ଏବଂ ଉପେନ୍ଦ୍ର କୁଶୱାହାଙ୍କ ଦଳ ମଧ୍ୟ ସାମିଲ ଅଛନ୍ତି।
ସୂତ୍ର ଅନୁସାରେ, ଭାଜପା ଏବଂ JDU ମୁଖ୍ୟମନ୍ତ୍ରୀ ପଦ ପାଇଁ ଏକ ସହମତିରେ ପହଞ୍ଚିଛନ୍ତି। ନୀତୀଶ କୁମାରଙ୍କ ନାମ ଚୂଡ଼ାନ୍ତ ବୋଲି ବିବେଚନା କରାଯାଉଛି। ସରକାରରେ ଅନ୍ୟ ବିଭାଗ ସମ୍ପର୍କରେ ଆଲୋଚନା ଚାଲିଛି। ଉପେନ୍ଦ୍ର କୁଶୱାହା, ଚିରାଗ ପାସୱାନ ଏବଂ ଜିତନ ରାମ ମାଞ୍ଝି ପୂର୍ବରୁ ମୁଖ୍ୟମନ୍ତ୍ରୀ ପଦ ପାଇଁ ନୀତୀଶ କୁମାରଙ୍କ ନାମ ଉପରେ ସହମତ ହୋଇସାରିଛନ୍ତି।
Dharitri – Odisha’s No.1 Odia Daily
